Yizikeɛle 32:1-32
32 Wɔ ɛvolɛ mɔɔ tɔ zolɛ 12, siane ne mɔɔ tɔ zolɛ 12, kenle mɔɔ limoa wɔ siane ne anu, Gyihova nee me dendɛle bieko kɛ:
2 “Sonla ra, to Yigyibiti Belemgbunli Falo anwo awolɛyelɛ edwɛne* na ka kile ye kɛ,‘Ɛnee ɛle kɛ awenade ekyi* mɔɔ anwo yɛ se la wɔ maanle maanle ne mɔ avinli,Noko bɛmaa wɔha ɛ nloa wɔdo nu.
Ɛnee ɛle kɛ nyevile nu nane kpole bie,+ ɛwuluwulu wɔ wɔ azule ne mɔ anu,Ɛfa ɛ gyakɛ ɛkpoto azule ne mɔ na ɛmaa bɛyɛ evinli.’
3 Mɔɔ Tumivolɛ Awulae Gyihova ɛha la ɛne:
‘Mebalua maanle maanle dɔɔnwo ɛlɔne bie anwo zo meado me asawu ne meagua ɛ nwo zo,Na bɛbahwe wɔ wɔ me avonle ne anu bɛara file zo.
4 Mebagyakyi wɔ meado azɛlɛ ne azo;Mebavuandi wɔ meado ɛbɔ nu.
Mebamaa anwomanyunlu nloma kɔsɔɔti aradɛnlɛdɛnla ɛ nwo zo,Na meamaa azɛlɛ ne amuala azo nane anwo ɛzulolɛ ali ɛ nwo nane bɛ ko ayi.+
5 Mebavuandi wɔ nwonane meado awoka ne mɔ azo,Na meava wɔ nwonane azinli kpɔlɔlera ne mɔ meayi mbɔnza ne mɔ anu.+
6 Mebamaa azɛlɛ ne ameme wɔ mogya mɔɔ bazonyi agua la too yeahɔdwu awoka ne mɔ azo lɔ,Na ɔbayi azudenle ne mɔ tetɛkɛɛ.’*
7 ‘Na saa menua wɔ a, mebaheda anwomanyunlu ne azo na meamaa bɛ nwɔlɔra ne mɔ ayɛ kisii.
Mebava amungu meaheda sɛnzɛne ne anyunlu,Na siane ne ɛnrɛda bieko.+
8 Ɛdawɔ ti, mebamaa ahɛnlaneɛ mɔɔ ta wɔ anwuma la kɔsɔɔti ayɛ kisii,Na mebava awozinli meaheda wɔ azɛlɛ ne azo,’ Tumivolɛ Awulae Gyihova a se a.
9 ‘Mebamaa menli dɔɔnwo ahonle ali nyane wɔ mekɛ mɔɔ mebava bɛ menli mɔɔ bɛhye bɛ bɛhɔ akɛlɛzonlenlɛ nu meahɔ maanle gyɛne zo,Azɛlɛ mɔɔ bɛnze zolɛ azo la.+
10 Mebamaa yeazi menli dɔɔnwo anwo,Na ɛdawɔ ti, saa metende me konle dadeɛ ne wɔ bɛ nyunlu ɛkɛ ne a, ɛzulolɛ bamaa bɛ arelemgbunli ne mɔ anwo awoso bɛ.
Kenle mɔɔ ɛbadɔ aze la,Bɛ nwo bawoso bɛ dahuu, awie biala bazulo ye ngoane nwo.’
11 Ɔluakɛ mɔɔ Tumivolɛ Awulae Gyihova ɛha la ɛne:
‘Babelɔn belemgbunli konle dadeɛ ne bara ɛ nwo zo.+
12 Mebamaa wɔ menli dɔɔnwo ne awu konle nu katakyiema konle dadeɛ ne mɔ anloa,Maanle maanle mɔɔ bɛ ti yɛ se kpalɛ la, bɛ muala.+
Bɛbaha Yigyibiti anwomemaazo ne aze, na bɛazɛkye ye menli dɔɔnwo ne amuala bɔkɔɔ.+
13 Mebazɛkye ye nyɛmoa kɔsɔɔti wɔ ye azule dɔɔnwo ne anloa,+Na sonla gyakɛ anzɛɛ ayɛmoa gyakɛ ɛnrɛkpoto bɛ bieko.’+
14 ‘Mekɛ zɔhane mebade bɛ nzule ne mɔ anye,Na meamaa bɛ azule ne mɔ aze kɛ nwole la,’ Tumivolɛ Awulae Gyihova a se a.
15 ‘Saa memaa Yigyibiti azɛlɛ ne tɔ mgbane, ɔyɛ azɛlɛ mɔɔ bɛye debie biala bɛvi zo,+Saa meku menli mɔɔ de zolɛ la amuala a,Bɛbanwu kɛ medame a mele Gyihova a.+
16 Ɛhye le awolɛyelɛ, na menli bɛaye;Mraalɛ mɔɔ wɔ maanle maanle ne mɔ anu la baye.
Bɛbaye ye wɔ Yigyibiti nee ye menli dɔɔnwo ne anwo,’ Tumivolɛ Awulae Gyihova a se a.”
17 Akee wɔ ɛvolɛ mɔɔ tɔ zolɛ 12, kenle mɔɔ tɔ zolɛ 15 wɔ siane ne anu, Gyihova nee me dendɛle kɛ:
18 “Sonla ra, su alɔbɔlɛ ɛzunlɛ ɔlua Yigyibiti menli dɔɔnwo ne ati na fa ye kɔ azɛlɛ ne abo lɔ, ɔ nee mraalɛ mɔɔ bɛvi maanle mgbole nu la, maa bɛhɔboka bɛdabɛ mɔɔ bɛlɛkɔ kuma* ne anu la anwo.
19 “‘Nwane a ɛ nwo yɛ fɛ tɛla ye a? Dwu kɔ aze, na kɔla bɛdabɛ mɔɔ bɛtɛpɛle bɛ mrenyiazo la anwo ɛkɛ!’
20 “‘Bɛbawu bɛagua bɛdabɛ mɔɔ bɛwu konle dadeɛ nloa la avinli.+ Bɛye ye bɛmaa konle dadeɛ; bɛhwe ye nee ye menli dɔɔnwo ne amuala bɛhɔ.
21 “‘Konle nu katakyiema bavi Nla* ne abo nehane adendɛ ahile ye nee ye boavolɛma. Ye biala anu bɛbahɔ azɛlɛ ne abo na bɛala ɛkɛ ne kɛ menli mɔɔ bɛtɛpɛle bɛ mrenyiazo, mɔɔ bɛwu konle dadeɛ nloa la.
22 Aselea nee ye ɛlɔnema ne amuala wɔ ɛkɛ. Bɛ nla ne mɔ ɛbɔ ɔ nwo amuala ɛyia, bɛ muala bɛwule konle dadeɛ nloa.+
23 Ye nla ne mɔ wɔ kuma ne abo lɔ, na ye ɛlɔnema ne ɛbɔ ye nla ne anwo amuala ɛyia, konle dadeɛ a hunle bɛ muala a, ɔluakɛ bɛmaanle ɛzulolɛ rale anyewɔzoamra azɛlɛ ne azo.
24 “‘Yilam+ nee ye menli dɔɔnwo ne ɛbɔ ye nla ne anwo amuala ɛyia, bɛ muala bɛwule konle dadeɛ nloa. Bɛampɛ bɛ mrenyiazo yɛɛ bɛhɔle azɛlɛ ne abo lɔ a, bɛdabɛ mɔɔ bɛmaanle ɛzulolɛ rale anyewɔzoamra azɛlɛ ne azo la. Na bɛ nee bɛdabɛ mɔɔ bɛlɛkɔ kuma* ne anu la amuala bɛabɔ anyiemgba.
25 Bɛyɛ ɛkpa bɛmaa ye wɔ menli mɔɔ bɛhu bɛ la anu, ɔ nee ye menli dɔɔnwo ne mɔɔ bɛbɔ ye nla ne bɛyia la amuala. Bɛ muala bɛtɛpɛle bɛ mrenyiazo, bɛwule konle dadeɛ nloa, ɔluakɛ bɛmaanle ɛzulolɛ rale anyewɔzoamra azɛlɛ ne azo; na bɛ nee bɛdabɛ mɔɔ bɛlɛkɔ kuma* ne anu la amuala bɛabɔ anyiemgba. Bɛva ye bɛdo bɛdabɛ mɔɔ bɛhu bɛ la anwo ɛkɛ.
26 “‘Ɛkɛ ne a Mihyɛke nee Tubale+ yɛɛ bɛ menli dɔɔnwo ne amuala wɔ a. Bɛ* nla ne mɔ ɛbɔ ye ɛyia. Bɛ muala bɛtɛpɛle bɛ mrenyiazo. Bɛvale konle dadeɛ bɛwɔle bɛ, ɔluakɛ bɛmaanle ɛzulolɛ rale anyewɔzoamra azɛlɛ ne azo.
27 Asoo bɛnrɛla konle nu katakyiema mɔɔ bɛtɛpɛle bɛ mrenyiazo mɔɔ bɛwu na bɛva bɛ akodeɛ bɛhɔ Nla* ne anu la anwo ɛkɛ ɔ? Na bɛbava bɛ ti bɛagua bɛ konle dadeɛ ne mɔ azo* na bɛ ɛtane ne mɔ aha bɛ mbowule ne mɔ anwo, ɔluakɛ konle nu katakyiema ɛhye mɔ maanle ɛzulolɛ rale anyewɔzoamra azɛlɛ ne azo.
28 Noko wɔmɔ, bɛbabubu wɔ wɔ bɛdabɛ mɔɔ bɛtɛpɛle bɛ mrenyiazo la avinli, na ɛbala bɛdabɛ mɔɔ bɛwu konle dadeɛ nloa la anwo ɛkɛ.
29 “‘Yidɔm+ wɔ ɛkɛ, ye arelemgbunli nee ye mgbanyima kɔsɔɔti mɔɔ bɛ anwosesebɛ ne anzi, bɛhunle bɛ bɛbokale bɛdabɛ mɔɔ bɛwu konle dadeɛ nloa la anwo; bɛdabɛ noko bɛbala bɛdabɛ mɔɔ bɛtɛpɛle bɛ mrenyiazo+ nee bɛdabɛ mɔɔ bɛlɛkɔ kuma* ne anu la anwo ɛkɛ.
30 “‘Ɛkɛ ne a sɔlɔ mgbanyima* ne mɔ amuala wɔ a, bɛ nee Saedɛnema amuala,+ mɔɔ bɛ nwo ɛzulolɛ nee bɛ anwosesebɛ ne amuala anzi, bɛ nee bɛdabɛ mɔɔ bɛhu bɛ la vale nyiane hɔle azɛlɛ ne abo lɔ la. Bɛnrɛpɛ bɛ mrenyiazo na bɛbala bɛdabɛ mɔɔ bɛwu konle dadeɛ nloa la anwo ɛkɛ na bava anyiemgba bɛ nee bɛdabɛ mɔɔ bɛlɛkɔ kuma* ne anu lɔ la ahɔ.
31 “‘Falo banwu ɛhye mɔ amuala, na mɔɔ bado ye menli dɔɔnwo ne amuala la bamaa ɔ rɛle akyekye;+ Falo nee ye ɛlɔne ne amuala bawu wɔ konle dadeɛ nloa,’ Tumivolɛ Awulae Gyihova a se a.
32 “‘Kɛmɔ ɔhanle ɛzulolɛ wɔ anyewɔzoamra azɛlɛ ne azo la ati, bɛbamaa Falo nee ye ɛlɔnema ne mɔ amuala nee bɛdabɛ mɔɔ bɛtɛpɛle bɛ mrenyiazo mɔɔ bɛbawu konle dadeɛ nloa la ahɔla alie bɛ menle,’ Tumivolɛ Awulae Gyihova a se a.”
Ɔbodwɛkɛ
^ Anzɛɛ “awenade kakula.”
^ Anzɛɛ “nyanelilɛ edwɛne.”
^ Hibulu aneɛ nu, “Na ɛbayi azudenle ne mɔ tetɛkɛɛ.”
^ Anzɛɛ “nla.”
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Anzɛɛ “nla.”
^ Anzɛɛ “nla.”
^ Hibulu aneɛ nu, “Ye.”
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Bie a bɛlɛka kovolɛma mɔɔ bɛva bɛ konle dadeɛ ne mɔ bɛzie bɛ, bɛli bɛ eni kɛ sogyama la anwo edwɛkɛ.
^ Anzɛɛ “nla.”
^ Anzɛɛ “adekilevolɛma.”
^ Anzɛɛ “nla.”
