Yizikeɛle 2:1-10
2 Akee ɔzele me kɛ: “Sonla ra,* dwazo gyinla ɛ gyakɛ azo maa me nee wɔ ɛdendɛ.”+
2 Mɔɔ ɔ nee me dendɛle la, sunsum ne rawolole me na ɔmaanle mendwazole mengyinlanle me gyakɛ azo+ amaa meadie Ahenle mɔɔ ɔ nee me ɛlɛtendɛ la.
3 Ɔdoale zo ɔzele me kɛ: “Sonla ra, mesoa wɔ wɔ Yizilayɛma,+ atuadelɛ maanle maanle ne mɔ* mɔɔ bɛde me nwo atua la ɛkɛ.+ Bɛ nee bɛ nenyia mɔ ɛdo me mɛla too a yearadwu ɛnɛ a.+
4 Mesoa wɔ wɔ mralɛ mɔɔ bɛle anyetele* na bɛ ahonle yɛ se+ la ɛkɛ, na ka kile bɛ kɛ, ‘Mɔɔ Tumivolɛ Awulae Gyihova ɛha la ɛne.’
5 Na saa bɛtie o anzɛɛ bɛandie o—ɔluakɛ bɛle atuadelɛ menli+—bɛbanwu ye wienyi kɛ ɛnee ngapezonli bie wɔ bɛ avinli.+
6 “Noko wɔmɔ, sonla ra, mmasulo bɛ+ yɛɛ mmasulo bɛ edwɛkɛ, ɔnva nwo kɛ mbowunyɛma nee mbowule* ɛbɔ wɔ ɛyia+ na ɛ nee nyamenleakɛlɛ a de la. Mmasulo bɛ edwɛkɛ+ yɛɛ mmamaa bɛ nyunlu ka wɔ ɛzulolɛ,+ ɔluakɛ bɛle menli mɔɔ ɛde atua.
7 Saa bɛtie o anzɛɛ bɛandie o, ka me edwɛkɛ ne kile bɛ ɔluakɛ bɛle menli mɔɔ ɛde atua.+
8 “Noko wɔmɔ, sonla ra, tie mɔɔ melɛka meahile wɔ la. Mmate atua kɛ menli ɛhye mɔ mɔɔ ɛde atua la. Buke ɛ nloa na di mɔɔ melɛfa meamaa wɔ la.”+
9 Mɔɔ meneanle la, menwunle kɛ bɛdende ɛsalɛ bie wɔ me nwo ɛkɛ,+ na menwunle nwomamobɔleɛ* mɔɔ bɛhɛlɛ zo la wɔ nu.+
10 Mɔɔ ɔdɛlɛle nu wɔ me nyunlu ɛkɛ ne la, ɛnee bɛhɛlɛ ɔ nyunlu nee ɔ nzi amuala.+ Ɛnee bɛhɛlɛ awolɛyelɛ* nee nyanelilɛ yɛɛ ɛzunlɛ wɔ zo.+
Ɔbodwɛkɛ
^ “Sonla ra”; edwɛkɛ ɛhye finde 93 wɔ Yizikeɛle buluku ne anu na mɔɔ limoa la ɛne.
^ Ɔda ali kɛ ɔfale menli mɔɔ wɔ Yizilayɛ nee Dwuda la anwo.
^ Anzɛɛ “bɛ nyunlu yɛ se.”
^ Anzɛɛ ɔkola ɔkile, “ɔnva nwo kɛ menli ne ɛsolo na bɛle kɛ ninyɛne mɔɔ wowɔ wɔ.”
^ Anzɛɛ “buluku nwomamobɔleɛ.”
^ Anzɛɛ “nyanelilɛ edwɛne.”
