Yizikeɛle 37:1-28
37 Gyihova asa rale me nwo zo, na Gyihova luale ye sunsum ne azo ɔvale me ɔhɔle azɛlɛ sɛsɛ ne avinli,+ na ɛnee mbowule ngome.
2 Ɔvale me ɔkpɔsale bɛ avinli, na menwunle kɛ ɛnee mbowule dɔɔnwo kpalɛ gugua azɛlɛ sɛsɛ ne azo, na bɛwe kpalɛ.+
3 Ɔbizale me kɛ: “Sonla ra, asoo mbowule ɛhye mɔ bahola anyia ngoane?” Na membuale ye kɛ: “Tumivolɛ Awulae Gyihova, ɛdawɔ a ɛze a.”+
4 Ɔti ɔzele me kɛ: “Ka mbowule ɛhye mɔ anwo ngapezo na se bɛ kɛ, ‘Bɛmɛ mbowule welera, bɛdie Gyihova edwɛkɛ ne:
5 “‘Mɔɔ Tumivolɛ Awulae Gyihova ɛlɛka ahile mbowule ɛhye mɔ la ɛne: “Mebamaa ɛnwomenle awolo bɛ nu, na bɛbanyia ngoane.+
6 Mebamaa bɛanyia ndinli nee nwonane, yɛɛ mebava nwoma meafɔle bɛ nwo na meava ɛnwomenle meawula bɛ nu, na bɛara ngoane nu; na bɛbanwu kɛ medame a mele Gyihova a.”’”
7 Na menganle ngapezo kɛ mɔɔ ɔhanle ɔhilele me la. Na mɔɔ menganle ngapezo ne ala la, mendele dede bie, na mbowule ne mɔ bɔle ɔ bo hwenle bikyele bɛ nwo na ɛnee bɛ nwo ɛlɛsoa, mbowule ne mɔ rasisale zolɛ.
8 Akee menwunle kɛ ndinli nee nwonane rale nwolɛ, na nwoma rafɔlele bɛ nwo. Noko ɛnee ɛnwomenle biala ɛnle bɛ nu.
9 Akee ɔzele me kɛ: “Ka ngapezo kile anwoma ne. Sonla ra, ka ngapezo na se anwoma ne kɛ, ‘Mɔɔ Tumivolɛ Awulae Gyihova ɛha la ɛne: “O anwoma,* ɛvi anwoma nna ne mɔ anu bɛla, na bɔ fa menli ɛhye mɔ mɔɔ bɛhu bɛ la anwo zo, amaa bɛanyia ngoane.”’”
10 Ɔti menganle ngapezo kɛ mɔɔ ɔhanle ɔhilele me ala la, na ɛnwomenle rale bɛ nu, na bɛnyianle ngoane na bɛdwazole bɛgyinlanle bɛ gyakɛ azo,+ ɛnee bɛle ɛlɔne kpole kpalɛ.
11 Akee ɔzele me kɛ: “Sonla ra, mbowule ɛhye mɔ a le Yizilayɛma amuala.+ Nea bɛlɛka kɛ, ‘Yɛ mbowule ɛwe yɛɛ yɛ anyelazo ɛwie.+ Bɛpɛ yɛ bɛgua bɔkɔɔ.’
12 Ɔti ka ngapezo na se bɛ kɛ, ‘Mɔɔ Tumivolɛ Awulae Gyihova ɛha la ɛne: “Me menli, mebabukebuke bɛ nla ne mɔ azo+ na meadwazo bɛ meavi bɛ nla ne mɔ anu, na meava bɛ meara Yizilayɛ azɛlɛ ne azo.+
13 O me menli, saa mebukebuke bɛ nla ne mɔ azo na medwazo bɛ mefi bɛ nla ne mɔ anu a, bɛbanwu kɛ medame a mele Gyihova a.”’+
14 ‘Mebava me sunsum ne meawula bɛ nu na bɛara ngoane nu,+ na mebamaa bɛadɛnla bɛ azɛlɛ ne azo; na bɛbanwu kɛ medame, Gyihova a medendɛ na meyɛ a,’ Gyihova a se a.”
15 Gyihova nee me dendɛle bieko kɛ:
16 “Na wɔmɔ sonla ra, fa baka na kɛlɛ nwolɛ kɛ, ‘Ɔle Dwuda nee Yizilayɛma mɔɔ bɛboka ɔ nwo* la ɛdeɛ.’+ Eza fa baka bieko na kɛlɛ nwolɛ kɛ, ‘Ɔle Dwosefi ɛdeɛ, Yifelaem baka, yɛɛ Yizilayɛma mɔɔ bɛboka ɔ nwo* la amuala.’+
17 Akee fa bɛ bɔ nwolɛ maa bɛyɛ baka ko wɔ ɛ sa nu.+
18 Na saa wɔ menli ne* se wɔ kɛ, ‘Ɛnrɛha mɔɔ ɛhye mɔ abo kile la ɛnrɛhile yɛ ɔ?’ a,
19 ka kile bɛ kɛ, ‘Mɔɔ Tumivolɛ Awulae Gyihova ɛha la ɛne: “Mebava Dwosefi baka ne mɔɔ wɔ Yifelaem asa anu la nee Yizilayɛ mbusua mɔɔ boka ɔ nwo la, meahɔboka Dwuda baka ne anwo; na meayɛ bɛ baka ko,+ na bɛbayɛ ko wɔ me sa nu.”’
20 Ɔwɔ kɛ ɛdɛ mbaka ne mɔ mɔɔ ɛbahɛlɛhɛlɛ nwolɛ la wɔ ɛ sa nu ɛmaa bɛnwu ye.
21 “Akee ka kile bɛ kɛ, ‘Mɔɔ Tumivolɛ Awulae Gyihova ɛha la ɛne: “Mebaye Yizilayɛma meavi maanle maanle mɔɔ bɛhɔle zolɛ la anu, na mebaboɔboa bɛ nloa meavi ɛleka biala mɔɔ bɛhɔle la na meava bɛ meara bɛ azɛlɛ ne azo.+
22 Mebayɛ bɛ maanle ko wɔ azɛlɛ ne azo,+ wɔ Yizilayɛ awoka ne mɔ azo, na belemgbunli kokye anlea bɛ muala bɛ nwo zo,+ na bɛnrɛyɛ maanle nwiɔ bieko; yɛɛ bɛnrɛhyɛ bɛ nu bɛnrɛyɛ arelemgbunlililɛ nwiɔ bieko.+
23 Bɛnrɛva bɛ kyibadeɛ ananze* ne mɔ nee bɛ bɛkyi nyɛleɛ ne mɔ yɛɛ bɛ mɛladonlɛ kɔsɔɔti bɛnrɛgua bɛ nwo evinli bieko.+ Mebalie bɛ meavi nɔhalɛ mɔɔ bɛanli na bɛluale zo bɛyɛle ɛtane la amuala anu, na meade bɛ nwo. Bɛbayɛ me menli, na medame noko meayɛ bɛ Nyamenle.+
24 “‘“Me sonvolɛ Devidi bayɛ bɛ belemgbunli,+ na bɛ muala bɛbanyia mboaneneavolɛ kokye.+ Bɛbava me ndɛnebualɛ ne mɔ bɛalua na bɛali me mɛla ne mɔ azo kpalɛ.+
25 Bɛbadɛnla azɛlɛ ne mɔɔ menvale memaanle me sonvolɛ, Gyekɔbo la azo, ɛleka mɔɔ bɛ nenyia mɔ dɛnlanle la,+ na bɛbadɛnla zolɛ dahuu,+ bɛ nee bɛ mra* nee bɛ mra ne mɔ amra;+ na me sonvolɛ Devidi bayɛ bɛ kpanyinli* dahuu.+
26 “‘“Na me nee bɛ bayɛ anzodwolɛ ngyekyeleɛ;+ ɔbayɛ me nee bɛ yɛ ngyekyeleɛ dahuu. Mebamaa bɛ ɛleka bɛadɛnla na meamaa bɛ nwo azo+ na meava me ɛzonlenlɛsua ne meazie bɛ avinli dahuu.
27 Me ɛdanlɛsua* ne badɛnla bɛ avinli,* na mebayɛ bɛ Nyamenle, na bɛdabɛ noko bɛayɛ me menli.+
28 Na saa me ɛzonlenlɛsua ne wɔ bɛ avinli dahuu a, maanle maanle ne mɔ banwu kɛ medame Gyihova a mete Yizilayɛma anwo a.”’”+
Ɔbodwɛkɛ
^ Anzɛɛ “ɛnwomenle; sunsum.”
^ Anzɛɛ “mɔɔ bɛle ɔ gɔnwo mɔ.”
^ Anzɛɛ “mɔɔ bɛle ɔ gɔnwo mɔ.”
^ Hibulu aneɛ nu, “wɔ menli ne amra.”
^ Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
^ Anzɛɛ “adekilevolɛ.”
^ Hibulu aneɛ nu, “bɛ mra mrenyia.”
^ Anzɛɛ “tɛnlabelɛ; awuke.”
^ Anzɛɛ “bɛ nwo zo.”
