Yizikeɛle 41:1-26
41 Akee ɔvale me ɔhɔle ɛzonlenlɛsua ne Nwuanzanwuanza Ɛleka ne,* na ɔzuzule nwolɛ mpila ne mɔ; bɛ foa ko tɛtɛlɛ le kubit* nsia yɛɛ bɛ foa ko noko tɛtɛlɛ le kubit nsia.
2 Adenle ne tɛtɛlɛ le kubit bulu, yɛɛ bane ne mɔ mɔɔ wɔ adenle ne foa ko nee ye foa ko* la tɛtɛlɛ le kubit nnu nnu. Ɔzuzule ye tendenle ne, ɔle kubit 40, yɛɛ ye tɛtɛlɛ ne le kubit 20.
3 Akee ɔwolole ɔhɔle ɔ kunlu lɔ* na ɔhɔzuzule adenle ne anwo pila ne, na ye ɛzamo le kubit nwiɔ, yɛɛ adenle ne tɛtɛlɛ le kubit nsia. Bane ne mɔ mɔɔ wɔ adenle ne foa ko nee ye foa ko la le* kubit nsuu.
4 Eza ɔzuzule ekpumgbunli ne mɔɔ ɔ nye kile Nwuanzanwuanza Ɛleka ne la, na ɛnee ye tendenle le kubit 20 yɛɛ ye tɛtɛlɛ le kubit 20.+ Na ɔzele me kɛ: “Ɛhye a le Nwuanzanwuanza Nu Nwuanzaanwu Ɛleka* ne a.”+
5 Akee ɔzuzule ɛzonlenlɛsua ne bane ne, na ye ɛzamo le kubit nsia. Nwolɛ ekpumgbunli ne mɔ mɔɔ bɛbɔ ɛzonlenlɛsua ne bɛyia la biala tɛtɛlɛ le kubit nna.+
6 Nwolɛ ekpumgbunli ne mɔ le ɛbolɔnsam ndazo* nsa, ko doa ko azo, ndazo ko biala lɛ ekpumgbunli 30. Ɛnee ɛzonlenlɛsua ne bane ne mɔ lɛ bɛ bati amaa bɛasosɔ ekpumgbunli ne mɔ mbaka ne anu, na mbaka ne mɔ anwolowolo ɛzonlenlɛsua ne bane mumua ne anu.+
7 Na ekpumgbunli ne mɔ anu buke ɔvi ndazo ne mɔɔ limoa la azo ɔkɔdwu ndazo ne mɔɔ tɔ zo nsa la azo.+ Adenle mɔɔ kyeɛhyea* la wɔ ɛzonlenlɛsua ne foa ko nee ye foa ko ɔvi ndazo ne mɔɔ limoa la azo ɔkɔ ndazo ne mɔɔ tɔ zo nwiɔ yɛɛ ndazo ne mɔɔ tɔ zo nsa la azo.
8 Menwunle kɛ bama bie ɛbɛnga ɛzonlenlɛsua ne ɛyia, na nwolɛ ekpumgbunli ne mɔ adiabo ne le baka ne tendenle ko, kubit nsia wɔ ye mgbɛnezo.
9 Bane ne mɔɔ wɔ ekpumgbunli ne mɔ anzi la tɛtɛlɛ le kubit nnu. Ɛleka wienyi bie* wɔ ekpumgbunli ne mɔ anwo ɛkɛ mɔɔ boka ɛzonlenlɛsua ne anwo a.
10 Adenle mɔɔ ye foa ko nee ye foa ko tɛtɛlɛ le kubit 20 la wɔ ɛzonlenlɛsua ne nee aleɛlilɛ azua* ne mɔ+ avinli.
11 Ɛnee adenle bie la ekpumgbunli ne mɔ nee ɛleka wienyi ne avinli wɔ sɔlɔ yɛɛ ko noko wɔ nyiakɛ. Ɛleka wienyi ne mɔɔ bɛnga ye yia la tɛtɛlɛ le kubit nnu.
12 Sua ne mɔɔ wɔ adɔleɛ mɔɔ ɔ nye kile ɛleka wienyi ne la tɛtɛlɛ le kubit 70 yɛɛ ye tendenle le kubit 90; bane ne mɔɔ bɛnga sua ne yia la ɛzamo le kubit nnu.
13 Ɔzuzule ɛzonlenlɛsua ne, na ye tendenle le kubit 100. Ɛleka wienyi ne, sua ne* yɛɛ ye bane ne mɔ noko tendenle le kubit 100.
14 Ɛzonlenlɛsua ne anyunlu mɔɔ ɔkile aduduleɛ nee ɛleka wienyi ne la tɛtɛlɛ le kubit 100.
15 Ɔzuzule sua ne mɔɔ ɔ nye kile ɛleka wienyi ne mɔɔ wɔ ɔ nzi lɔ la nee ye abenlana ne mɔ mɔɔ wɔ ye foa ko nee ye foa ko la tendenle, ɔle kubit 100.
Eza ɔzuzule Nwuanzanwuanza Ɛleka ne, Nwuanzanwuanza Nu Nwuanzaanwu Ɛleka ne+ yɛɛ alienwo ɛkɛ ne abenlana ne mɔ,
16 yɛɛ nlenkɛ ne mɔ anloa, nvɛnzɛlɛ mɔɔ bɛ kunlu tɛlɛ na bɛ findezo kua nwo+ nee abenlana ne mɔ mɔɔ wɔ ɛleka nsa ɛhye mɔ la. Ɛleka mɔɔ bikye anlenkɛ ne anloa la, bɛva mbaka mɔɔ bɛze+ la bɛfɔlo azɛlɛ nwo bɛhɔdwu nvɛnzɛlɛ ne mɔ abo; na bɛheda nvɛnzɛlɛ ne mɔ anwo.
17 Bɛzuzule anlenkɛ ne anwuma nee ɛzonlenlɛsua ne akunlu nee ɔ nzi nee bane ne mɔɔ ɛbɔ nwolɛ ɛyia la.
18 Bɛli kyɛlɔbe+ nee mrɛlɛ mbaka adwinli bɛgua nwolɛ,+ arɛlɛ baka ko biala wɔ kyɛlɔbe nwiɔ avinli, yɛɛ kyɛlɔbe ko biala lɛ ɔ nyunlu nwiɔ.
19 Sonla nyunlu ne wɔ arɛlɛ baka ne mɔɔ wɔ foa ko la anwo, yɛɛ awenade* nyunlu ne wɔ arɛlɛ baka ne mɔɔ wɔ foa ko noko la anwo.+ Bɛli adwinli zɛhae bɛgua ɛzonlenlɛsua ne anwo amuala.
20 Bɛli kyɛlɔbe nee mrɛlɛ mbaka adwinli bɛgua ɛzonlenlɛsua ne bane ne anwo amuala, ɔvi aze ɔkɔdwu anlenkɛ ne anwuma.
21 Ɛzonlenlɛsua ne nlenkɛ felɛmo ne mɔ* afoa nna ne mɔ amuala sɛ.+ Ɛnee debie bie wɔ nwuanzanwuanza ɛleka ne* anyunlu mɔɔ le kɛ
22 baka afɔlemokyea+ mɔɔ ye anwumahɔlɛ le kubit nsa na ye tendenle le kubit nwiɔ la. Ɔlɛ mgbɛnezo felɛmo, yɛɛ bɛva baka a bɛyɛ ɔ bo* ne nee ye foa ko nee ye foa ko ne a. Akee ɔzele me kɛ: “Ɛhye a le ɛkponle ne mɔɔ gyi Gyihova anyunlu la.”+
23 Nwuanzanwuanza Ɛleka ne nee Nwuanzanwuanza Nu Nwuanzaanwu Ɛleka ne anu biala lɛ nlenkɛ nwiɔ.+
24 Nlenkɛ ɛhye mɔ biala lɛ ɛbonle nwiɔ mɔɔ bɛkola bɛbuke bɛkɔ ɔ nyunlu anzɛɛ ɔ nzi, ɛbonle ko biala doa zo nwiɔ.
25 Bɛli kyɛlɔbe nee mrɛlɛ mbaka adwinli bɛgua ɛzonlenlɛsua ne nlenkɛ ne mɔ anwo, bɛle kɛ bane ne mɔ anwo ɛdeɛ ne ala la.+ Ɛnee ndaboa mɔɔ bɛva bɛyɛ kpɔda la noko wɔ alienwo lɔ abenlana ne anyunlu ɛkɛ.
26 Eza nvɛnzɛlɛ mɔɔ bɛ kunlu tɛlɛ na bɛ findezo kua nwo+ la nee mrɛlɛ mbaka mɔɔ bɛli bɛ adwinli bɛgua abenlana ne foa ko nee ye foa ko, yɛɛ ɛzonlenlɛsua ne anwo ekpumgbunli ne mɔ nee kpɔda ne mɔ anwo la noko wɔ ɛkɛ.
Ɔbodwɛkɛ
^ Hibulu aneɛ nu, “ɛzonlenlɛsua ne.” Wɔ tile 41 nee tile 42, edwɛkɛ ɛhye fale Nwanzanwuanza Ɛleka ne anzɛɛ ɛzonlenlɛsua ne amuala anwo (mɔɔ Nwuanzanwuanza Ɛleka ne nee Nwuanzanwuanza Nu Nwuanzanwu Ɛleka ne boka nwo a).
^ Hibulu aneɛ nu, “adenle ne foa ko ne mɔ.”
^ Ɛhye kile, ɛzonlenlɛsua ne akunlu lɔ, anzɛɛ Nwuanzanwuanza Nu Nwuanzaanwu Ɛleka ne.
^ Hibulu aneɛ nu, “Adenle ne tɛtɛlɛ le.”
^ Anzɛɛ “Nwuanzanwuanza Kpalɛ.”
^ Anzɛɛ “nzɛzo.”
^ Ɔda ali kɛ ɔfale kpolike ne mɔ mɔɔ bɛle kutukpunli la anwo.
^ Ɔbayɛ bɛ gyakɛ abo zo adenle ɛdenraa bie mɔɔ ɛbɔ ɛzonlenlɛsua ne anwo ɛyia a.
^ Anzɛɛ “ekpumgbunli.”
^ Ɛhye kile, sua ne mɔɔ wɔ ɛzonlenlɛsua ne adɔleɛ la.
^ Anzɛɛ “awenade kakula mɔɔ anwo yɛ se.”
^ Hibulu aneɛ nu, “Anlenkɛ felɛmo ne.” Ɔbayɛ kɛ ɛhye fale Nwuanzanwuaanza Ɛleka ne anlenkɛ ne anwo.
^ Ɔbayɛ kɛ ɛhye fale Nwuanzanwuanza Nu Nwuanzaanwu Ɛleka ne anwo.
^ Hibulu aneɛ nu, “ye tendenle.”
