Yizikeɛle 21:1-32
21 Gyihova nee me dendɛle bieko kɛ:
2 “Sonla ra, kakyi ɛ nye wɔ Gyɛlusalɛm, na bɔ nolo tia ɛleka nwuanzanwuanza ne mɔ na ka ngapezo tia Yizilayɛ azɛlɛ ne.
3 Ka kile Yizilayɛ azɛlɛ ne kɛ, ‘Mɔɔ Gyihova ɛha la ɛne: “Nea meyɛ wɔ kpɔvolɛ, na mebahwe me konle dadeɛ ne meavi ye boa ne anu+ na meapɛ tenlenema nee amumuyɛma meavi zolɛ.
4 Ɔluakɛ mebapɛ tenlenema nee amumuyɛma meavi wɔ avinli, mebahwe me konle dadeɛ ne meavi ye boa ne anu meara nwonane* kɔsɔɔti anwo zo, ɔvi nyiakɛ yeahɔdwu sɔlɔ.
5 Na menli kɔsɔɔti banwu kɛ medame, Gyihova, mehwe me konle dadeɛ ne mevi ye boa ne anu. Ɔnrɛzia ɔ nzi bieko.”’+
6 “Na wɔmɔ sonla ra, di nyane wɔ mekɛ mɔɔ ɛ nwo* ɛlɛwoso wɔ la, ɛhɛe, di nyane kpole wɔ bɛ nyunlu ɛkɛ.+
7 Na saa bɛbiza wɔ kɛ, ‘Duzu ati a ɛlɛdi nyane a?’ ka kɛ, ‘Amaneɛbɔlɛ bie ati ɔ.’ Ɔluakɛ ye biala anu ɔbara, na ɛzulolɛ bamaa ahonle biala adu* yɛɛ ɛsalɛ biala bahendɛhenda nwolɛ kpokpɔdwɔlɔɔ yɛɛ sunsum biala arɛle babɔ na egyakɛ kpɔkɛ biala ahwi nzule.*+ ‘Bɛnlea! Ye biala anu ɔbara—ɔbayɛ zɔ,’ Tumivolɛ Awulae Gyihova a se a.”
8 Gyihova nee me dendɛle bieko kɛ:
9 “Sonla ra, ka ngapezo na ka kɛ, ‘Mɔɔ Gyihova ɛha la ɛne: “Ka kɛ, ‘Konle dadeɛ! Bɛzi konle dadeɛ bie,+ na bɛhwi nwolɛ.
10 Bɛzi ɔ nloa kɛ bɛfa bɛahu menli dɔɔnwo; bɛhwi nwolɛ amaa yeada kɛ ɛsɛlɛmanye.’”’”
“Asoo ɔnle kɛ yɛ nye die ɔ?”
“‘Asoo ɔbakpo* me ra ne tumililɛ kpɔma ne+ kɛ mɔɔ ɔyɛ baka biala la ɔ?
11 “‘Bɛva bɛmaa kɛ bɛhwi nwolɛ na ɛsalɛ ɛzɔ nu. Bɛzi konle dadeɛ ɛhye yɛɛ bɛhwi nwolɛ kɛ bɛfa bɛawula mɔɔ ku sonla la asa anu.+
12 “‘Sonla ra, su na ye awolɛ,+ ɔluakɛ yera me menli ne anwo zo; yera Yizilayɛ mgbanyima ne mɔ kɔsɔɔti anwo zo.+ Bɛva mgbanyima ɛhye mɔ nee me menli ne amuala bɛmaa konle dadeɛ. Ɔti fa nyanelilɛ bɔ wɔ ɛzɔlɛ nwo.
13 Ɔluakɛ bɛzɔ bɛnlea,+ na saa konle dadeɛ ne kpo tumililɛ kpɔma ne a, duzu a bazi a? Ɔnrɛdɛnla* ɛkɛ ne bieko,’+ Tumivolɛ Awulae Gyihova a se a.
14 “Na wɔmɔ sonla ra, ka ngapezo na bɔ ɛ sa nu na ka kɛ ‘Konle dadeɛ!’ fane nsa. Ɔle menli mɔɔ bɛhu bɛ la konle dadeɛ, konle dadeɛ mɔɔ bahu menli dɔɔnwo, ɔbɔ bɛ ɔyia.+
15 Ɛzulolɛ bamaa bɛ ahonle adu*+ yɛɛ menli dɔɔnwo badɔ amolɛ nu wɔ bɛ suakpole ne nlenkɛ mgbole ne mɔ anloa; mebava konle dadeɛ meahu bɛ. Ɛhɛe, ɔta kɛ ɛsɛlɛmanye yɛɛ bɛhwi nwolɛ kɛ bɛva bɛhu menli!
16 Konle dadeɛ, pɛ ndɛndɛ kɔ fema zo! Pɛ kɔ bɛne zo! Kɔ ɛleka biala mɔɔ ɛ nye kɛhile la!
17 Medame noko mebabɔ me sa nu na me ɛya ne aha aze.+ Medame Gyihova a meha a.”
18 Na Gyihova nee me dendɛle bieko kɛ:
19 “Wɔmɔ sonla ra, yɛ ndenle nwiɔ maa Babelɔn belemgbunli ne konle dadeɛ ne ɛlua nuhua ɛrɛla. Bɛ mu nwiɔ bɛbavi azɛlɛ ko ne ala azo, na ɔwɔ kɛ ɛyɛ sɛkɛlɛneɛ* ɛsie ɛleka mɔɔ adenle ne makyi kɔ azuamgbole nwiɔ ne mɔ azo la.
20 Kile adenle ko mɔɔ konle dadeɛ ne balua nuhua ahɔ Amɔnoma sua Relaba+ azo la, yɛɛ adenle bieko mɔɔ ɔbalua nuhua yeahɔ Gyɛlusalɛm+ mɔɔ wɔ Dwuda mɔɔ bɛlie nwolɛ bane la azo la.
21 Ɔluakɛ Babelɔn belemgbunli ne gyinla nwɔnda ne azo, ɛleka mɔɔ ndenle nwiɔ ne mɔ makyi la na ɔyɛ abisadeɛ. Ɔwoso ɛda ne mɔ. Ɔbiza ye awozonle* ne mɔ; ɔneɛnlea ɛvovoa nu.
22 Abisadeɛ ne mɔɔ wɔ ɔ sa fema ne anu la kile ɛleka mɔɔ Gyɛlusalɛm wɔ la, kɛ bɛziezie konle milahyinli,* bɛha kɛ bɛhu menli, bɛbɔ konle aweɛne ne, bɛziezie konle milahyinli wɔ nlenkɛ mgbole ne mɔ anloa, bɛhuohua ɛnwea bɛbɛnga ye bɛyia, bɛlie bane bɛbɛnga ye bɛyia.+
23 Noko ɔbayɛ bɛ kɛ adalɛ abisadeɛ la wɔ bɛdabɛ* mɔɔ bɛha ndane la anye zo.+ Noko ɔkakye bɛ fɔlɛlilɛ ne na ɔbaho yeava bɛ.+
24 “Ɛhye ati mɔɔ Tumivolɛ Awulae Gyihova ɛha la ɛne: ‘Wɔmaa bɛhakye wɔ fɔlɛlilɛ ɔlua wɔ mɛladonlɛ nee wɔ ɛtane mɔɔ wɔmaa bɛnwu ye wɔ wɔ nyɛleɛ kɔsɔɔti anu la ati. Na kɛkala mɔɔ bɛhakye wɔ la, bɛbahye wɔ bɛahɔ.’*
25 “O, wɔmɔ mɔɔ bɛboda wɔ kpole, wɔ kenle ɛdwu, Yizilayɛ kpanyinli amumuyɛnli,+ wɔ anzohwenlɛ mɔɔ li awieleɛ la mekɛ ɛdwu.
26 Mɔɔ Tumivolɛ Awulae Gyihova ɛha la ɛne: ‘Bɛdu abotile ne, na bɛdu belemgbunli kyɛlɛ ne.+ Ɛhye ɛnrɛyɛ kɛ ye dɛba ne la.+ Kpogya mɔɔ wɔ aze la zo,+ na ka mɔɔ bɛkpogya ye zo* la aze.+
27 Ɛzɛkyelɛ, ɛzɛkyelɛ, ɛzɛkyelɛ a mebamaa yeazɛkye a. Na ɔnrɛyɛ awie biala ɛdeɛ kɔkpula kɛ ahenle mɔɔ ɔle ye ɛdeɛ la bara,+ na mebava meamaa ye.’+
28 “Na wɔmɔ sonla ra, ka ngapezo na ka kɛ, ‘Mɔɔ Tumivolɛ Awulae Gyihova ɛha ye wɔ Amɔnoma nee bɛ aholobabɔlɛ ne mɔ anwo la ɛne.’ Ka kɛ, ‘Konle dadeɛ! Bɛhwe konle dadeɛ bie kɛ bɛfa bɛahu menli; bɛhwi nwolɛ kɛ bɛfa bɛazɛkye menli na yeada kɛ ɛsɛlɛmanye.
29 Ɔnva nwo kɛ bɛbaha adalɛ ɛnyelɛzodeɛnwunlɛ nee mɛlɛbɛla abisadeɛ bɛahile wɔ la, bɛbava wɔ bɛado avunli ne mɔ azo,* amumuyɛma mɔɔ bɛ kenle ɛdwu, bɛ anzohwenlɛ mɔɔ li awieleɛ la mekɛ ɛdwu.
30 Sia fa wula ye boa ne anu. Mebabua wɔ ndɛne wɔ ɛleka mɔɔ bɛbɔle wɔ, azɛlɛ ne mɔɔ ɛvi zo la azo.
31 Mebawola me ɛya ne meagua ɛ nwo zo. Mebakpokpo me ɛyavalɛ senle ne meagua ɛ nwo zo, na meava wɔ meawula menli mɔɔ ati yɛ se na bɛze ɛzɛkyelɛ nye zo kpalɛ la asa anu.+
32 Ɛbayɛ kɛ ɛyɛne la;+ bɛbawola wɔ mogya bɛagua azɛlɛ ne azo, na bɛnrɛhakye wɔ bieko, ɔluakɛ medame Gyihova a meha a.’”
Ɔbodwɛkɛ
^ Anzɛɛ “menli.”
^ Hibulu aneɛ nu, “ɛ nze.”
^ Hibulu aneɛ nu, “aholo.”
^ Ɛhye kile, ɛzulolɛ ti bɛbabiebie bɛ nwo.
^ Ɛhye kile, Gyihova konle dadeɛ.
^ Anzɛɛ “Tumililɛ kpɔma ne ɛnrɛdɛnla.”
^ Hibulu aneɛ nu, “aholo.”
^ Hibulu aneɛ nu, “ɛsalɛ.”
^ Hibulu aneɛ nu, “tɛlafem.”
^ Ɛhye le akodeɛ mɔɔ bɛfa bɛbubu suakpole nlenkɛ mgbole nee ye bane bɛgua a.
^ Ɛhye kile, Gyɛlusalɛmma.
^ Hibulu aneɛ nu, “bɛbazɔ ɛ sa bɛahɔ.”
^ Anzɛɛ “wɔ anwuma.”
^ Hibulu aneɛ nu, “avunli ne mɔ akɔme zo.”
