Yizikeɛle 24:1-27
24 Gyihova nee me dendɛle bieko wɔ ɛvolɛ ne mɔɔ tɔ zolɛ ngɔnla, ye siane bulu ne kenle mɔɔ tɔ zolɛ bulu la azo kɛ:
2 “Sonla ra, kɛlɛ kenle ɛhye* to ɛkɛ, ɛnɛ kenle ye ala. Babelɔn belemgbunli ne ɛbɔ ye Gyɛlusalɛm ɛtetalɛ ne abo ɛnɛ kenle ko ye ala.+
3 Akee bu ɛrɛlɛ* mɔɔ fale atuadelɛ menli ne anwo la na ka ye wɔ bɛ nwo kɛ:
“‘Mɔɔ Tumivolɛ Awulae Gyihova ɛha la ɛne:
“Fa danesɛne* ne sie zo; fa sie senle ne azo na gua nzule nu.+
4 Fa nane azinli gua nu,+ sinli kpalɛ biala,Ye ɛzɔlɛ nee ye awane; fa mbowule kpalɛ ne mɔ noko gua nu.
5 Fa boane mɔɔ le kɛnlɛma kpalɛ la,+ na kuohua ɛyɛne wɔ danesɛne ne abo amuala.
To nane azinli ne nee mbowule ne mɔɔ wɔ nu la.”’
6 “Ɛhye ati mɔɔ Tumivolɛ Awulae Gyihova ɛha la ɛne:
‘Suakpole mɔɔ ka mogya gua,+ danesɛne mɔɔ ɛlɔ nrɛnlana, mɔɔ bɛtɛkpokpole ye nrɛnlana ne la, gyakɔ!
Ye nane azinli ne mɔ ngoko fi danesɛne ne anu;+ mmagua bɛ ti ma.*
7 Ɔluakɛ ye mogya ne wɔ nu;+ ɔwolale ɔguale bodane mɔɔ ɛhwee ɛnle zo la azo.
Yeanwola yeangua azɛlɛ nwo yeanva ndɛtɛlɛ yeangeda zolɛ.+
8 Amaa yeaha me ɛya na meali ye nzenralɛ la,Meva ye mogya ne megua bodane mɔɔ ɛhwee ɛnle zo na zolɛ ta la azo,Amaa bɛangeda zolɛ.’+
9 “Ɛhye ati mɔɔ Tumivolɛ Awulae Gyihova ɛha la ɛne:
‘Suakpole ne mɔɔ ka mogya gua la, gyakɔ!+
Mebahuohua ɛyɛne ne meamaa yeahɔ anwuma.
10 Kuohua ɛyɛne ne anloa na sɔ senle ne,To nane ne maa ɔbe kpalɛ, wola nwolɛ nzule ne, na maa mbowule ne mɔ ɛyela.
11 Fa danesɛne ne mɔɔ ɛhwee ɛnle nu la sie samɛnlakɛ ne azo maa ɔlɔAmaa ye kɔbele ne alɔ ayɛ kɔkɔlɛ woonwu.
Ye evinli ne baholo wɔ nu,+ na ye nrɛnlana ne ayela.
12 Ɔle ngyegyelɛ nee ɛvɛlɛ mgbane,Ɔluakɛ nrɛnlana kpole ne ɛnrɛvi nwolɛ.+
Fuandi ye nee ye nrɛnlana ne amuala to senle ne anu!’
13 “‘Wɔ anyiemgba ɛbɛla ne a ɛgua ɛ nwo evinli a.+ Membɔle mɔdenle kɛ memaa ɛ nwo ade, noko ɛ nwo ande anvi wɔ evinli nyɛleɛ ne anwo. Ɛ nwo ɛnrɛde kɔkpula kɛ ɛ nwo ɛya kpole mɔɔ meva la baha aze.+
14 Medame mumua ne, Gyihova a medendɛ a. Ɔbayɛ zɔ noko. Mebayɛ nwolɛ debie mɔɔ menrɛgyinlegyinla nwolɛ, menrɛze anwunvɔne, menrɛnlu me nwo.+ Bɛbabua wɔ ndɛne kɛ mɔɔ wɔ ndenle nee wɔ nyɛleɛ ne mɔ de la,’ Tumivolɛ Awulae Gyihova a se a.”
15 Na Gyihova nee me dendɛle bieko kɛ:
16 “Sonla ra, mebava tɛka* kokye meaye wɔ kulovolɛ ne meavi ɛ nwo ɛkɛ.+ Ɔnle kɛ ɛdi nyane;* anzɛɛ ɛsu anzɛɛ ɛmaa monle gua wɔ.
17 Di nyane ne wɔ ɛ kunlu, na mmabu mowuamra anwo nyanelilɛ amaamuo biala.+ Fa wɔ abotile ne bɔ ɛ ti+ na wula wɔ mgbɔlaboa ne.+ Mmakeda ɛ nloa azo enrinli ne azo,+ yɛɛ mmadi paano mɔɔ awie mɔ* bava arɛlɛ wɔ la.”+
18 Ɔti me nee menli ne dendɛle nwonlomɔ, na ye nɔsolɛ nu me ye wule. Yemɔti ye nwonlomɔ ne, menyɛle mɔɔ bɛhanle bɛhilele me la.
19 Menli ne bizale me kɛ: “Ɛnrɛha kɛzi ninyɛne ɛhye mɔ mɔɔ ɛlɛyɛ la fale yɛ nwo la ɛnrɛhile yɛ ɔ?”
20 Membuale bɛ kɛ: “Gyihova nee me ɛdendɛ kɛ,
21 ‘Ka kile Yizilayɛma kɛ: “Mɔɔ Tumivolɛ Awulae Gyihova ɛha la ɛne, ‘Melɛba mearagua me ɛzonlenlɛsua ne,+ ɛleka mɔɔ bɛfa bɛmemaa bɛ nwo zo kpole, deɛ ne mɔɔ la bɛ ahonle nwo* la anwo evinli. Bɛ mra mrenyia nee bɛ mra mraalɛ mɔɔ bɛgyakyile bɛ bɛ nzi la bawu konle dadeɛ nloa.+
22 Akee ɔwɔ kɛ bɛyɛ mɔɔ meyɛ la bie pɛpɛɛpɛ. Bɛnrɛheda bɛ nloa azo enrinli ne azo, yɛɛ bɛnrɛli paano mɔɔ awie mɔ bava arɛlɛ bɛ la.+
23 Bɛbabobɔ bɛ abotile ne mɔ na bɛawula bɛ mgbɔlaboa ne. Bɛnrɛli nyane anzɛɛ bɛnrɛzu. Emomu, bɛbakpɔlɔ wɔ bɛ nvonleɛ ne mɔ anu+ na bɛakponle bɛahile bɛ nwo ngoko.
24 Yizikeɛle le sɛkɛlɛneɛ maa bɛ.+ Bɛbayɛ mɔɔ yeyɛ la bie. Saa ɔsi a, bɛbanwu kɛ medame a mele Tumivolɛ Awulae Gyihova a.’”’”
25 “Na wɔmɔ sonla ra, kenle mɔɔ mebaye bɛ ɛvealeka ne meavi bɛ nwo—debie kɛnlɛma mɔɔ maa bɛ nye die, debie mɔɔ sonle bolɛ maa bɛ, mɔɔ bɛ ahonle* kulo—nee bɛ mra mrenyia nee bɛ mra mraalɛ meavi ɛkɛ ne la,+
26 awie mɔɔ banyia adenle anriandi la a baraha ahile wɔ a.+
27 Kenle zɔhane, ɛbabuke ɛ nloa na wɔadendɛ wɔahile ahenle mɔɔ ɛnriandi la, na ɛnrɛdɔ mumule bieko.+ Ɛbayɛ sɛkɛlɛneɛ wɔamaa bɛ, na bɛbanwu kɛ medame a mele Gyihova a.”
Ɔbodwɛkɛ
^ Hibulu aneɛ nu, “kenle ne duma.”
^ Anzɛɛ “yɛ ndonwo.”
^ Anzɛɛ “danesɛne anloa kpole.”
^ Nea Edwɛkɛbohilelɛ.
^ Anzɛɛ “kɛlɛ.”
^ Anzɛɛ “Ɔnle kɛ ɛbila ɛ kɛnra azo.”
^ Hibulu aneɛ nu, “mrenyia.”
^ Anzɛɛ “bɛ ɛkɛla akunlu yelɛyela ye wɔ nwo.”
^ Anzɛɛ “ɛkɛla.”
