Yizikeɛle 19:1-14
-
Yizilayɛ mgbanyima anwo awolɛyelɛ (1-14)
19 “To Yizilayɛ mgbanyima anwo awolɛyelɛ edwɛne*
2 na ka kɛ,‘Kɛzi ɛnee wɔ mame de ɛ? Ɔle awenade belɛ wɔ awenade avinli.
Ɛnee ɔ nee awenade ngyikyi mɔɔ bɛ nwo yɛ se la a da a, na ɛkɛ ne a ɔtetele ɔ mra a.
3 Ɔtetele ɔ mra ne mɔ anu ko, na ɔrayɛle awenade kakula mɔɔ anwo yɛ se.+
Ɔzukoale kɛzi bɛtete nane nu la,Ɔhyele menli bɔbɔ ɔlile.
4 Maanle maanle dele ɔ nwo edwɛkɛ na bɛhyele ye wɔ bɛ kuma nu,Na bɛvale koba bɛsosɔle ye bɛ nee ye hɔle Yigyibiti azɛlɛ zo.+
5 Ɔhendɛle too na ɔnwunle kɛ anyelazo biala ɛnle ɛkɛ ne kɛ ɔbazia yeara bieko.
Ɔti ɔvale ɔ mra ne mɔ anu ko bieko na ɔtetele ye ɔmaanle ɔrayɛle awenade kakula mɔɔ anwo yɛ se.
6 Ɔdaye noko ɔ nee awenade ne mɔ luale na ɔrayɛle awenade kakula mɔɔ anwo yɛ se.
Ɔzukoale kɛzi bɛtete nane nu la, na ɔhyele menli bɔbɔ ɔlile.+
7 Ɔhɔle nzia wɔ bɛ aranemgbole ne mɔ anzi na ɔzɛkyele bɛ azuamgbole ne mɔ,Amaa bɛade ye ɛkpolɛ ne wɔ azɛlɛ mɔɔ ɛdɔ mgbane la amuala azo.+
8 Maanle maanle mɔɔ vi maangyeba ne mɔ mɔɔ ɛbɔ ye ɛyia la anu la rale ɔ nwo zo kɛ bɛto bɛ avonle ne bɛagua ɔ nwo zo,Na bɛhyele ye wɔ bɛ kuma ne anu.
9 Bɛvale koba bɛsosɔle ye bɛvale ye bɛdole tunli nu na bɛvale ye bɛhɔmaanle Babelɔn belemgbunli ne.
Bɛvale ye bɛdole tunli nu wɔ ɛkɛ, amaa bɛande ɔ ne wɔ Yizilayɛ awoka ne mɔ azo bieko.
10 Ɛnee wɔ mame le kɛ vanye+ wɔ wɔ mogya nu,* na bɛluale ye wɔ azule dɔɔnwo anloa.
Na azule dɔɔnwo ne ati, ɔzole ma na ɔkpakyele ngane dɔɔnwo.
11 Ɔnyianle ngane* mɔɔ anwo yɛ se, bɛfɛta tumivolɛma kpɔma.
Ɔnyinle na ɔhedale mbaka mɔɔ ɛha la anwo zo,Na ye tendenle ne nee ye nya dɔɔnwo ne ati, bɛnwunle ye wɔ ɛleka biala.
12 Noko bɛvale ɔ nwo ɛya na bɛdule ɔ bo+ bɛvuandinle ye bɛdole azɛlɛ ne azo,Na aduduleɛ anwoma bie maanle ye ma nwosonle.
Bɛpepɛle ye ngane ɛsesebɛ ne mɔ bɛvile ɛkɛ,+ bɛwele na senle yelale bɛ.+
13 Akee bɛhɔluale ye wɔ fienemgbole nu,Azɛlɛ mɔɔ nzuhɔne wɔ zo na nzule ɛnle ɛkɛ ne la azo.+
14 Senle vi ye ngane ne mɔ anu dɛlɛle na ɔyelale ye nya ne mɔ nee ye ma,Na ngane mɔɔ yɛ se la biala anga, tumililɛ kpɔma biala anga.+
“‘Ɔle awolɛyelɛ edwɛne, na ɔbahɔ zo yeayɛ awolɛyelɛ edwɛne.’”
Ɔbodwɛkɛ
^ Anzɛɛ “nyanelilɛ edwɛne.”
^ Anzɛɛ ɔkola ɔkile, “vanye wɔ wɔ vanye egyinli nu.”
^ Anzɛɛ “mbaka.”
