Yizikeɛle 35:1-15
-
Ngapezo mɔɔ tia Siyɛ awoka (1-15)
35 Gyihova nee me dendɛle bieko kɛ:
2 “Sonla ra, kakyi ɛ nye wɔ Siyɛ boka ne anwo+ na ka ngapezo tia ye.+
3 Ka kile ye kɛ, ‘Mɔɔ Tumivolɛ Awulae Gyihova ɛha la ɛne: “O Siyɛ boka, nea meyɛ wɔ kpɔvolɛ, na mebadende me sa meatia wɔ na meamaa wɔayɛ azɛlɛ mɔɔ ɛdɔ mgbane.+
4 Mebazɛkye wɔ azuamgbole ne mɔ, na ɛbahakyi azɛlɛ mɔɔ ɛdɔ mgbane;+ na bɛbanwu kɛ medame a mele Gyihova a.
5 Ɔluakɛ ɛkpɔle Yizilayɛma dahuu,+ na ɛyele bɛ ɛmaanle konle dadeɛ wɔ bɛ amaneɛnwunlɛ mekɛ nu, wɔ bɛ anzohwenlɛ mekɛ mɔɔ li awieleɛ la anu.”’+
6 “‘Ɛhye ati mekɛ ala mɔɔ mede aze la,’ Tumivolɛ Awulae Gyihova a se a, ‘Mebaziezie wɔ meamaa mogya mɔɔ bɛka bɛgua la, na mogya mɔɔ bɛka bɛgua la bavoa wɔ.+ Kɛmɔ ɛhyile mogya la ati, mogya mɔɔ bɛka bɛgua la bavoa wɔ.+
7 Mebamaa Siyɛ awoka ne mɔ ayɛ azɛlɛ mɔɔ ɛdɔ mgbane,+ na meapɛ awie biala mɔɔ ɛlɛpɛ nu nee awie biala mɔɔ ɛlɛsia la meavi ɛkɛ.
8 Mebamaa bɛdabɛ mɔɔ bɛhu bɛ la ayi ye awoka ne mɔ azo; na bɛdabɛ mɔɔ bɛwu konle dadeɛ nloa la bagugua wɔ awoka ngyikyi ne mɔ azo, wɔ mbɔnza ne mɔ yɛɛ wɔ azudenle kɔsɔɔti anu.
9 Mebamaa wɔabɔ bɔkɔɔ, na awie biala ɛnrɛdɛnla wɔ azuamgbole ne mɔ azo bieko;+ na bɛbanwu kɛ medame a mele Gyihova a.’
10 “Kɛmɔ wɔha kɛ, ‘Maanle nwiɔ ɛhye mɔ nee azɛlɛ nwiɔ ɛhye mɔ bayɛ me ɛdeɛ, na yɛbava bɛ mu nwiɔ yɛayɛ yɛ ɛdeɛ,’+ wɔ mekɛ mɔɔ Gyihova mumua ne wɔ ɛkɛ ne la ati,
11 ‘mekɛ ala mɔɔ mede aze la,’ Tumivolɛ Awulae Gyihova a se a, ‘Kɛzi ɛvale bɛ nwo ɛya na ɛhwenle bɛ nwo nungule na ɛkpɔle bɛ la, zɔhane ala a medame noko me nee wɔ bali a;+ na saa mebua wɔ ndɛne a, mebamaa bɛanwu me.
12 Na akee bɛbanwu kɛ medame Gyihova, mendele mgbane mgbane ne mɔɔ bɛhehanle bɛtiale Yizilayɛ awoka ne mɔ la amuala wɔ mekɛ mɔɔ bɛhanle kɛ, “Bɛmaa bɛdɔ mgbane yɛɛ bɛva bɛ bɛmaa yɛ kɛ yɛhye bɛ yɛli* la.”
13 Bɛdendɛle anwomemaazo nu bɛtiale me, yɛɛ bɛhehanle edwɛkɛ dɔɔnwo bɛtiale me.+ Mendele ɔ muala.’
14 “Mɔɔ Tumivolɛ Awulae Gyihova ɛha la ɛne: ‘Saa memaa ɛyɛ azɛlɛ mɔɔ ɛdɔ mgbane a, azɛlɛ ye kɔsɔɔti bali fɛlɛko.
15 Kɛ mɔɔ bɛlile fɛlɛko wɔ mekɛ mɔɔ ɛleka mɔɔ Yizilayɛma de la dɔle mgbane la, zɔhane ala a mebayɛ bɛdabɛ noko a.+ Bɛbadɔ mgbane, O Siyɛ awoka, ɛhɛe, Yidɔm amuala;+ na bɛbanwu kɛ medame a mele Gyihova a.’”
Ɔbodwɛkɛ
^ Hibulu aneɛ nu, “kɛ yɛ aleɛ.”
