Yizikeɛle 29:1-21
29 Wɔ ɛvolɛ mɔɔ tɔ zolɛ bulu, ye siane bulu ne kenle mɔɔ tɔ zolɛ 12 la azo, Gyihova nee me dendɛle kɛ:
2 “Sonla ra, kakyi ɛ nye wɔ Yigyibiti Belemgbunli Falo anwo na ka ngapezo tia ye nee Yigyibiti kɔsɔɔti.+
3 Ka edwɛkɛ ɛhye kile ye kɛ: ‘Mɔɔ Tumivolɛ Awulae Gyihova ɛha la ɛne:
“Nea meyɛ wɔ kpɔvolɛ, Yigyibiti Belemgbunli Falo,+Nyevile nu nane kpole mɔɔ la ye Naele* azudenle ne mɔ anu,+Mɔɔ yeha kɛ, ‘Azule Naele ne le me ɛdeɛ.
Menyɛle memaanle me nwo.’+
4 Noko mebava koba measosɔ wɔ awudwelɛ ne mɔ anu na meamaa wɔ Naele ne anu fɛlɛ abetɛbeta ɛ nwo abonle ne anu.
Mebaye wɔ meavi Naele ne anu na meaye fɛlɛ mɔɔ wɔ Naele ne anu mɔɔ betɛbeta ɛ nwo abonle ne anu la amuala.
5 Mebagyakyi wɔ wɔ ɛsɛlɛ ne azo, ɛ nee wɔ Naele ne anu fɛlɛ ne amuala.
Bɛbagua azɛlɛ ne azo, na bɛnrɛboɔboa bɛ nloa anzɛɛ bɛnrɛsesa bɛ.+
Mebamaa bɛayɛ aleɛ bɛamaa azɛlɛ ne azo nane anwo ɛzulolɛ nee anwomanyunlu nloma.+
6 Akee menli mɔɔ de Yigyibiti la amuala banwu kɛ medame a mele Gyihova a,Ɔluakɛ bɛanyɛ moalɛ biala bɛammaa Yizilayɛma, emomu bɛyɛle kɛ ndɔ* sinli la.+
7 Mɔɔ bɛzɔle ɛ sa la, ɛbubule,Na ɛmaanle bɛ bati kpolokpolole.
Mɔɔ bɛdudule bɛhisale wɔ la, ɛbule,Na ɛmaanle bɛ gyakɛ* wosole.”+
8 “‘Ɛhye ati mɔɔ Tumivolɛ Awulae Gyihova ɛha la ɛne: “Nea mebava konle dadeɛ meara ɛ nwo zo,+ na meapɛ menli nee nane kɔsɔɔti meavi ɛkɛ.
9 Yigyibiti azɛlɛ ne bayɛ ɛleka mɔɔ ɛdɔ mgbane na yezɛkye;+ na bɛbanwu kɛ medame a mele Gyihova a, ɔluakɛ wɔha* kɛ, ‘Azule Naele ne le me ɛdeɛ; Medame a menyɛle a.’+
10 Ɔti meyɛ wɔ kpɔvolɛ yɛɛ meyɛ wɔ Naele ne noko kpɔvolɛ, na mebamaa Yigyibiti azɛlɛ ne azɛkye na zolɛ awe,+ ɔbadɔ mgbane, ɔvi Megedɔlo+ kɔdwu Saeyini+ too yeahɔdwu Yiteyopea ɛweɛne zo.
11 Sonla anzɛɛ nane biala agyakɛ ba ɛnrɛtia zolɛ,+ yɛɛ bɛnrɛdɛnla zolɛ too ɛvolɛ 40.
12 Mebamaa Yigyibiti azɛlɛ ne adɔ mgbane adɛla azɛlɛ biala, na ye azuamgbole ne mɔ adɔ mgbane adɛla suakpole biala too ɛvolɛ 40;+ na mebabɔ Yigyibitima asande meahɔ maanle maanle ne mɔ anu na meakponde bɛ wɔ azɛlɛ ne mɔ azo.”+
13 “‘Ɔluakɛ mɔɔ Tumivolɛ Awulae Gyihova ɛha la ɛne: “Ɛvolɛ 40 anzi, mebazia meaboɔboa Yigyibitima anloa meavi menli mɔɔ bɛbɔle bɛ asande bɛhɔle bɛ avinli la anu;+
14 Mebava Yigyibitima mɔɔ hɔle akɛlɛzonlenlɛ nu la meazia meara Patelɔso azɛlɛ zo,+ ɛleka mɔɔ bɛ bo vi la, na bɛbayɛ belemgbunlililɛ ekyi bie wɔ ɛkɛ.
15 Yigyibiti bara aze kpalɛ adɛla belemgbunlililɛ mɔɔ ɛha la na ɔnrɛli maanle gyɛne biala anwo zo tumi bieko,+ na mebamaa bɛayɛ ekyi kpalɛ mɔɔ bɛnrɛhola bɛnrɛnlea maanle gyɛne biala anwo zo a.+
16 Yizilayɛma ɛnrɛva bɛ nwo ɛnrɛdo ɔ nwo zo bieko,+ emomu, ɔbamaa bɛahakye nvonleɛ mɔɔ bɛyɛle kɛ bɛhɔkpondɛle moalɛ bɛvile Yigyibitima ɛkɛ la. Na bɛbanwu kɛ medame a mele Tumivolɛ Awulae Gyihova a.”’”
17 Wɔ ɛvolɛ mɔɔ tɔ zolɛ 27, ye siane ne mɔɔ limoa, kenle mɔɔ limoa wɔ siane ne anu la, Gyihova nee me dendɛle kɛ:
18 “Sonla ra, Babelɔn Belemgbunli Nɛbukadenɛza+ maanle ye ɛlɔnema yɛle gyima kpole tiale Taya.+ Etile biala azo dule yɛɛ awane biala azo kpolokpolole. Noko ɔ nee ye ɛlɔnema ne annyia ahatualɛ biala wɔ gyima ne mɔɔ ɔyɛle wɔ Taya anwo la anwo.
19 “Ɛhye ati mɔɔ Tumivolɛ Awulae Gyihova ɛha la ɛne, ‘Nea mebava Yigyibiti azɛlɛ ne meamaa Babelɔn Belemgbunli Nɛbukadenɛza,+ na ɔbazoa zolɛ anwonyia yeahɔ na yeave zolɛ ninyɛne dɔɔnwo; na ɔbayɛ ye ɛlɔnema ne ahatualɛ.’
20 “‘Mebava Yigyibiti azɛlɛ ne meamaa ye kɛ gyima mɔɔ ɔyɛle ɔtiale ye* la anwo ahatualɛ, ɔluakɛ bɛyɛle bɛmaanle me,’+ Tumivolɛ Awulae Gyihova a se a.
21 “Kenle zɔhane, mebamaa mɛne bie afifi amaa Yizilayɛma,*+ na meamaa wɔ adenle meamaa wɔadendɛ wɔ bɛ avinli; na bɛbanwu kɛ medame a mele Gyihova a.”
Ɔbodwɛkɛ
^ Wɔ ɛke nee ɔ bo ɛkɛ ne, “Naele” ne gyi ɛkɛ ne maa azudenle ne nee ye kanale ne mɔ mɔɔ bɛfa nuhua nzule bɛgugua aleɛ zo la.
^ Anzɛɛ “ndile.”
^ Hibulu aneɛ nu, “ɛzɔlɛ.”
^ Hibulu aneɛ nu, “yeha.”
^ Ɛhye kile, ɔyɛle ɔtiale Taya.
^ Anzɛɛ “mebamaa Yizilayɛma anyia anwosesebɛ.”
