Yizikeɛle 25:1-17
25 Gyihova nee me dendɛle bieko kɛ:
2 “Sonla ra, kakyi ɛ nye wɔ Amɔnoma anwo lɔ,+ na ka ngapezo tia bɛ.+
3 Ka kile Amɔnoma kɛ, ‘Bɛdie Tumivolɛ Awulae Gyihova edwɛkɛ. Mɔɔ Tumivolɛ Awulae Gyihova ɛha la ɛne: “Kɛmɔ bɛhanle kɛ ‘Nnhee!’ wɔ mekɛ mɔɔ bɛguale me ɛzonlenlɛsua ne anwo evinli, yɛɛ mekɛ mɔɔ Yizilayɛ azɛlɛ ne dɔle mgbane nee mekɛ mɔɔ Dwudama hɔle akɛlɛzonlenlɛ nu la ati,
4 mebava bɛ meamaa menli mɔɔ wɔ Aduduleɛ la kɛ bɛ agyapadeɛ. Bɛbayɛ bɛ azokoɛleɛ* wɔ bɛ avinli na bɛasisi bɛ ndanlɛ azua wɔ bɛ avinli. Bɛbali bɛ ma na bɛanlo bɛ meleke.
5 Mebamaa Relaba+ ayɛ afunlumu adidileka, na Amɔnoma azɛlɛ ne ayɛ ɛleka mɔɔ mboane da die bɛ menle a; na bɛbanwu kɛ medame a mele Gyihova a.”’”
6 “Ɔluakɛ mɔɔ Tumivolɛ Awulae Gyihova ɛha la ɛne: ‘Kɛmɔ bɛbɔle bɛ sa nu+ na bɛsisile bɛ gyakɛ aze na bɛlile fɛlɛko* wɔ Yizilayɛ azɛlɛ ne anwo na bɛgolole bɛ nwo la ati,+
7 mebadende me sa meatia bɛ na meava bɛ meamaa maanle maanle ne mɔ meamaa bɛave. Mebapɛ bɛ meavi menli ne avinli na meazɛkye bɛ meavi azɛlɛ ne azo.+ Mebabɔ bɛ bo zo, na bɛbanwu kɛ medame a mele Gyihova a.’
8 “Mɔɔ Tumivolɛ Awulae Gyihova ɛha la ɛne: ‘Kɛmɔ Mowabe+ nee Siyɛ+ ɛha kɛ, “Bɛnlea! Dwudama le kɛ maanle maanle mɔɔ ɛha la amuala” la ati,
9 memaa bɛateta azuamgbole mɔɔ wɔ Mowabe ɛweɛne zo* la, ye azɛlɛ kɛnlɛma ne, Bɛte-gyɛhyemɔto, Beeyale-miyɔn too bɛahɔdwu Keleateeyem.+
10 Mebava ye meaboka Amɔnoma anwo meamaa menli mɔɔ wɔ Aduduleɛ la kɛ bɛ agyapadeɛ,+ amaa bɛangakye Amɔnoma bieko wɔ maanle maanle ne mɔ anu.+
11 Na mebabua ndɛne wɔ Mowabe,+ na bɛbanwu kɛ medame a mele Gyihova a.’
12 “Mɔɔ Tumivolɛ Awulae Gyihova ɛha la ɛne: ‘Yidɔm lile Dwudama nzenralɛ, na yeli fɔlɛ kpole kɛ ɔlile bɛ nzenralɛ la;+
13 ɛhye ati mɔɔ Tumivolɛ Awulae Gyihova ɛha la ɛne: “Mebadende me sa meatia Yidɔm noko na meapɛ menli nee nyɛmoa meavi zolɛ, na meamaa yeadɔ mgbane.+ Ɔvi Timan mɔɔ kɔdwu Didan la, bɛbawu konle dadeɛ nloa.+
14 ‘Mebalua me menli Yizilayɛma anwo zo meali Yidɔm nzenralɛ.+ Bɛbava me ɛya nee me ɛya kpole ne bɛara Yidɔm anwo zo amaa bɛanwu kɛzi medame mumua ne me nzenralɛlilɛ ne de la,’+ Tumivolɛ Awulae Gyihova a se a.”’
15 “Mɔɔ Tumivolɛ Awulae Gyihova ɛha la ɛne: ‘Kɛmɔ Filisitiama ati yɛ se kpalɛ la ati, bɛkpɔ bɛ dahuu na bɛkulo* kɛ bɛdi bɛ nzenralɛ na bɛsɛkye bɛ.+
16 Ɛhye ati mɔɔ Tumivolɛ Awulae Gyihova ɛha la ɛne: “Nea melɛtende me sa wɔ Filisitiama anwo zo,+ na mebapɛ Kɛlɛtema meavi ɛkɛ+ na meazɛkye menli mɔɔ ɛha mɔɔ bɛde nyevile ne anloa la.+
17 Mebava ɛya meahwe bɛ nzo na meali bɛ nzenralɛ kpole kpalɛ, na saa mefa me nzenralɛlilɛ ne meba bɛ nwo zo a, bɛbanwu kɛ medame a mele Gyihova a.”’”
Ɔbodwɛkɛ
^ Anzɛɛ “azokoɛleɛ mɔɔ bɛdo nwolɛ bane la.”
^ Anzɛɛ “bɛ ɛkɛla lile fɛlɛko.”
^ Anzɛɛ “ye ndololeɛ nu.”
^ Anzɛɛ “bɛgolo bɛ ɛkɛla nwo.”
