Yizikeɛle 26:1-21
26 Wɔ ɛvolɛ mɔɔ tɔ zolɛ 11, kenle mɔɔ limoa wɔ siane ne anu la, Gyihova nee me dendɛle kɛ:
2 “Sonla ra, kɛmɔ Taya ɛha Gyɛlusalɛm anwo edwɛkɛ kɛ,+ ‘Nnhee! Bɛbubu menli ne anlenkɛ kpole ne!+ Debie biala bayɛ me ɛdeɛ, na kɛkala mɔɔ bɛzɛkye ye la, mebayɛ sukoavolɛ’ la ati;
3 mɔɔ Tumivolɛ Awulae Gyihova ɛha la ɛne: ‘O Taya, nea meyɛ wɔ kpɔvolɛ, na mebamaa maanle maanle dɔɔnwo adwazo atia wɔ, kɛ mɔɔ nyevile bu azɛlɛkye la.
4 Bɛbazɛkye Taya bane ne mɔ na bɛabubu ye tawa ne mɔ bɛagua aze,+ na mebakpokpo ɛnwea ne na meamaa yeayɛ bodane mɔɔ ɛhwee ɛnle zo na ɔta a.
5 Ɔbayɛ ɛleka mɔɔ bɛrɛlɛ avonle wɔ nyevile ne avinli.’+
“‘Ɔluakɛ medame mumua ne a medendɛ a,’ Tumivolɛ Awulae Gyihova a se a, ‘na maanle maanle ne mɔ bave zolɛ ninyɛne.
6 Na bɛbava konle dadeɛ bɛahu azua mɔɔ zuozua ye la azo menli,* na menli banwu kɛ medame a mele Gyihova a.’
7 “Ɔluakɛ mɔɔ Tumivolɛ Awulae Gyihova ɛha la ɛne: ‘Nea mebamaa Babelɔn Belemgbunli Nɛbukadenɛza avi sɔlɔ adwazo atia Taya;+ ɔle arelemgbunli nu belemgbunli,+ ɔlɛ mgbɔnwɔ,+ konle ehwili,+ mgbɔnwɔkavoma nee sogyama* dɔɔnwo.
8 Ɔbava konle dadeɛ yeazɛkye azua mɔɔ zuozua wɔ la, na yealie bane yeabɛnga wɔ yeayia na yeahuohua ɛnwea* yeabɛnga wɔ yeayia na yeamaa enyinlike kpole zo yeatia wɔ.
9 Ɔbava ye konle milahyinli* ne yeasisi wɔ bane ne mɔ, na yeava ye akuma* ne mɔ yeabubu wɔ tawa ne mɔ yeagua.
10 Ye mgbɔnwɔ ne mɔ anwo bazo kpalɛ la ati bɛbamaa munlutu aheda ɛ nwo zo, na mgbɔnwɔkavoma nee konle ehwili ne mɔ agyakɛ abo dede ne bamaa wɔ bane ne mɔ akpusu wɔ mekɛ mɔɔ ɔkɛwolo wɔ nlenkɛ mgbole ne mɔ anu, kɛ menli dɔɔnwo mɔɔ ɛlɛwolo suakpole mɔɔ ye bane ne mɔ ɛbubu la anu la.
11 Ye mgbɔnwɔ ne mɔ bava bɛ gyakɛ atietia wɔ awɔdenle ne mɔ kɔsɔɔti azo;+ ɔbava konle dadeɛ yeahu wɔ menli ne amuala, na wɔ mpila mgbole ne mɔ abubu agua aze.
12 Bɛbawua wɔ anwonyia, bɛave wɔ gualilɛ ninyɛne,+ bɛabubu wɔ bane ne mɔ bɛagua, na bɛaha wɔ azua ngɛnlɛma ne mɔ bɛagua aze; akee bɛbavuandi wɔ awolɛ ne mɔ nee mbaka nee wɔ ɛnwea bɛagua azule ne anu.’
13 “‘Mebamaa wɔ edwɛne ne mɔ dede ne ara awieleɛ, yɛɛ bɛnrɛde wɔ haape ne mɔ ane bieko.+
14 Na mebamaa wɔayɛ bodane mɔɔ ɛhwee ɛnle zo na ɔta la, na wɔayɛ ɛleka mɔɔ bɛrɛlɛ avonle a.+ Bɛnrɛkyekye wɔ bieko, ɔluakɛ medame Gyihova a medendɛ a,’ Tumivolɛ Awulae Gyihova a se a.
15 “Mɔɔ Tumivolɛ Awulae Gyihova ɛha ɛhile Taya la ɛne: ‘Saa bɛte wɔ azedɔlɛ ne ane, wɔ mekɛ mɔɔ menli mɔɔ ɛlɛwu la* ɛlɛdi nyane, na bɛlɛku menli wɔ wɔ avinli a, asoo mbɔra ne mɔ anwo ɛnrɛwoso bɛ?+
16 Tumivolɛma* kɔsɔɔti mɔɔ wɔ nyevile zo la bavi bɛ arelemgbunli mbia zo adwu aze na bɛayeye bɛ adɛladeɛ ndendenle ne mɔ* nee bɛ adɛladeɛ mɔɔ bɛnwo nu la, na anwowosolɛ baha bɛ.* Bɛbadɛnlɛdɛnla azɛlɛ nwo na bɛ nwo awoso bɛ dahuu na bɛanlea wɔ wɔ azibɛnwo nu.+
17 Na bɛbado ɛ nwo awolɛyelɛ edwɛne*+ na bɛaha bɛahile wɔ kɛ:
“Nea kɛzi ɛ bo zo ɛbɔ a,+ wɔmɔ mɔɔ menli vi nyevile ne mɔ azo radɛnlanle wɔ ɛkɛ, suakpole mɔɔ bɛyele wɔ ayɛlɛ a;Ɛnee ɛ nee menli mɔɔ de zo la le katakyiema wɔ nyevile zo,+Bɛmaanle ɛzulolɛ hanle menli mɔɔ de azɛlɛ ne azo la amuala!
18 Mbɔra ne mɔ anwo bawoso bɛ wɔ kenle mɔɔ ɛbadɔ aze la,Saa ɛ bo zo minli a, ɔbagyegye mbɔra mɔɔ wɔ nyevile nu la.”’+
19 “Ɔluakɛ mɔɔ Tumivolɛ Awulae Gyihova ɛha la ɛne: ‘Saa mebɔ ɛ bo zo kɛ azuamgbole mɔɔ awie biala ɛnde zolɛ, na memaa nzule mɔɔ ɛlɛtu la bu fa ɛ nwo zo na azule mgbole keda ɛ nwo zo a,+
20 mebava ɛdawɔ nee menli mɔɔ ɛlɛkɔ kuma* ne anu la meahɔboka tete amra ne mɔ anwo; mebamaa wɔadɛnla ɛleka mɔɔ wɔ aze kpalɛ la, kɛ tete ɛleka ne mɔ mɔɔ dɔle mgbane la, ɛ nee menli mɔɔ ɛlɛkɔ kuma ne anu la,+ amaa awie andɛnla wɔ ɛkɛ. Akee mebawula teasema azɛlɛ ne anyunlunyia.*
21 “‘Mebamaa ɛzulolɛ aha wɔ arɛlevilɛ nu, na ɛ bo zo baminli.+ Bɛbakpondɛ wɔ, noko bɛnrɛnwu wɔ bieko ɛlɛ,’ Tumivolɛ Awulae Gyihova a se a.”
Ɔbodwɛkɛ
^ Hibulu aneɛ nu, “ɔ mra mraalɛ.”
^ Hibulu aneɛ nu, “menli.”
^ Anzɛɛ “awolɛ.”
^ Ɛhye le akodeɛ mɔɔ bɛfa bɛbubu suakpole nlenkɛ mgbole nee ye bane bɛgua a.
^ Anzɛɛ “konle dadeɛ.”
^ Hibulu aneɛ nu, “avunli ne mɔ.”
^ Anzɛɛ “Mgbanyima.”
^ Anzɛɛ “bɛ adɛladeɛ mɔɔ ɛnlɛ bɛ sa.”
^ Hibulu aneɛ nu, “bɛbaheda anwowosolɛ.”
^ Anzɛɛ “nyanelilɛ edwɛne.”
^ Anzɛɛ “nla.”
^ Anzɛɛ “meaziezie ye kɛnlɛma.”
