Yizikeɛle 4:1-17
4 “Na wɔmɔ, sonla ra, fa belekese to ɛ nyunlu ɛkɛ. Dɔlɔ suakpole wɔ zo—Gyɛlusalɛm.
2 Bɛnga ye yia,+ to bane bɛnga ye yia,+ kuohua ɛnwea* bɛnga ye yia,+ yɛ azokoɛleɛ wɔ nwolɛ, na fa konle ninyɛne* bɛnga ye yia.+
3 Fa bulalɛ tɛtɛlɛ yɛ bulalɛ bane na fa sie ɛdawɔ nee suakpole ne avinli. Akee tu ɛ nye sie nwolɛ, na bɛbabɛnga ye bɛayia; ɔwɔ kɛ ɛbɛnga ye ɛyia. Ɛhye le sɛkɛlɛneɛ maa Yizilayɛma.+
4 “Akee da wɔ bɛne zo na fa Yizilayɛma fɔlɛlilɛ ne to ɛ nwo zo.*+ Ɛbazoa bɛ fɔlɛlilɛ ne kenle dodo mɔɔ ɛbava wɔala wɔ foa ko la.
5 Na mebava kenle 390, mɔɔ le bɛ fɔlɛlilɛ ɛvolɛ ne dodo la meamaa wɔ,+ na ɛbazoa Yizilayɛma fɔlɛlilɛ ne.
6 Na ɔwɔ kɛ ɛwie ɛhye mɔ.
“Akee ɛbala bieko, wɔ wɔ fema zo, na ɛbazoa Dwudama fɔlɛlilɛ+ ne kenle 40. Meva kenle ko biala meyɛ ɛvolɛ, meva kenle ko biala meyɛ ɛvolɛ memaa wɔ.
7 Akee nyenya wɔ tɛladeɛ ne asa na kakyi ɛ nye wɔ Gyɛlusalɛm+ mɔɔ bɛbɛnga ye bɛyia la anwo, na ka ngapezo tia ye.
8 Nea! Mebava nyɛma meakyekye wɔ amaa wɔangola wɔangakyi ɛ nwo wɔanvi wɔ foa ko wɔangɔ wɔ foa ko kɔkpula kɛ mekɛ mɔɔ ɛbava wɔabɛnga ye wɔayia la bawie.
9 “Akee fa hwiiti, baale, aluba akpatala, alubandenra, atoko yɛɛ hwiiti gyɛne* gua debie ko anu na fete yɛ paano. Na kenle dodo mɔɔ ɛbava wɔala wɔ foa ko, kenle 390 ne, wɔali.+
10 Ɛbazuzu aleɛ hyikɛle 20* na wɔali ye kenle ko biala. Ɛbali ye wɔ mekɛ nloa nee mekɛ nloa.
11 “Yɛɛ ɛbazuzu nzule na wɔanlo, litili foa ko.* Ɛbanlo ye wɔ mekɛ nloa nee mekɛ nloa.
12 “Ɛbali ye kɛ mɔɔ bɛdi baale paano kunguma la; ɛbava sonla ebinli welera a wɔawuda senle wɔado ye wɔ bɛ nyunlu ɛkɛ a.”
13 Gyihova doale zo zele ye kɛ: “Kɛ Yizilayɛma bɛali bɛ aleɛ—mɔɔ nwolɛ ɛnde la—wɔ maanle maanle mɔɔ mebabɔ bɛ asande meahɔgua zo la anu la ɛne.”+
14 Akee menganle kɛ: “Kyɛkyɛ, Tumivolɛ Awulae Gyihova! Ɔvi me ngakula nu too mɔɔ yeradwu ɛnɛ la, metɛdile nane funli anzɛɛ nane mɔɔ bɛtete ye nu+ la ɛlɛ metɛguale me nwo* evinli, yɛɛ nane biala mɔɔ anwo ɛnde la* ɛtɛkanle me nloa.”+
15 Ɔti ɔzele me kɛ: “Ɔle kpalɛ, mebamaa wɔava ɛnlankɛ ebinli na wɔagyakyi sonla ebinli ne, na wɔado wɔ paano ne wɔ zo.”
16 Na ɔzele me kɛ: “Sonla ra, nea mebazɛkye ɛleka mɔɔ ɛfa wɔ aleɛ ɛsie* wɔ Gyɛlusalɛm la,+ na bɛbava adwenleadwenle kpole bɛali aleɛ mɔɔ bɛzuzu la,+ yɛɛ bɛbava ɛzulolɛ bɛanlo nzule mɔɔ bɛzuzu la.+
17 Ɛhye bazi amaa aleɛ nee nzule mɔɔ bɛnnyia ye la ati, bɛanleɛnlea bɛ nyunlu azibɛnwo nu na bɛanwa ɔlua bɛ nvonleɛ ti.
Ɔbodwɛkɛ
^ Anzɛɛ “awolɛ.”
^ Ɛhye le akodeɛ mɔɔ bɛfa bɛbubu suakpole nlenkɛ mgbole nee ye bane bɛgua a.
^ Hibulu aneɛ nu, “ɔ nwo zo,” ɛhye le, Yizikeɛle bɛne zo.
^ Hibulu edwɛkɛkpɔkɛ ne kile hwiiti bie mɔɔ ɛnle kpalɛ mɔɔ ɛnee bɛdua ye wɔ tete Yigyibiti la.
^ Anzɛɛ “me ɛkɛla ne anwo.”
^ Anzɛɛ “nane nvoanle biala.”
^ Hibulu aneɛ nu, “mebabubu wɔ mbaka mɔɔ ɛkendɛhenda paano wɔ zo la anu.” Ɔkola ɔkile mbaka mɔɔ bɛkendɛhenda paano mɔɔ bɛfa bɛazie wɔ zo la.”