Yizikeɛle 30:1-26
30 Na Gyihova nee me dendɛle bieko kɛ:
2 “Sonla ra, ka ngapezo na ka kɛ, ‘Mɔɔ Tumivolɛ Awulae Gyihova ɛha la ɛne:
“Bɛye awolɛ, ‘Yɛ gyakɔ, ɔluakɛ kenle ne ɛlɛba!’
3 Na kenle ne ɛbikye, ɛhɛe, Gyihova kenle ne ɛbikye.+
Ɔbayɛ amungu kenle,+ ɔle ndɛnebualɛ mekɛ ɔmaa maanle maanle ne mɔ.+
4 Konle dadeɛ bara Yigyibiti anwo zo, yɛɛ ɛzulolɛ baha Yiteyopea wɔ mekɛ mɔɔ bɛbanwu menli mɔɔ bɛhu bɛ bɛgua Yigyibiti la;Bɛva ye anwonyia yɛɛ bɛbubu ye adiabo ne mɔ.+
5 Yiteyopea,+ Pɛɛte,+ Lude yɛɛ nyɛvolɛ kɔsɔɔti,*Nee Kɛɛbe yɛɛ menli mɔɔ wɔ ngyekyeleɛ azɛlɛ ne azo la,*Bɛ muala bɛbawu konle dadeɛ nloa.”’
6 Mɔɔ Gyihova ɛha la ɛne:
Yigyibiti boavolɛma noko baho adɔ,Na bɛbaha ye anwomemaazo tumi ne aze.’+
“‘Ɔvi Megedɔlo+ mɔɔ kɔdwu Saeyini,+ bɛbawu konle dadeɛ nloa wɔ azɛlɛ ne azo,’ Tumivolɛ Awulae Gyihova a se a.
7 ‘Bɛbayɛ azɛlɛ mɔɔ ɛdɔ mgbane ɛdɛla azɛlɛ biala, na ye azuamgbole ne mɔ adɔ mgbane adɛla azuamgbole biala.+
8 Saa meto senle wɔ Yigyibiti na mesɛkye ye boavolɛma amuala a, bɛbanwu kɛ medame a mele Gyihova a.
9 Kenle zɔhane mebazoa ɛbɔfoɔma meamaa bɛava meli bɛahɔ na Yiteyopeama mɔɔ bɛdie bɛ nwo bɛdi somaa la anwo bawoso bɛ; ɛzulolɛ baha bɛ wɔ kenle ne mɔɔ ɛlɛba Yigyibiti anwo zo la anu, ɔluakɛ ye biala anu ɔbara.’
10 “Mɔɔ Tumivolɛ Awulae Gyihova ɛha la ɛne: ‘Mebalua Babelɔn Belemgbunli Nɛbukadenɛza anwo zo meamaa Yigyibiti menli dɔɔnwo ne abo zo aminli.+
11 Bɛbava ɔdaye nee ye ɛlɔnema, maanle maanle mɔɔ bɛ ti yɛ se kpalɛ la+ bɛarazɛkye azɛlɛ ne. Bɛbahwe bɛ konle dadeɛ ne mɔ wɔ Yigyibiti anwo zo na bɛamaa menli mɔɔ bɛhu bɛ la ayi azɛlɛ ne azo tɛkɛɛ.+
12 Mebamaa Naele kanale ne mɔ+ ayɛ azɛlɛ resee na meadɔne azɛlɛ ne meamaa amumuyɛma. Mebalua nyɛvolɛ nwo zo meamaa azɛlɛ ne nee debie biala mɔɔ wɔ zolɛ la adɔ mgbane.+ Medame Gyihova a medendɛ a.’
13 “Mɔɔ Tumivolɛ Awulae Gyihova ɛha la ɛne: ‘Eza mebazɛkye kyibadeɛ ananze* ne mɔ na meazɛkye Nɔfo*+ nyamenle ne mɔ mɔɔ nvasoɛ ɛnle bɛ nwo zo la. Kpanyinli* bieko ɛnrɛvi Yigyibiti ɛnrɛra, na mebamaa ɛzulolɛ aha Yigyibiti azɛlɛ ne.+
14 Mebamaa Patelɔso adɔ mgbane+ na meado senle wɔ Zowan na meabua No* ndɛne.+
15 Mebawola me ɛya ne meagua Sen, Yigyibiti aranemgbole ne anwo zo, na meazɛkye menli mɔɔ wɔ No la.
16 Mebado senle wɔ Yigyibiti; na ɛzulolɛ baha Sen na bɛabubu No bane ne bɛawolo nu na bɛateta Nɔfo* ewia henlema!
17 Mgbavolɛ mɔɔ wɔ Ɔɔn* nee Paebisɛte la bawu konle dadeɛ nloa, yɛɛ azuamgbole ne mɔ bahɔ akɛlɛzonlenlɛ nu.
18 Kenle ne bayɛ awozinli wɔ Tapanehizi wɔ mekɛ mɔɔ mebabubu Yigyibiti gyɛnvayile ne wɔ ɛkɛ ne la.+ Ye anwomemaazo tumi ne bara ye awieleɛ,+ amungu baheda ɔ nwo zo, na ye azua ne mɔ ahɔ akɛlɛzonlenlɛ nu.+
19 Mebabua Yigyibiti ndɛne, na bɛbanwu kɛ medame a mele Gyihova a.’”
20 Wɔ ɛvolɛ mɔɔ tɔ zolɛ 11, ye siane mɔɔ limoa, kenle mɔɔ tɔ zolɛ nsuu wɔ siane ne anu la, Gyihova nee me dendɛle kɛ:
21 “Sonla ra, mebubu Yigyibiti Belemgbunli Falo asa; bɛnrɛbɔ ye bɔlɛ kɛ bɛyɛ ye ayile anzɛɛ bɛnrɛva ɛdanlɛ bɛnrɛkyekye kɛ bɛmaa nuhua amia na yeazɔ konle dadeɛ nu.”
22 “Ɛhye ati mɔɔ Tumivolɛ Awulae Gyihova ɛha la ɛne: ‘Nea meyɛ Yigyibiti Belemgbunli Falo kpɔvolɛ,+ na mebabubu ɔ sa, nuhua ne mɔɔ anu yɛ se nee mɔɔ ɛbu la,+ na meamaa konle dadeɛ ne avi ɔ sa nu adɔ aze.+
23 Akee mebabɔ Yigyibitima asande meahɔ maanle maanle ne mɔ anu na meakponde bɛ wɔ azɛlɛ ne mɔ azo.+
24 Mebamaa Babelɔn belemgbunli ne asa anu ayɛ se*+ na meava me konle dadeɛ ne meawula ɔ sa nu,+ na meabubu Falo asa, na ɔbakponle kpole kɛ sonla mɔɔ ɛlɛwu la wɔ ɔ nyunlu ɛkɛ ne.*
25 Mebamaa Babelɔn belemgbunli ne asa anu ayɛ se, noko Falo asa nu bado; na saa mefa me konle dadeɛ ne mewula Babelɔn belemgbunli ne asa anu na ɔmaa ye zo ɔtia Yigyibiti azɛlɛ ne a, bɛbanwu kɛ medame a mele Gyihova a.+
26 Na mebabɔ Yigyibitima asande meahɔ maanle maanle ne mɔ anu na meakponde bɛ wɔ azɛlɛ ne mɔ azo,+ na bɛbanwu kɛ medame a mele Gyihova a.’”
Ɔbodwɛkɛ
^ Anzɛɛ “bɛdabɛ mɔɔ bɛvi maanle gyɛne nu la amuala.”
^ Bie a ɔfale Yizilayɛma mɔɔ kpondɛle moalɛ vile Yigyibiti la anwo.
^ Anzɛɛ “Adekilevolɛ.”
^ Anzɛɛ “Mɛmefese.”
^ Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
^ Ɛhye kile, Tibise.
^ Anzɛɛ “Mɛmefese.”
^ Ɛhye kile, Hɛleɔpɔlese.
^ Anzɛɛ “Mebamaa ye tumi ne ayɛ kpole.”
^ Ɛhye kile, Babelɔn belemgbunli ne anyunlu ɛkɛ ne.
