Yizikeɛle 23:1-49
23 Gyihova nee me dendɛle bieko kɛ:
2 “Sonla ra, ɛnee mraalɛ nwiɔ bie wɔ ɛkɛ, bɛ mu nwiɔ bɛ mame ko.+
3 Bɛbɔle tuutuu wɔ Yigyibiti,+ ɔvi bɛ mbɛlɛra nu bɛvale bɛ nwo bɛwulale tuutuubɔlɛ nu. Bɛmiemianle bɛ nyɛfo wɔ nehane yɛɛ bɛsosɔle bɛ nyɛfo wɔ bɛ belamunliyɛlɛ mekɛ nu.
4 Bɛfɛlɛ kpanyinli ne Ɔhola,* yɛɛ bɛfɛlɛ ɔ diema raalɛ ne Ɔhɔleba.* Bɛrayɛle me ɛdeɛ na bɛwole mralɛ mrenyia nee mralɛ mraalɛ. Kɛ mɔɔ bɛ aluma ne mɔ kile la, Ɔhola a le Samɛlea,+ yɛɛ Ɔhɔleba a le Gyɛlusalɛm.
5 “Ɔhola bɔle ɔ bo kɛ ɔbɔ tuutuu+ wɔ mekɛ mɔɔ ɛnee ɔle me ɛdeɛ la. Ɔ nwo lɔle ye kulovolɛma,+ Aseleama mɔɔ bɛle ɔ gɔnwo mɔ* la.+
6 Bɛle amɛnladoma nee mgbanyinli mɔɔ bɛheda ndanlɛ buluwu—bɛ muala bɛle mgbavolɛ mɔɔ bɛ nwo yɛ fɛ na bɛdede bɛ mgbɔnwɔ zo.
7 Ɔhɔle zo ɔ nee Aselea amra mrenyia mɔɔ anwo yɛ fɛ la kɔsɔɔti bɔle tuutuu ɛbɛla,+ na ɔvale bɛdabɛ mɔɔ ɔ nwo lɔle bɛ la kyibadeɛ ananze* ne mɔ ɔguale ɔ nwo evinli.
8 Yeangyakyi ye tuutuu ne mɔɔ ɔbɔle ye wɔ Yigyibiti la, ɔluakɛ ye mbɛlɛra nu a bɛ nee ye lale a, yɛɛ bɛsosɔle ɔ nyɛfo wɔ ye belamunliyɛlɛ mekɛ nu na bɛwolale bɛ ɛhulolɛ* ne bɛguale ɔ nwo zo.+
9 Ɔti menvale ye menwulale ye kulovolɛma, Aseleama+ ne mɔɔ ɔhulole bɛ la asa anu.
10 Bɛyele ɔ nwo bɛdole zo+ na bɛhyele ɔ mra mrenyia nee ɔ mra mraalɛ bɛhɔle,+ na bɛvale konle dadeɛ bɛhunle ye. Ɔliele duma ɛtane wɔ mraalɛ ne mɔ avinli, na bɛbuale ye ndɛne.
11 “Mɔɔ ɔ diema raalɛ Ɔhɔleba nwunle ye la, ye atiakunluwɔzo ɛdeɛ ne akee bole zo, na ye tuutuubɔlɛ ne yɛle kpole dɛlale ɔ diema raalɛ ne.+
12 Ɔ nwo lɔle ɔ gɔnwo mɔ Aseleama,+ amɛnladoma nee mgbanyinli mɔɔ bɛziezie bɛ nwo ngɛnlɛma na bɛdede mgbɔnwɔ zo la—bɛ muala bɛle mgbavolɛ mɔɔ bɛ nwo yɛ fɛ.
13 Mɔɔ ɔguale ɔ nwo evinli la, menwunle kɛ bɛ mu nwiɔ bɛlua adenle ko ne ala azo.+
14 Noko ye tuutuu ɛbɛla ne hɔle zo yɛle kpole. Ɔnwunle kɛ bɛdɔlɔdɔlɔ mrenyia wɔ bane ne anwo, Kaledeama ananze mɔɔ bɛva ayile kɔkɔlɛ bɛdɔlɔ,
15 bɛlɛte hye bɛ nze zo, bɛbɔ abotile ndendenle, na bɛzɔho kovolɛma, bɛ muala bɛgyi ɛkɛ ne bɛmaa Babeloniama mɔɔ bɛwole bɛ wɔ Kaledeama azɛlɛ zo la.
16 Mɔɔ ɔnwunle bɛ ala la, ɔbɔle ɔ bo ɔnyianle bɛ nwo atiakunluwɔzo, na ɔzoanle ɛbɔfoɔ wɔ bɛ nwo lɔ wɔ Kaledea.+
17 Ɔti Babelɔnoma hɔle zo rale ye ɛkpa ne mɔɔ bɛ nee ye da zolɛ la azo, na bɛvale bɛ ɛhulolɛ* ne bɛguale ɔ nwo evinli. Mɔɔ bɛguale ɔ nwo evinli bɛwiele la, ɔhwenle ɔ nwo ɔvile* bɛ nwo ɔluakɛ bɛ nwo vonlonle ye.
18 “Mekɛ mɔɔ yeanze nyiane na ɔvale ɔ nwo ɔwulale tuutuubɔlɛ nu na ɔyele ɔ nwo ɔdole zolɛ la,+ mengyile ye na mendwenle me nwo menvile ɔ nwo kɛ mɔɔ mengyile* ɔ diema raalɛ ne na mendwenle me nwo menvile ɔ nwo la.+
19 Na ɔhɔle zo ɔmaanle ye tuutuubɔlɛ ne yɛle kpole,+ ɔhakyele mekɛ mɔɔ ɔbɔle tuutuu wɔ Yigyibiti azɛlɛ zo wɔ ye mbɛlɛra nu la.+
20 Ɔnyianle bɛ nwo atiakunluwɔzo ɛtane kɛ mraalɛ mɔɔ bɛ nwewe* mrenyianu le mgbole kɛ asoaso ɛdeɛ ne na bɛ awodeɛ le kɛ ɛkpɔnwɔ ɛdeɛ ne la.
21 Ɛ nwo lɔle anyiemgba ɛbɛla ne mɔɔ ɛbɔle ye wɔ wɔ mbɛlɛra nu wɔ Yigyibiti,+ mekɛ mɔɔ bɛsosɔle wɔ mbɛlɛra nu nyɛfonlɛ ne la.+
22 “Ɛhye ati, Ɔhɔleba, mɔɔ Tumivolɛ Awulae Gyihova ɛha la ɛne: ‘Nea memaa wɔ kulovolɛma+ mɔɔ bɛ nwo vonlonle wɔ la ati ɛhwenle ɛ nwo ɛvile bɛ nwo* la ara ɛ nwo zo, na mebava bɛ meavi ɛleka biala meara ɛ nwo zo,+
23 Babelɔnoma+ nee Kaledeama+ amuala, Pikɔdoma+ nee Hyowama nee Kowama yɛɛ Aseleama amuala. Bɛ muala bɛle mgbavolɛ mɔɔ bɛ nwo yɛ fɛ, amɛnladoma nee mgbanyima, kovolɛma nee menli mɔɔ bɛkpa nu bɛye bɛ,* mɔɔ bɛ muala bɛdede mgbɔnwɔ zo la.
24 Bɛbava konle ehwili nee ehwili dɔɔnwo yɛɛ sogyama dɔɔnwo mɔɔ bɛdedɛ enyinlike mgbole nee enyinlike ngyikyi na bɛzo mbulalɛ ahyɛlɛ la bɛara ɛ nwo zo. Bɛbabɛnga wɔ bɛayia, na mebamaa bɛ adenle meamaa bɛabua wɔ ndɛne, na bɛbabua wɔ ndɛne kɛ mɔɔ bɛdabɛ bɛnea a ɔle kpalɛ la.+
25 Mebava ɛ nwo ɛya kpole, na bɛ nee wɔ bɛali ye ɛya zo. Bɛbapepɛ ɛ bonyi nee ɛ nzo, na bɛ nuhua ne mɔ mɔɔ kɛha la bawu konle dadeɛ nloa. Bɛbava ɛ mra mrenyia nee ɛ mra mraalɛ bɛahɔ, na bɛdabɛ mɔɔ bɛbaha la, senle bayela bɛ.+
26 Bɛbayeye ɛ nwo ndanlɛ+ na bɛalie wɔ agudeɛ* ngɛnlɛma ne mɔ.+
27 Mebamaa wɔ anyiemgba ɛbɛla ne nee wɔ tuutuubɔlɛ+ ne mɔɔ ɛbɔle ɔ bo wɔ Yigyibiti azɛlɛ zo+ la ara awieleɛ. Ɛbagyakyi bɛ ɛnleanlɛ, yɛɛ ɛnrɛhakye Yigyibiti bieko.’
28 “Ɔluakɛ mɔɔ Tumivolɛ Awulae Gyihova ɛha la ɛne: ‘Nea mebava wɔ meawula menli mɔɔ ɛkpɔ bɛ, menli mɔɔ ɛhyile bɛ na ɛhwenle ɛ nwo ɛvile bɛ nwo* la asa anu.+
29 Bɛ nee wɔ bɛali ye ɛkpɔlɛ nu na bɛava ninyɛne mɔɔ wɔvɛ wɔkpondɛ la+ na bɛamaa wɔaye ɛ nwo wɔado zo na wɔalɛ ɛ nwo zɔ. Wɔ adwɔmane ɛbɛla ne mɔɔ yemaa ɛ nwo ɛla zolɛ la nee wɔ anyiemgba ɛbɛla ne yɛɛ wɔ tuutuubɔlɛ ne bala ali.+
30 Bɛbava ninyɛne ɛhye mɔ bɛayɛ wɔ ɔluakɛ ɛnriandile ɛdoale maanle maanle ne mɔ kɛ tuutuunli,+ ɔboalekɛ ɛvale bɛ kyibadeɛ ananze ne mɔ ɛguale ɛ nwo evinli.+
31 Mɔɔ ɛ diema raalɛ ne yɛle la bie ala a wɔyɛ la,+ na mebava ye kanrɛlɛ ne meawula ɛ sa nu.’+
32 “Mɔɔ Tumivolɛ Awulae Gyihova ɛha la ɛne:
‘Ɛbanlo ɛ diema raalɛ ne kanrɛlɛ kpole ne mɔɔ ɔ kunlu kɔ la anu,+Na ɛbayɛ ɛzelekɛ nee agolobɛnwo debie, mɔɔ bɛ dɔɔnwo wɔ kanrɛlɛ ne anu la.+
33 Nzabolɛ nee nyanelilɛ babo ɛ nwo zo,*Kanrɛlɛ mɔɔ ɛzulolɛ nee ɛzɛkyelɛ wɔ nu,Ɛ diema raalɛ, Samɛlea kanrɛlɛ ne.
34 Ɛbanlo wɔadu ɔ bo+ na wɔakposa kanrɛlɛ ne mɔɔ ɛbɔ la azinli neNa akee wɔatete ɛ nyɛfo.
“Ɔluakɛ medame mumua ne a medendɛ a,” Tumivolɛ Awulae Gyihova a se a.’
35 “Ɛhye ati mɔɔ Tumivolɛ Awulae Gyihova ɛha la ɛne: ‘Kɛmɔ ɛ rɛle ɛvi me na wɔambu me fee* la ati,+ ɛbanwu wɔ anyiemgba ɛbɛla ne nee wɔ tuutuu ɛbɛla ne anwo amaneɛ.’”
36 Akee Gyihova zele me kɛ: “Sonla ra, ɛbaha ndɛnebualɛ edwɛkɛ wɔahile Ɔhola nee Ɔhɔleba+ na wɔaha bɛ kyibadeɛ nyɛleɛ ne anwo edwɛkɛ wɔahile bɛ ɔ?
37 Bɛzɛkye agyalɛ*+ yɛɛ mogya wɔ bɛ sa anwo. Tɛ bɛ kyibadeɛ ananze ne mɔ ala a bɛva bɛzɛkye agyalɛ a, emomu eza bɛmaanle bɛ mra mɔɔ bɛwole bɛ bɛmaanle me la vale senle nu bɛvale bɛyɛle aleɛ bɛmaanle bɛ awozonle ne mɔ.+
38 Eza debie bieko mɔɔ bɛvale bɛyɛle me la ɛne: Bɛguale me ɛzonlenlɛsua ne anwo evinli wɔ kenle ko zɔhane, yɛɛ bɛguale me ɛnwomenlelielɛ kenle ne mɔ noko anwo evinli.
39 Mɔɔ bɛhunle bɛ mra bɛbɔle afɔle bɛmaanle bɛ kyibadeɛ ananze ne mɔ+ bɛwiele la, bɛrale me ɛzonlenlɛsua ne anu kenle ko ne ala bɛraguale nwolɛ evinli.+ Ɛhye a bɛyɛle ye wɔ medame mumua ne me sua ne anu a.
40 Bɛzoanle ɛbɔfoɔ bɔbɔ bɛmaanle bɛhɔvale mrenyia bɛvile moamoa bɛrale.+ Mɔɔ bɛlɛba la, ɛbiale ɛ nwo na ɛdole ɛ nye anzi na ɛvale anwoneɛ ɛzieziele ɛ nwo.+
41 Na ɛdɛnlanle ɛkpa* kɛnlɛma zo+ na ɛvale ɛkponle ɛziele ɛ nyunlu ɛkɛ,+ na ɛvale me ayilevuanlɛ+ nee me nwole ɛzieziele zo.+
42 Bɛdele mrenyia dɔɔnwo mɔɔ ɛhwee ɛnvale bɛ nwo, mɔɔ bɛ nuhua bie mɔ le nzabovoma mɔɔ bɛ nee bɛ vi fienemgbole ne anu rale la ane wɔ ɛkɛ. Bɛvale bɛ sa akɔme nu ngɛba bɛguale mraalɛ ne mɔ asa na bɛvale abotile ngɛnlɛma bɛzoale bɛ.
43 “Akee menganle ye wɔ ɔdaye mɔɔ agyalɛzɛkyelɛ ɛmaa yetuto la anwo kɛ: ‘Kɛkala ɔbahɔ zo yeabɔ ye tuutuu ne.’
44 Ɔti bɛhɔle ɔ nwo ɛkɛ ne dahuu kɛ mɔɔ awie kɔ tuutuunli anwo ɛkɛ ne la. Kɛ bɛhɔle Ɔhola nee Ɔhɔleba, mraalɛ mɔɔ bɔ anyiemgba ɛbɛla la ɛkɛ ne la ɛne.
45 Noko mrenyia mɔɔ le tenlenema la babua ye agyalɛzɛkyelɛ+ ne nee mogya mɔɔ ɔka ɔgua la anwo ndɛne mɔɔ fɛta;+ ɔluakɛ bɛle agyalɛzɛkyelɛma, yɛɛ mogya wɔ bɛ sa anwo.+
46 “Mɔɔ Tumivolɛ Awulae Gyihova ɛha la ɛne: ‘Bɛbamaa ɛlɔnema ara bɛ nwo zo na bɛamaa bɛayɛ debie ɛzulolɛ nee ninyɛne mɔɔ bɛfe.+
47 Ɛlɔnema ne bakpa bɛ awolɛ+ na bɛava bɛ konle dadeɛ ne mɔ bɛapɛ bɛ bɛagua. Bɛbahu bɛ mra mrenyia nee bɛ mra mraalɛ+ na bɛava senle bɛayela bɛ azua.+
48 Mebamaa anyiemgba ɛbɛla mɔɔ wɔ azɛlɛ ne azo la ara awieleɛ, na mraalɛ ne mɔ amuala azukoa debie avi nu na bɛanzukoa bɛ anyiemgba ɛbɛla ne.+
49 Bɛbamaa bɛanwu bɛ anyiemgba ɛbɛla ne nee ɛtane mɔɔ bɛ nee kyibadeɛ ananze ne mɔ ɛyɛ la anwo amaneɛ; na bɛbanwu kɛ medame a mele Tumivolɛ Awulae Gyihova a.’”+
Ɔbodwɛkɛ
^ Ɔ bo kile “Ye Ɛdanlɛsua.”
^ Ɔ bo kile “Me Ɛdanlɛsua Ne Wɔ Ye Nu.”
^ Anzɛɛ “bɛbikye ye.”
^ Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
^ Anzɛɛ “adwɔmanebɔlɛ.”
^ Anzɛɛ “adwɔmanebɔlɛ.”
^ Anzɛɛ “ye ɛkɛla hwenle ɔ nwo vile.”
^ Anzɛɛ “me ɛkɛla hyile.”
^ Anzɛɛ “wɔ ɛkɛla hwenle ɔ nwo vile bɛ nwo.”
^ Hibulu aneɛ nu, “bɛdo ɛsalɛ bɛvɛlɛ bɛ.”
^ Anzɛɛ “anwoneɛ.”
^ Anzɛɛ “wɔ ɛkɛla hwenle ɔ nwo vile bɛ nwo.”
^ Hibulu aneɛ nu, “bayi wɔ tɛkɛɛ.”
^ Hibulu aneɛ nu, “wɔye me wɔdo ɛ nzi.”
^ Ɛhye kile, sunsum nu agyalɛzɛkyelɛ.
^ Anzɛɛ “ebia mɔɔ bɛkola bɛda nu la.”
