Yizikeɛle 34:1-31
34 Gyihova nee me dendɛle bieko kɛ:
2 “Sonla ra, ka ngapezo tia Yizilayɛ mboaneneavolɛma ne. Ka ngapezo, na ka kile mboaneneavolɛma ne kɛ, ‘Mɔɔ Tumivolɛ Awulae Gyihova ɛha la ɛne: “Yizilayɛ mboaneneavolɛma mɔɔ dwenle bɛ ngomekye bɛ aleɛlilɛ nwo la, bɛ gyakɔ!+ Asoo tɛ mboane ne mɔ a ɔwɔ kɛ mboaneneavolɛma maa bɛ aleɛ a?+
3 Bɛdi nane ne ɛleka kpalɛ* ne, bɛfa mboane ne enrinli bɛnwo ndanlɛ bɛkeda, na bɛku nane ne mɔ mɔɔ ɛlɔ kpalɛ la,+ noko bɛmmaa mboane ne mɔ aleɛ.+
4 Bɛtɛmaanle mɔɔ anwo ɛbɛlɛ ye la anwosesebɛ anzɛɛ bɛtɛyɛle mɔɔ ɛnde kpɔkɛ la ayile anzɛɛ bɛtɛbɔle mɔɔ ɛboda la bɔlɛ anzɛɛ bɛtɛfale mɔɔ ɛvo adenle la bɛtɛbale anzɛɛ bɛtɛkpondɛle mɔɔ ɛminli la;+ emomu, bɛvale atisesebɛ nee amumuyɛ a bɛnleanle bɛ nwo zo a.+
5 Ɔti bɛbɔle asande ɔluakɛ ɛnee mboaneneavolɛ biala ɛnle ɛkɛ;+ bɛbɔle asande na bɛyɛle ɛbɔ nu nane anwo ɛzulolɛ biala aleɛ.
6 Me mboane ne mɔ luoluale awoka mgbole nee ngyikyi ne mɔ kɔsɔɔti azo; me mboane ne mɔ bɔle asande hɔle azɛlɛ ye ɛleka biala, awie biala amkpondɛ bɛ anzɛɛ amkpo bɛ bo zo.
7 “‘“Zɔhane ati, bɛmɛ mboaneneavolɛma, bɛdie Gyihova edwɛkɛ ne:
8 ‘“Mekɛ ala mɔɔ mede aze la,” Tumivolɛ Awulae Gyihova a se a, “kɛmɔ bɛmaa nane ɛhye me mboane ne mɔ, na bɛyɛ ɛbɔ nu nane anwo ɛzulolɛ biala aleɛ, ɔluakɛ ɛnee mboaneneavolɛ biala ɛnle ɛkɛ, yɛɛ me mboaneneavolɛma ne amkpondɛ me mboane ne mɔ abo zo; emomu, bɛhɔle zo bɛlile bɛ aleɛ na bɛammaa me mboane ne mɔ aleɛ la ati,”’
9 bɛmɛ mboaneneavolɛma, bɛdie Gyihova edwɛkɛ ne.
10 Mɔɔ Tumivolɛ Awulae Gyihova ɛha la ɛne: ‘Mebaho meatia mboaneneavolɛma ne, yɛɛ mebamaa bɛabu me mboane ne mɔ anwo mgbonda,* na mebamaa bɛagyakyi me mboane ne aleɛ ɛmaanlɛ,*+ yɛɛ mboaneneavolɛ ne mɔ ɛnrɛnyia aleɛ bieko ɛnrɛli. Mebalie me mboane ne mɔ meavi bɛ nloa anu, na bɛnrɛyɛ bɛ aleɛ bieko.’”
11 “‘Ɔluakɛ mɔɔ Tumivolɛ Awulae Gyihova ɛha la ɛne: “Mewɔ ɛke, na medame mumua ne mebakpondɛ me mboane ne mɔ, na meanlea bɛ.+
12 Mebanlea me mboane ne mɔ kɛ mɔɔ mboaneneavolɛ mɔɔ ɛnwu ye mboane mɔɔ bɔle asande na ɔlɛmaa bɛ aleɛ yɛ ye la.+ Mebalie bɛ meavi ɛleka biala mɔɔ bɛbɔle bɛ asande bɛhɔguale la wɔ amungu nee awozinli kabii kenle ne anu.+
13 Mebaye bɛ meavi menli ne mɔ anu na meaboɔboa bɛ nloa meavi azɛlɛ ne mɔ azo na meava bɛ meara bɛdabɛ bɛ azɛlɛ ne azo na meamaa bɛ aleɛ wɔ Yizilayɛ awoka ne mɔ azo,+ azudenle ne mɔ anloa nee azɛlɛ ne azo ɛleka biala mɔɔ bɛtɛnla a ɔyɛ boɛ la.
14 Mebamaa bɛ aleɛ wɔ adidileka kpalɛ, na azɛlɛ ne mɔɔ bɛbadidi zolɛ la bayɛ Yizilayɛ awoka ndendenle ne mɔ azo.+ Bɛbala azɛlɛ kpalɛ mɔɔ adidileka wɔ zo la azo,+ na bɛadidi adidileka mgbalɛ mɔɔ wɔ Yizilayɛ awoka ne mɔ azo la azo.”
15 “‘“Medame mumua ne mebamaa me mboane ne mɔ aleɛ,+ na medame mumua ne meamaa bɛala bɛalie bɛ menle,”+ Tumivolɛ Awulae Gyihova a se a.
16 “Mebakpondɛ mɔɔ ɛminli la,+ mebava mɔɔ ɛvo adenle la meara, mebabɔ mɔɔ ɛboda la bɔlɛ na meamaa mɔɔ anwo ɛbɛlɛ ye la anwosesebɛ; noko mebaye mɔɔ ɛlɔ nee mɔɔ lɛ anwosesebɛ la meavi ɛkɛ. Mebamaa ndɛnebualɛ ayɛ ye aleɛ.”
17 “‘Na bɛmɛ, me mboane, mɔɔ Tumivolɛ Awulae Gyihova ɛha la ɛne: “Mebabua boane nee boane avinli ndɛne, mboane nyinli nee mbɔnkye nyinli avinli ndɛne.+
18 Bɛ nye ɛnzɔ adidileka kpalɛ ne mɔ mɔɔ bɛdidi ɛkɛ ne la ɔ? Eza ɔwɔ kɛ bɛfa bɛ gyakɛ bɛtietia adidileka ne mɔ mɔɔ ɛha la azo ɔ? Na saa bɛno nzule ne mɔɔ anye te kpalɛ la bie bɛwie a, asoo ɔwɔ kɛ bɛfa bɛ gyakɛ bɛtietia nzule ne anu bɛkpoto ye?
19 Kɛkala ɔwɔ kɛ me mboane ne mɔ kɔ adidi wɔ adidileka ne mɔ mɔɔ bɛva bɛ gyakɛ bɛtietia ɛkɛ ne la na bɛno nzule ne mɔɔ bɛva bɛ gyakɛ bɛtietia nu bɛkpoto ye la ɔ?”
20 “‘Ɛhye ati mɔɔ Tumivolɛ Awulae Gyihova ɛha ɛhile bɛ la ɛne: “Mewɔ ɛke, na medame mumua ne mebabua mboane kyenlera nee mboane nwanlera ndɛne,
21 ɔluakɛ bɛvale bɛ nvenle nee bɛ bati bɛzuhuzuhunle mɔɔ bɛnde kpɔkɛ la amuala, na bɛvale bɛ mɛne bɛpiepianle bɛ too bɛbɔle bɛ asande bɛhɔguale maanle gyɛne zo.
22 Na mebalie me mboane ne mɔ, na nane ɛnrɛhye bɛ bieko;+ yɛɛ mebabua boane nee boane avinli ndɛne.
23 Mebamaa bɛ mboaneneavolɛ ko,+ me sonvolɛ Devidi,+ na ɔbamaa bɛ aleɛ. Ɔdaye mumua ne ɔbamaa bɛ aleɛ na yeayɛ bɛ mboaneneavolɛ.+
24 Na medame, Gyihova, mebayɛ bɛ Nyamenle,+ na me sonvolɛ Devidi ayɛ bɛ kpanyinli.+ Medame Gyihova mumua ne a medendɛ a.
25 “‘“Na me nee bɛ bɛayɛ anzodwolɛ ngyekyeleɛ,+ na mebaye nane anwo ɛzulolɛ biala meavi azɛlɛ ne azo,+ amaa bɛadɛnla fienemgbole ne anu bɛ nzo nu adwo bɛ na bɛala ɛhoayelɛ ne mɔ anu.+
26 Mebamaa bɛ nee ɛleka mɔɔ zuozua me boka ekyi ne la ayɛ nyilalɛ,+ na mebamaa ezule ne adɔ wɔ mekɛ kpalɛ nu. Nyilalɛ badɔ kɛ ezule la.+
27 Ɛbɔ nu mbaka bazo ma, yɛɛ azɛlɛ ne bahye aleɛ,+ na bɛbadɛnla azɛlɛ ne azo wɔ anzodwolɛ nu. Na saa mebubu bɛ gyɛnvayile ne mɔ+ na medie bɛ mefi menli mɔɔ vale bɛ yɛle ngɛkɛlɛ la asa anu a, bɛbanwu kɛ medame a mele Gyihova a.
28 Maanle maanle ne mɔ ɛnrɛva bɛ ɛnrɛyɛ afedeɛ bieko, yɛɛ azɛlɛ ne azo nane anwo ɛzulolɛ ɛnrɛhye bɛ ɛnrɛli, na bɛbadɛnla aze anzodwolɛ nu, mɔɔ awie biala ɛnrɛha bɛ ɛzulolɛ a.+
29 “‘“Mebayɛ egyinli mɔɔ ɛlie duma kpalɛ la meamaa bɛ, na ɛhɔne ɛnrɛhu bɛ ɛnrɛgua azɛlɛ ne azo bieko,+ yɛɛ maanle maanle ne mɔ ɛnrɛgua bɛ nyunlu aze bieko.+
30 ‘Na bɛbanwu kɛ medame, Gyihova bɛ Nyamenle ne, me nee bɛ lua, na bɛmɛ, Yizilayɛma, bɛle me menli,’+ Tumivolɛ Awulae Gyihova a se a.”’
31 “‘Na bɛmɛ, me mboane,+ mboane mɔɔ menea bɛ nwo zo la, bɛmɛ bɛle menli, na mame mele bɛ Nyamenle,’ Tumivolɛ Awulae Gyihova a se a.”
Ɔbodwɛkɛ
^ Hibulu aneɛ nu, “ɛnlome.”
^ Anzɛɛ “ɛnleanlɛ.”
^ Anzɛɛ “mebabiza mealie me mboane ne mɔ meavi bɛ sa nu.”
