Yizikeɛle 40:1-49
40 Mɔɔ yɛhɔle akɛlɛzonlenlɛ nu la, ye ɛvolɛ 25 ne,+ ye siane ne mɔɔ limoa la, ye kenle bulu ne, mɔɔ bɛzɛkyele suakpole ne la anzi, ye ɛvolɛ 14 ne azo,+ kenle ko zɔhane ala, Gyihova asa rale me nwo zo na ɔvale me ɔhɔle suakpole ne azo.+
2 Ɔluale Nyamenle ɛnyelɛzodeɛnwunlɛ zo ɔvale me ɔrale Yizilayɛ azɛlɛ ne azo, ɔvale me ɔhɔziele boka tendenle bie azo+ na ɛnee debie bie wɔ zo, ɔle kɛ suakpole la wɔ nyiakɛ afoa nu.
3 Mɔɔ ɔvale me ɔhɔle ɛkɛ ne la, menwunle nrenyia bie mɔɔ ɔ nwo ta kɛ kɔbele la.+ Ɛnee ɔlɛ bolɔfodɔ* nyɛma nee ɛzuzulɛ baka* ɔ sa nu,+ na ɔgyi anlenkɛ kpole ne anloa.
4 Nrenyia ne zele me kɛ: “Sonla ra, nea ye kpalɛ, tie ye kpalɛ, na fa wɔ adwenle kɔ* debie biala mɔɔ mefa meahile wɔ la azo, ɔluakɛ ɛhye ati a bɛ nee wɔ ɛra ɛke a. Ka debie biala mɔɔ ɛbanwu ye la kile Yizilayɛma.”+
5 Menwunle kɛ bɛlie ɛzonlenlɛsua* ne anwo bane bɛyia. Ɛnee nrenyia ne lɛ ɛzuzulɛ baka mɔɔ ye tendenle le kubit nsia la ɔ sa nu (kubit ko biala, bɛvale bɛ sa mrɛlɛsɛka nna tɛtɛlɛ ko bɛdole zo).* Ɔzuzule bane ne, na ɛnee ye ɛzamo le baka ne ko yɛɛ ye anwumahɔlɛ noko le baka ne ko.
6 Akee ɔrale anlenkɛ kpole ne mɔɔ anye kile aduduleɛ la+ anwo na ɔvole ye kpolike ne azo. Mekɛ mɔɔ ɔzuzule anlenkɛ kpole ne anyunlu la, ɛnee ye tɛtɛlɛ le baka ne ko, yɛɛ anlenkɛ kpole ko ne noko anyunlu le baka ne ko.
7 Sinzavolɛma azua ne mɔ ko biala tendenle le baka ne ko yɛɛ ye tɛtɛlɛ noko le baka ne ko, na ndenle mɔɔ deda sinzavolɛma azua ne mɔ avinli la le kubit nnu.+ Anlenkɛ kpole ne mɔɔ wɔ abenlana ne mɔɔ ye anlenkɛ kpole ne anye kile ɛzonlenlɛsua ne anwo la anyunlu le baka ne ko.
8 Ɔzuzule anlenkɛ kpole ne mɔɔ kɔ ɛzonlenlɛsua ne anwo la abenlana ne, na ɛnee ɔle baka ne ko.
9 Akee ɔzuzule anlenkɛ kpole ne abenlana ne, ɔle kubit mɔtwɛ; na ɔzuzule nwolɛ mpila ne mɔ, ɔle kubit nwiɔ; na anlenkɛ kpole ne abenlana ne wɔ ɛleka mɔɔ ɔ nye kile ɛzonlenlɛsua ne la.
10 Ɛnee sinzavolɛma azua ne mɔ nsa wɔ aduduleɛ anlenkɛ kpole ne foa ko yɛɛ nsa noko wɔ ye foa ko. Nsa ne amuala mgbole sɛ, yɛɛ mpila mɔɔ gyigyi bɛ foa ko nee bɛ foa ko la amuala mgbole sɛ.
11 Akee ɔzuzule anlenkɛ kpole ne anloa anu tɛtɛlɛ ne, ɔle kubit 10; yɛɛ anlenkɛ kpole ne tendenle le kubit 13.
12 Bane ezinra ne mɔɔ bɛlie ye wɔ sinzavolɛma azua ne mɔ anyunlu wɔ foa ko nee foa ko la le kubit ko. Sinzavolɛma azua ne mɔ mɔɔ wɔ foa ko nee foa ko la anu ko biala le kubit nsia.
13 Akee ɔzuzule anlenkɛ kpole ne ɔvi sinzavolɛma sua* ne ko ati zo mɔɔ kɔ fofolɛ ti zo la, na ɛnee ye tɛtɛlɛ le kubit 25; ɛnee nlenkɛ ne mɔ anye bobɔ zo.+
14 Akee ɔzuzule nwolɛ mpila ne mɔ, bɛ ndendenle le kubit 60, yɛɛ mpila ne mɔ mɔɔ gyigyi nlenkɛ mgbole ne mɔ anwo nee alienwo ɛkɛ ne amuala la.
15 Ɔvi anlenkɛ kpole ne anuhɔlɛ ne anyunlu mɔɔ kɔdwu abenlana ne anyunlu wɔ anlenkɛ kpole ne akunlu nehane la le kubit 50.
16 Nvɛnzɛlɛ mɔɔ bɛ kunlu tɛlɛ na bɛ findezo kua nwo*+ la gugua sinzavolɛma azua ne mɔ nee mpila ne mɔ anwo wɔ anlenkɛ kpole ne anwo wɔ ye foa ko nee ye foa ko. Na nvɛnzɛlɛ wɔ abenlana ne mɔ akunlu nehane wɔ ye foa ko nee ye foa ko, yɛɛ bɛli mrɛlɛ adwinli+ bɛgua mpila ne mɔ anwo.
17 Akee ɔvale me ɔrale findezo alienwo ɛkɛ, na menwunle aleɛlilɛ azua*+ ne mɔ nee adenle ne mɔɔ bɛva awolɛ bɛyɛ mɔɔ bɛnga alienwo ɛkɛ ne yia la. Ɛnee aleɛlilɛ azua 30 gyigyi adenle ne mɔɔ bɛva awolɛ bɛyɛ la azo.
18 Adenle ne mɔɔ bɛva awolɛ bɛyɛ mɔɔ wɔ nlenkɛ mgbole ne mɔ foa ko la tendenle nee nlenkɛ mgbole ne mɔ ndendenle sɛ—adenle ɛhye mɔɔ bɛva awolɛ bɛyɛ la wɔ aze.
19 Akee ɔzuzule ɔvile anlenkɛ kpole ne mɔɔ wɔ aze la anloa ɔhɔdwule ɔ kunlu lɔ alienwo ne anloa.* Ye aduduleɛ le kubit 100 yɛɛ ye sɔlɔ noko zɔhane ala.
20 Anlenkɛ kpole bie mɔɔ ɔ nye kile sɔlɔ la wɔ findezo alienwo ɛkɛ, na ɔzuzule ye tendenle nee ye tɛtɛlɛ.
21 Ɛnee sinzavolɛma azua nsa wɔ ye foa ko yɛɛ nsa wɔ ye foa ko. Ye mpila ne mɔ nee ye abenlana ne mgbole le kɛ alimoa ɛdeɛ ne ala la. Ye tendenle le kubit 50 yɛɛ ye tɛtɛlɛ le kubit 25.
22 Ye nvɛnzɛlɛ ne mɔ, ye abenlana yɛɛ mrɛlɛ adwinli ne mɔɔ bɛli bɛgua nwolɛ+ la mgbole le kɛ aduduleɛ anlenkɛ ne anwo ɛdeɛ ne ala la. Menli tudu agyakɛ nsuu wɔ kpolike ne azo na bɛadwu ɛkɛ, na ye abenlana ne wɔ bɛ nyunlu ɛkɛ.
23 Ɛnee anlenkɛ kpole ko wɔ ɔ kunlu lɔ alienwo ɛkɛ mɔɔ ɔ nee sɔlɔ anlenkɛ kpole ne anye bɔ zo yɛɛ ko noko nee aduduleɛ anlenkɛ kpole ne anye bɔ zo. Ɔzuzule adenle mɔɔ vi anlenkɛ kpole ko anwo ɔkɔ ko ne noko anwo la, na ɛnee ɔle kubit 100.
24 Eza ɔvale me ɔrale nyiakɛ afoa nu, na menwunle anlenkɛ kpole ko wɔ nyiakɛ ɛkɛ.+ Ɔzuzule nwolɛ mpila ne mɔ nee ye abenlana ne, na bɛ mgbole le kɛ ɛhendeɛ ne mɔ ala la.
25 Nvɛnzɛlɛ wɔ ye foa ko nee ye foa ko yɛɛ ye abenlana ne, bɛle kɛ nvɛnzɛlɛ ɛhendeɛ ne mɔ ala la. Ye tendenle le kubit 50 yɛɛ ye tɛtɛlɛ le kubit 25.
26 Kpolike nsuu mɔɔ bɛfo zo bɛkɔ ɛkɛ ne la wɔ ɛkɛ,+ na ye abenlana ne wɔ bɛ nyunlu ɛkɛ. Bɛli mrɛlɛ adwinli bɛgua ye mpila ne mɔ anwo, ko wɔ ye foa ko yɛɛ ko noko wɔ ye foa ko.
27 Anlenkɛ kpole ko mɔɔ ɔ nye kile nyiakɛ afoa nu la wɔ ɔ kunlu lɔ alienwo ɛkɛ; ɔzuzule adenle mɔɔ vi anlenkɛ kpole ko anwo ɔkɔ ko ne noko anwo la wɔ nyiakɛ afoa nu, na ɛnee ɔle kubit 100.
28 Eza ɔvale me ɔluale nyiakɛ anlenkɛ kpole ne anu ɔhɔle ɔ kunlu lɔ alienwo ɛkɛ; mɔɔ ɔzuzule nyiakɛ anlenkɛ kpole ne la, ɛnee ye kpole le kɛ ɛhendeɛ ne mɔ ala la.
29 Ye sinzavolɛma azua ne mɔ, ye mpila ne mɔ nee ye abenlana ne mgbole le kɛ ɛhendeɛ ne mɔ ala la. Nvɛnzɛlɛ wɔ ye foa ko nee ye foa ko yɛɛ ye abenlana ne anwo. Ye tendenle le kubit 50 yɛɛ ye tɛtɛlɛ le kubit 25.+
30 Abenlana wɔ nwolɛ amuala; bɛ ndendenle le kubit 25 yɛɛ bɛ tɛtɛlɛ le kubit 5.
31 Ye abenlana ne anye kile findezo alienwo ɛkɛ, na bɛli mrɛlɛ adwinli bɛgua ye mpila ne mɔ anwo,+ yɛɛ bɛtudu agyakɛ mɔtwɛ wɔ kpolike ne azo na bɛahɔ ɛkɛ.+
32 Mɔɔ ɔvale me ɔvile aduduleɛ ɔrale ɔ kunlu lɔ alienwo ɛkɛ ne la, ɔzuzule anlenkɛ kpole ne, na ye kpole le kɛ ɛhendeɛ ne mɔ ala la.
33 Ye sinzavolɛma azua ne mɔ, ye mpila ne mɔ nee ye abenlana ne mgbole le kɛ ɛhendeɛ ne mɔ ala la, na nvɛnzɛlɛ wɔ ye foa ko nee ye foa ko yɛɛ ye abenlana ne anwo. Ye tendenle le kubit 50 yɛɛ ye tɛtɛlɛ le kubit 25.
34 Ye abenlana ne anye kile findezo alienwo ɛkɛ, na bɛli mrɛlɛ adwinli bɛgua ye mpila mɔɔ wɔ ye foa ko nee ye foa ko amuala la anwo, yɛɛ bɛtudu agyakɛ mɔtwɛ wɔ kpolike ne azo na bɛahɔ ɛkɛ.
35 Akee ɔvale me ɔrale sɔlɔ anlenkɛ kpole ne+ anwo na ɔzuzule; ye kpole le kɛ ɛhendeɛ ne mɔ ala la.
36 Ye sinzavolɛma azua ne mɔ, ye mpila ne mɔ nee ye abenlana ne mgbole le kɛ ɛhendeɛ ne mɔ ala la. Nvɛnzɛlɛ wɔ ye foa ko nee ye foa ko. Ye tendenle le kubit 50 yɛɛ ye tɛtɛlɛ le kubit 25.
37 Nwolɛ mpila ne mɔ anye kile findezo alienwo ɛkɛ, na bɛli mrɛlɛ adwinli bɛgua ye mpila mɔɔ wɔ ye foa ko nee ye foa ko amuala la anwo, yɛɛ bɛtudu agyakɛ mɔtwɛ wɔ kpolike ne azo na bɛahɔ ɛkɛ.
38 Aleɛlilɛ sua mɔɔ ye adenle ne bikye nlenkɛ mgbole ne mɔ mpila ne mɔ anwo la wɔ ɛkɛ, na ɛkɛ ne a bɛwowo ɛyelalɛ afɔlebɔdeɛ ne amuala anwo a.+
39 Ɛkponle nwiɔ gyigyi abenlana ne mɔɔ wɔ anlenkɛ kpole ne anwo la foa ko yɛɛ nwiɔ noko gyigyi ye foa ko, mɔɔ bɛku ɛyelalɛ afɔlebɔdeɛ,+ ɛtane afɔlebɔdeɛ+ yɛɛ fɔlɛlilɛ afɔlebɔdeɛ+ wɔ zo a.
40 Wɔ adenle ne mɔɔ kɔ sɔlɔ anlenkɛ kpole ne anloa la anu, ɛkponle nwiɔ gyigyi anuhɔlɛ ne. Yɛɛ ɛkponle nwiɔ noko gyigyi anlenkɛ kpole ne abenlana ne anu.
41 Ɛkponle nna gyigyi anlenkɛ kpole ne foa ko yɛɛ nna noko gyigyi ye foa ko—ɔ muala le ɛkponle mɔtwɛ—mɔɔ bɛku afɔlebɔdeɛ wɔ zo a.
42 Awolɛ mɔɔ bɛze la a bɛvale bɛyɛle ɛkponle nna ne mɔɔ bɛbɔ ɛyelalɛ afɔle ne wɔ zo la a. Bɛ ndendenle le kubit ko nee foa, bɛ tɛtɛlɛ le kubit ko nee foa, yɛɛ bɛ anwumahɔlɛ le kubit ko. Zolɛ a bɛfa ninyɛne mɔɔ bɛfa bɛku ɛyelalɛ afɔlebɔdeɛ ne mɔ yɛɛ afɔlebɔdeɛ mɔɔ ɛha la bɛgua a.
43 Ndaboa mɔɔ bɛ tɛtɛlɛ le kɛ bɛ sa mrɛlɛsɛka nna tɛtɛlɛ la bobɔ bane ne anwo wɔ ɔ kunlu nehane amuala mɔɔ bɛfa ninyɛne bɛsiezie zo a; na bɛfa nane mɔɔ bɛkɛva bɛkɛbɔ ahyɛlɛ afɔle la bɛgugua ɛkponle ne mɔ azo.
44 Edwɛndovoma+ aleɛlilɛ sua ne wɔ suakunlu ɛkɛ ne anlenkɛ kpole ne alienwo; bɛwɔ ɔ kunlu lɔ alienwo ɛkɛ, bɛbikye sɔlɔ anlenkɛ kpole ne anwo, bɛ nye kile nyiakɛ. Aleɛlilɛ sua bieko bikye aduduleɛ anlenkɛ kpole ne anwo, ɔ nye kile sɔlɔ.
45 Ɔzele me kɛ: “Aleɛlilɛ sua ɛhye mɔɔ ɔ nye kile nyiakɛ la le ɛsɔfoma mɔɔ nea ɛzonlenlɛsua ne anu gyima ne mɔ azo la ɛdeɛ.+
46 Aleɛlilɛ sua ne mɔɔ ɔ nye kile sɔlɔ la le ɛsɔfoma ne mɔɔ bɛnea afɔlemokyea ne anwo gyima ne azo la ɛdeɛ.+ Bɛmɛ a le Zeedɔko abozoamra+ mɔɔ bɛvi Livae abusua ne anu mɔɔ bɛye bɛ kɛ bɛrɛla Gyihova anyunlu bɛrayɛ ye gyima ne la.”+
47 Akee ɔzuzule ɔ kunlu lɔ alienwo ɛkɛ. Ye tendenle le kubit 100 yɛɛ ye tɛtɛlɛ le kubit 100, ye afoa nna ne mɔ amuala sɛ. Afɔlemokyea ne wɔ ɛzonlenlɛsua ne anyunlu.
48 Akee ɔvale me ɔhɔle ɛzonlenlɛsua ne abenlana ne anu,+ na ɔzuzule abenlana ne anwo pila ne, na ye foa ko le kubit nnu yɛɛ ye foa ko noko le kubit nnu. Anlenkɛ kpole ne foa ko tɛtɛlɛ le kubit nsa yɛɛ ye foa ko ne noko le kubit nsa.
49 Abenlana ne tendenle le kubit 20 yɛɛ ye tɛtɛlɛ le kubit 11.* Menli fo kpolike ne na bɛahɔ ɛkɛ. Mpila gyigyi nwolɛ, ko gyi ye foa ko yɛɛ ko noko gyi ye foa ko.+
Ɔbodwɛkɛ
^ Ɔle kɛ fiene la.
^ Hibulu aneɛ nu, “fa wɔ ahonle sie.”
^ Hibulu aneɛ nu, “ɛzuzulɛ baka mɔɔ le kubit nsia, kubit ko nee bɛ sa mrɛlɛsɛka nna tɛtɛlɛ ko.” Ɛhye kile kubit ndendenle. Nea Mok. B14.
^ Hibulu aneɛ nu, “sua.” Bɛhilele ɔ bo zɛhae wɔ tile 40-48 saa “sua” ne fale ɛzonlenlɛsua ne azua ne mɔ anzɛɛ ɛzonlenlɛsua mumua ne ala anwo a.
^ Ɔbayɛ kɛ ɔle sinzavolɛma sua ne bane ne ati zo.
^ Anzɛɛ “nvɛnzɛlɛ mɔɔ bɛpɛ bɛmaa ye foa ko ɛyɛ kpole na ye foa ɛyɛ ekyi.”
^ Anzɛɛ “menwunle ekpumgbunli.”
^ Hibulu aneɛ nu, “tɛtɛlɛ.”
^ Anzɛɛ ɔkola ɔkile, “12.”
