Yizikeɛle 3:1-27
3 Akee ɔzele me kɛ: “Sonla ra, di mɔɔ wɔ ɛ nyunlu ɛkɛ ne la.* Di nwomamobɔleɛ ɛhye, na kɔdendɛ kile Yizilayɛma.”+
2 Ɔti membukele me nloa anu, na ɔmaanle menlile nwomamobɔleɛ ne.
3 Ɔdoale zo ɔzele me kɛ: “Sonla ra, di nwomamobɔleɛ ɛhye mɔɔ melɛfa meamaa wɔ la na maa ɛ ko ɛyi.” Ɔti menlile, na ɔyɛle me nloa anu menlemenle kɛ wolɛ la.+
4 Ɔzele me kɛ: “Sonla ra, kɔ Yizilayɛma ɛkɛ na ka me edwɛkɛ ne kile bɛ.
5 Ɔluakɛ menzoa wɔ wɔ menli mɔɔ bɛ aneɛ ne yɛ se anzɛɛ ɛnde bɛ aneɛ ne la ɛkɛ, emomu melɛsoa wɔ wɔ Yizilayɛma ɛkɛ.
6 Tɛ menli dɔɔnwo mɔɔ bɛ aneɛ ne yɛ se anzɛɛ ɛnde bɛ aneɛ, nee bɛ edwɛkɛ agbɔkɛ ne mɔ abo la ɛkɛ a melɛsoa wɔ a. Saa bɛ ɛkɛ ne a menzoanle wɔ a, anrɛɛ bɛbadie wɔ.+
7 Noko Yizilayɛma ɛnrɛdie wɔ, ɔluakɛ bɛngulo kɛ bɛtie me.+ Yizilayɛma kɔsɔɔti anzo yɛ se yɛɛ bɛ ahonle ɛsolo.*+
8 Nea! Memaa ɛ nyunlu ɛyɛ se kɛ bɛ nyunlu la yɛɛ memaa ɛ nwoma ɛyɛ se kɛ bɛ nwoma.+
9 Memaa ɛ nwoma ɛyɛ kɛ daemɔn, yeyɛ se yedɛla bolɛ ɛsesebɛ.+ Mmasulo bɛ anzɛɛ mmamaa bɛ nyunlu ka wɔ ɛzulolɛ,+ ɔluakɛ bɛle menli mɔɔ ɛde atua.”
10 Ɔdoale zo ɔzele me kɛ: “Sonla ra, tie edwɛkɛ ne mɔɔ melɛka meahile wɔ la amuala na fa sie wɔ ahonle nu.
11 Kɔ wɔ menli mɔɔ bɛwɔ akɛlɛzonlenlɛ nu la ɛkɛ+ na tendɛ kile bɛ. Saa bɛtie o, bɛandie o, ka kile bɛ kɛ, ‘Mɔɔ Tumivolɛ Awulae Gyihova ɛha la ɛne.’”+
12 Akee sunsum bie maanle me zo+ na mendele dede kpole bie nee ɛnelɛ bie wɔ me nzi kɛ: “Bɛye Gyihova anyunlunyia ne ayɛlɛ wɔ ye tɛnlabelɛ ɛkɛ.”
13 Mendele tease abɔdeɛ ne mɔ andɛba ne mɔ mɔɔ ɛlɛtwi nwolɛ la dede ne,+ nee ehwili gyakɛ ne mɔ dede ne+ yɛɛ ɛnelɛ kpole ne dede ne.
14 Na sunsum ne maanle me zo na ɔvale me ɔhɔle, na menvale nyanelilɛ* mengɔle na ɛnee me sunsum ɛva ɛya kpole, na Gyihova asa yɛle se kpalɛ wɔ me nwo zo.
15 Ɔti mengɔle menli mɔɔ wɔ akɛlɛzonlenlɛ nu wɔ Tɛle-abebe mɔɔ bɛde azule Kibaa ne anloa la anwo ɛkɛ,+ na mendɛnlanle ɛleka mɔɔ bɛde la; na ɔzinle me nwo,+ me nee bɛ dɛnlanle kenle nsuu.
16 Kenle nsuu ne anzi, Gyihova zele me kɛ:
17 “Sonla ra, meye wɔ kɛ ɛyɛ Yizilayɛma sinzavolɛ;+ na saa ɛte me nloa anu edwɛkɛ a ɔwɔ kɛ ɛbɔ bɛ kɔkɔ ɛmaa me.+
18 Saa meka mekile amumuyɛnli kɛ, ‘Ɛbawu,’ na wɔambɔ ye kɔkɔ, na wɔandendɛ wɔangile amumuyɛnli ne wɔambɔ ye kɔkɔ wɔammaa yeanvi ye amumuyɛ adenle ne anwo amaa yeadɛnla ngoane nu a,+ ye nvonleɛ ne ati ɔbawu ɔluakɛ ɔle amumuyɛnli,+ noko mebabiza ye mogya ne meavi wɔ ɛkɛ.*+
19 Noko saa ɛbɔ amumuyɛnli bie kɔkɔ na yeandwe ɔ nwo yeanvi ye amumuyɛyɛlɛ nee ye amumuyɛ adenle ne anwo a, ye nvonleɛ ne ati ɔbawu, noko wɔmɔ, ɛbalie wɔ ngoane.*+
20 Noko saa tenlenenli gyakyi ye tenleneyɛlɛ na ɔyɛ ɛtane a,* mebava azedolɛ bolɛ meado ɔ nyunlu na ɔbawu.+ Saa wɔambɔ ye kɔkɔ a, ye ɛtane ne ati ɔbawu na bɛnrɛhakye ye tenlene nyɛleɛ ne mɔ, noko mebabiza ye mogya ne meavi wɔ ɛkɛ.*+
21 Noko saa ɛbɔ tenlenenli kɔkɔ kɛ ɔmmayɛ ɛtane na yeanyɛ ɛtane a, ɔbahɔ zo yeadɛnla ngoane nu ɔluakɛ ɛbɔle ye kɔkɔ,+ na ɛnee wɔlie wɔ ngoane.”*
22 Gyihova asa rale me nwo zo wɔ ɛkɛ ne na ɔzele me kɛ: “Dwazo, kɔ azɛlɛ sɛsɛ ne azo, na me nee wɔ badendɛ wɔ ɛkɛ.”
23 Ɔti mendwazole na mengɔle azɛlɛ sɛsɛ ne azo, na nea! ɛnee Gyihova anyunlunyia ne wɔ ɛkɛ,+ ɔle kɛ anyunlunyia ne mɔɔ menwunle ye wɔ azule Kibaa ne anloa la,+ na membutule me nyunlu aze.
24 Akee sunsum ne rawolole me na ɔmaanle mendwazole mengyinlanle me gyakɛ azo,+ na ɔ nee me dendɛle na ɔhanle kɛ:
“Kɔ, kɔdo ɛ nwo anlenkɛ nu wɔ wɔ sua ne anu.
25 Na wɔmɔ, sonla ra, bɛbava nyɛma bɛagua ɛ nwo zo na bɛava bɛakyekye wɔ amaa wɔangola wɔangɔ bɛ ɛkɛ.
26 Na mebamaa ɛ tafinlima ayɛ ɛlomboɛ wɔ ɛ nloa anu, na ɛbadɔ mumule, ɛnrɛhola bɛ nyunlu twi, ɔluakɛ bɛle menli mɔɔ ɛde atua.
27 Noko saa me nee wɔ tendɛ a, mebabuke ɛ nloa, na wɔaha wɔahile bɛ kɛ,+ ‘Mɔɔ Tumivolɛ Awulae Gyihova ɛha la ɛne.’ Maa mɔɔ ɔbadie la ɛdie,+ na maa mɔɔ ɛnrɛdie la ɛgyakyi, ɔluakɛ bɛle menli mɔɔ ɛde atua.+
Ɔbodwɛkɛ
^ Hibulu aneɛ nu, “di mɔɔ ɛnwu ye la.”
^ Hibulu aneɛ nu, “ati yɛ se yɛɛ bɛ ahonle yɛ se.”
^ Anzɛɛ “alɔbɔlɛlilɛ.”
^ Anzɛɛ “mebamaa wɔabu ye mogya ne anwo mgbonda.”
^ Anzɛɛ “wɔ ɛkɛla.”
^ Anzɛɛ “yeanli pɛlepɛle a.”
^ Anzɛɛ “mebamaa wɔabu ye mogya ne anwo mgbonda.”
^ Anzɛɛ “wɔ ɛkɛla.”
