Yizikeɛle 31:1-18
-
Yigyibiti azedɔlɛ, sida baka kpole ne (1-18)
31 Wɔ ɛvolɛ mɔɔ tɔ zolɛ 11, siane ne mɔɔ tɔ zolɛ nsa, kenle mɔɔ limoa wɔ siane ne anu, Gyihova nee me dendɛle bieko kɛ:
2 “Sonla ra, ka kile Yigyibiti Belemgbunli Falo nee ye menli dɔɔnwo ne kɛ,+‘Nwane a le kpole kɛ ɛdawɔ a?
3 Ɛle kɛ Aseleanli, sida baka bie mɔɔ wɔ Lɛbanɔn,Mɔɔ lɛ ngane ngɛnlɛma kɛ baka buzuu mɔɔ wale;Mɔɔ ɔ ti dwu amungu ne mɔ anu la.
4 Azule ne mɔ maanle ɔnyinle ɔyɛle kpole, azule kuma ne mɔ maanle ɔnyinle ɔyɛle tendenle.
Ɛnee azudenle ɛbɔ ɛyia ɛleka mɔɔ bɛluale ye la;Ndenle mɔɔ azule ne mɔ fa nu la maanle ɛbɔ nu mbaka kɔsɔɔti nyianle nzule.
5 Ɛhye ati a ɔnyinle ɔyɛle tendenle ɔdɛlale ɛbɔ nu mbaka mɔɔ ɛha la amuala la.
Ye ngane mgbole ne mɔ yɛle dɔɔnwo, yɛɛ ɔ sa ngane ne mɔ yɛle ndendenleƆlua nzule dɔɔnwo ne mɔɔ wɔ ye azudenle ne mɔ anu la ati.
6 Anwomanyunlu nloma kɔsɔɔti yɛle bɛ sane wɔ ye ngane mgbole ne mɔ azo,Ɛbɔ nu nane anwo ɛzulolɛ kɔsɔɔti wole bɛ mra wɔ ye ngane ne mɔ abo,Yɛɛ maanle mgbole kɔsɔɔti dɛnlanle ye alubo ne abo.
7 Ɔyɛle kɛnlɛma kpalɛ na ye ngane ne mɔ yɛle ndendenle,Ɔluakɛ ye ndinli ne mɔ wolole hɔle azule dɔɔnwo anu.
8 Sida baka biala ɛnle Nyamenle tola ne anu+ mɔɔ ɔ nee ye sɛ a.
Dwunipa baka biala ɛnlɛ ngane mgbole kɛ ye ɛdeɛ ne la,Pilen baka biala ɛnlɛ ngane kɛ ye ɛdeɛ ne la.
Baka gyɛne biala ɛnle Nyamenle tola ne anu mɔɔ ɔ nee ye sɛ kɛnlɛma a.
9 Menyɛle ye kɛnlɛma, ɔnyianle ngane nee nya dɔɔnwo,Na Yidɛn, nɔhalɛ Nyamenle ne tola ne anu mbaka mɔɔ ɛha la kɔsɔɔti anye bolole ye.’
10 “Ɛhye ati mɔɔ Tumivolɛ Awulae Gyihova ɛha la ɛne: ‘Kɛmɔ ɔyɛle* tendenle kpalɛ, ɔmaanle ɔ ti dwule amungu ne mɔ anu, na ye tendenle ne maanle ye ahonle memaanle ɔ nwo zo la ati,
11 mebava ye meawula maanle maanle tumivolɛ ne asa anu.+ Ɔ nee ye bali, na ye amumuyɛ ne ati mebakpo ye.
12 Na nyɛvolɛ, maanle maanle mɔɔ bɛ ti yɛ se kpalɛ la bapɛ ye ado aze, na bɛagyakyi ye wɔ awoka ne mɔ azo, na ye nya ne mɔ akpolo agua mbɔnza kɔsɔɔti anu, na ye ngane ne mɔ abubu agua azɛlɛ ne azo azudenle kɔsɔɔti anu.+ Menli mɔɔ wɔ azɛlɛ ne azo la kɔsɔɔti bɛavi ye alubo ne abo na bɛagyakyi ye ɛkɛ.
13 Anwomanyunlu nloma kɔsɔɔti badɛnlɛdɛnla baka ne mɔɔ bɛbu ye bɛdo aze la azo, na ɛbɔ nu nane anwo ɛzulolɛ kɔsɔɔti adɛnlɛdɛnla ye ngane ne mɔ azo.+
14 Ɔbayɛ zɔ amaa baka biala mɔɔ bikye azule ne mɔ la annyi anyɛ tendenle kpalɛ anzɛɛ ammaa ɔ ti zo andwu amungu ne mɔ anu na baka biala mɔɔ nyia nzule dɔɔnwo la annyi anyɛ tendenle kɛ bɛdabɛ la. Ɔluakɛ bɛbava bɛ muala bɛamaa ewule, bɛbahɔ azɛlɛ ne abo lɔ, bɛ nee alesama mɔɔ ɛlɛkɔ kuma* ne anu la.’
15 “Mɔɔ Tumivolɛ Awulae Gyihova ɛha la ɛne: ‘Kenle mɔɔ ɔbahɔ Nla* ne anu la, mebamaa nyanelilɛ ara. Ɛhye ati, mebaheda azule kuma ne mɔ azo na meahwe ye azudenle ne mɔ meazia amaa azule dɔɔnwo ne anze. Ɔdaye ti mebamaa awozinli ava Lɛbanɔn, na ɛbɔ nu mbaka kɔsɔɔti agyengye.
16 Saa memaa ɔ nee menli mɔɔ ɛlɛkɔ kuma* ne anu la amuala kɔ Nla* ne anu na bɛte ye azedɔlɛ ne a, mebamaa maanle maanle ne mɔ anwo awoso bɛ, na Yidɛn mbaka kɔsɔɔti,+ Lɛbanɔn mbaka ngɛnlɛma nee mgbalɛ, mbaka mɔɔ nyia nzule dɔɔnwo la, arɛle bakyekye wɔ azɛlɛ ne abo lɔ.
17 Bɛ nee ye ɛhɔ Nla* ne anu, ɔ nee ye boavolɛma* mɔɔ dɛnlanle ye alubo ne abo wɔ maanle maanle ne mɔ+ anu la ɛhɔ menli mɔɔ bɛvale konle dadeɛ bɛhunle bɛ la anwo lɔ.’+
18 “‘Yidɛn mbaka ne mɔ anu boni a ye anyunlunyia nee ye kpoleyɛlɛ le kɛ wɔ ɛdeɛ ne a?+ Noko kɛ ɔde ye biala la bɛbapɛ wɔ bɛaboka Yidɛn mbaka ne mɔ anwo bɛado aze wɔ azɛlɛ ne abo lɔ. Ɛbala menli mɔɔ bɛtɛpɛle bɛ mrenyiazo nee bɛdabɛ mɔɔ bɛva konle dadeɛ bɛhu bɛ la anwo ɛkɛ. Ɛhye a bado Falo nee ye menli dɔɔnwo ne amuala a,’ Tumivolɛ Awulae Gyihova a se a.”
Ɔbodwɛkɛ
^ Hibulu aneɛ nu, “ɛyɛle.”
^ Anzɛɛ “nla.”
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Anzɛɛ “nla.”
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Hibulu aneɛ nu, “ɔ nee ɔ sa.”
