Yizikeɛle 36:1-38
36 “Na wɔmɔ sonla ra, ka Yizilayɛ awoka ne mɔ anwo ngapezo na ka kɛ, ‘O Yizilayɛ awoka, bɛdie Gyihova edwɛkɛ ne.
2 Mɔɔ Tumivolɛ Awulae Gyihova ɛha la ɛne: “Kpɔvolɛ ne ɛha ye wɔ bɛ nwo kɛ, ‘Nnhee! Tete ɛzonlenlɛ ɛleka ne mɔ* bɔbɔ ɛyɛ yɛ ɛdeɛ!’”’+
3 “Ɔti ka ngapezo na ka kɛ, ‘Mɔɔ Tumivolɛ Awulae Gyihova ɛha la ɛne: “Kɛmɔ bɛmaanle bɛdɔle mgbane na bɛvile ɛleka biala bɛratetale bɛ, amaa maanle maanle ne anu amra mɔɔ nyianle bɛ ti* la ava bɛ ayɛ bɛ ɛdeɛ, na menli kɔ zo ka bɛ nwo edwɛkɛ na bɛsɛkye bɛ duma la ati,+
4 O Yizilayɛ awoka, bɛdie Tumivolɛ Awulae Gyihova edwɛkɛ ne! Mɔɔ Tumivolɛ Awulae Gyihova ɛha ɛhile awoka mgbole nee ngyikyi, azudenle nee mbɔnza, ɛleka mɔɔ ɛzɛkye na yedɔ mgbane+ nee azuamgbole mɔɔ ɛbɔ na bɛve zolɛ ninyɛne nee maanle maanle mɔɔ ɛbɔ bɛ ɛyia mɔɔ bɛnyia bɛ ti na bɛgolo bɛ nwo la ɛne;+
5 Tumivolɛ Awulae Gyihova ɛha ɛhile bɛ kɛ: ‘Mebadendɛ ɛya wuluwulu zo+ meatia maanle maanle mɔɔ ɛnyia bɛ ti nee Yidɔm amuala, bɛdabɛ mɔɔ bɛvale fɛlɛkolilɛ nee agolobɛnwo+ bɛhanle kɛ bɛva me azɛlɛ ne bɛyɛ bɛ ɛdeɛ, bɛbava ye adidileka ne mɔ na bɛave zolɛ ninyɛne la.’”’+
6 “Ɔti ka Yizilayɛ azɛlɛ ne anwo ngapezo, na ka kile awoka mgbole nee ngyikyi, azudenle ne mɔ yɛɛ mbɔnza ne mɔ kɛ, ‘Mɔɔ Tumivolɛ Awulae Gyihova ɛha la ɛne: “Bɛnlea, me nye ɛbolo yɛɛ meva ɛya a melɛtendɛ a, ɔluakɛ maanle maanle ne mɔ ɛgua bɛ nyunlu aze.”’+
7 “Ɛhye ati mɔɔ Tumivolɛ Awulae Gyihova ɛha la ɛne: ‘Medame mumua ne memaa me sa zo meha ndane kɛ maanle maanle mɔɔ ɛbɔ bɛ ɛyia la babɔ anyiemgba.+
8 Noko bɛmɛ, O Yizilayɛ awoka, bɛbakpakye ngane na bɛazo ma bɛamaa me menli Yizilayɛma,+ ɔluakɛ ɔnrɛhyɛ bɛbazia bɛara.
9 Ɔluakɛ me nee bɛ lua, na mebahakyi me nye bɛ nwo zo, na bɛbazo ɛya na bɛalua ma wɔ nu.
10 Mebamaa bɛ menli ne anwo azo—Yizilayɛma amuala, bɛ kɔsɔɔti—na menli bɛadɛnlɛdɛnla azuamgbole ne mɔ azo+ na bɛakyekye ɛleka ne mɔ mɔɔ ɛzɛkye la bieko.+
11 Ɛhɛe, mebamaa bɛ menli ne nee bɛ nyɛmoa ayɛ dɔɔnwo;+ bɛ nwo bazo na bɛawo dɔɔnwo. Na mebamaa menli aradɛnla bɛ avinli kɛ dɛba ne la,+ na mebamaa bɛakpazi bɛadɛla dɛba ne;+ na bɛbanwu kɛ medame a mele Gyihova a.+
12 Mebamaa menli—me menli Yizilayɛma—alua bɛ azɛlɛ ne azo, na bɛbava bɛ bɛayɛ bɛ ɛdeɛ.+ Bɛbayɛ bɛ agyapadeɛ, na bɛnrɛmaa bɛnrɛyɛ mota bieko.’”+
13 “Mɔɔ Tumivolɛ Awulae Gyihova ɛha la ɛne: ‘Kɛmɔ bɛlɛka bɛahile wɔ kɛ, “Ɛle azɛlɛ mɔɔ ɛdi menli na ɛku wɔ maanle ne anu ngakula la ati,”’
14 ‘ɛnrɛli menli anzɛɛ ɛnrɛhu wɔ maanle ne anu ngakula bieko,’ Tumivolɛ Awulae Gyihova a se a.
15 ‘Menrɛmaa maanle maanle ne mɔ ɛnrɛbɔ wɔ aholoba bieko anzɛɛ menrɛmaa menli ɛnrɛdendɛ ɛnrɛtia wɔ bieko,+ na ɛnrɛmaa wɔ maanle maanle ne mɔ ɛnrɛkpo aze bieko,’ Tumivolɛ Awulae Gyihova a se a.”
16 Na Gyihova nee me dendɛle bieko kɛ:
17 “Sonla ra, mekɛ mɔɔ ɛnee Yizilayɛma de bɛ azɛlɛ ne azo la, bɛvale bɛ ndenle nee bɛ nyɛleɛ bɛguale nwolɛ evinli.+ Wɔ me nye zo, ɛnee bɛ ndenle nu le evinli kɛ amozi mɔɔ raalɛ kɛhɔ la.+
18 Ɔti menwolale me ɛya ne menguale bɛ nwo zo ɔlua mogya mɔɔ bɛhanle bɛguale azɛlɛ ne azo+ nee bɛ kyibadeɛ ananze* ne mɔ mɔɔ bɛvale bɛguale azɛlɛ ne anwo evinli la ati.+
19 Ɔti membɔle bɛ asande mengɔnguale maanle maanle ne mɔ anu na memkpondenle bɛ wɔ azɛlɛ ne mɔ azo.+ Membuale bɛ ndɛne kɛ mɔɔ bɛ ndenle nee bɛ nyɛleɛ ne mɔ de la.
20 Noko mekɛ mɔɔ bɛhɔle maanle maanle zɔhane mɔ anu la, menli hanle bɛ nwo edwɛkɛ vale guale me duma nwuanzanwuanza ne+ anwo evinli kɛ, ‘Ɛhye mɔ le Gyihova menli, noko ɛnee ɔwɔ kɛ bɛfi ye azɛlɛ ne azo.’
21 Ɔti mebahile kɛ me duma nwuanzanwuanza ne mɔɔ Yizilayɛma guale nwolɛ evinli wɔ maanle maanle ne mɔ mɔɔ bɛhɔle zo la anu la anwo hyia me.”+
22 “Ɛhye ati ka kile Yizilayɛma kɛ, ‘Mɔɔ Tumivolɛ Awulae Gyihova ɛha la ɛne: “Tɛ bɛdabɛ bɛ ti a melɛyɛ ɛhye a, O Yizilayɛma, emomu me duma nwuanzanwuanza ne mɔɔ bɛguale nwolɛ evinli wɔ maanle maanle ne mɔ mɔɔ bɛhɔle zo la anu la ati ɔ.”’+
23 ‘Nɔhalɛ nu, mebade me duma kpole ne+ mɔɔ bɛguale nwolɛ evinli wɔ maanle maanle ne mɔ anu, duma ne mɔɔ bɛguale nwolɛ evinli wɔ bɛ avinli la anwo; na saa mekile me nwuanzanwuanzayɛlɛ ne wɔ bɛ nu wɔ bɛ nyunlu ɛkɛ ne a, maanle maanle ne mɔ banwu kɛ medame a mele Gyihova a,’+ Tumivolɛ Awulae Gyihova a se a.
24 ‘Mebaye bɛ meavi maanle maanle ne mɔ anu na meaboɔboa bɛ nloa meavi azɛlɛ ne kɔsɔɔti azo bieko na meava bɛ meara bɛ azɛlɛ ne azo.+
25 Mebakponde nzule mɔɔ anye te la wɔ bɛ nwo, na bɛ nwo bade;+ mebamaa bɛ nwo ade avi bɛ evinli kɔsɔɔti+ nee bɛ kyibadeɛ ananze ne mɔ amuala anwo.+
26 Mebamaa bɛ ahonle fofolɛ+ na meava sunsum fofolɛ meawula bɛ nu.+ Mebaye bolɛ ahonle ne meavi bɛ sonlabaka ne mɔ anu+ na meamaa bɛ nwonane ahonle.*
27 Mebava me sunsum ne meawula bɛ nu, na meamaa bɛava me mɛla ne mɔ bɛalua,+ na bɛbadie na bɛali me ndɛnebualɛ ne mɔ azo.
28 Akee bɛbadɛnla azɛlɛ ne mɔɔ menvale memaanle bɛ nenyia mɔ la azo, na bɛbayɛ me menli na medame noko meayɛ bɛ Nyamenle.’+
29 “‘Mebaye bɛ nwo evinli kɔsɔɔti meavi ɛkɛ na meaha meahile ma kɛ ɔzo dɔɔnwo, na menrɛmaa ɛhɔne ɛnrɛhu bɛ.+
30 Mebamaa ma mɔɔ wɔ mbaka zo la nee azɛlɛ ne azo aleɛ ayɛ dɔɔnwo, amaa ɛhɔne angua bɛ nyunlu aze wɔ maanle maanle ne mɔ anu bieko.+
31 Akee bɛbahakye bɛ ninyɛndane nee bɛ nyɛleɛ ne mɔ mɔɔ ɛnle kpalɛ la, na bɛ fɔlɛlilɛ nee bɛ bɛkyi nyɛleɛ ne mɔ ati, bɛbahyi bɛ nwo.+
32 Noko bɛnwu ye kɛ: Tɛ bɛdabɛ bɛ ti a melɛyɛ ɛhye a,’+ Tumivolɛ Awulae Gyihova a se a. ‘Emomu, bɛ ndenle ne mɔ ati, bɛmaa ɔyɛ bɛ nyiane na bɛ nyunlu ɛgua aze, O Yizilayɛma.’
33 “Mɔɔ Tumivolɛ Awulae Gyihova ɛha la ɛne: ‘Kenle mɔɔ mebaye bɛ nwo fɔlɛlilɛ kɔsɔɔti meavi ɛkɛ ne la, mebamaa menli aradɛnla azuamgbole ne mɔ azo+ na bɛakyekye ɛleka ne mɔ mɔɔ ɛzɛkye la bieko.+
34 Bɛbazo azɛlɛ ne mɔɔ ɛdɔ mgbane mɔɔ awie biala mɔɔ ɛlɛpɛ nu wɔ ɛkɛ la nwunle kɛ yedɔ mgbane la.
35 Na menli baha kɛ: “Azɛlɛ ne mɔɔ dɔle mgbane la ɛyɛ kɛ Yidɛn tola ne la,+ yɛɛ azuamgbole ne mɔ mɔɔ zɛkyele na bɛdɔle mgbane na bɛbubule bɛguale aze la, kɛkala bɛlie nwolɛ bane yɛɛ menli de ɛkɛ.”+
36 Na maanle maanle mɔɔ ɛha mɔɔ bɛbɔ bɛ bɛyia la bɛanwu kɛ medame Gyihova mumua ne, mekyekye mɔɔ bɛbubule ye bɛguale aze la, yɛɛ melua mɔɔ dɔle mgbane la. Medame, Gyihova mumua ne, medendɛ na meyɛ noko.’+
37 “Mɔɔ Tumivolɛ Awulae Gyihova ɛha la ɛne: ‘Eza mebamaa Yizilayɛma abiza me na meayɛ ɛhye meamaa bɛ: Mebamaa bɛ menli ne anwo azo kɛ mboane ekpunli.
38 Bɛbayɛ kɛ nwuanzanwuanzama ekpunli, kɛ Gyɛlusalɛm mboane ekpunli* wɔ ye ɛvoyia mekɛ nu la,+ menli ekpunli dɔɔnwo bayi azuamgbole ne mɔ mɔɔ zɛkyele la azo;+ na bɛbanwu kɛ medame a mele Gyihova a.’”
Ɔbodwɛkɛ
^ Hibulu aneɛ nu, “ɛleka mɔɔ wɔ anwuma la.”
^ Hibulu aneɛ nu, “mɔɔ ɛha.”
^ Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
^ Ɛhye kile, ahonle mɔɔ di Nyamenle adehilelɛ nzi.
^ Anzɛɛ ɔkola ɔkile, “kɛ mboane ekpunli mɔɔ bɛfa bɛbɔ afɔle wɔ Gyɛlusalɛm la.”
