Yizikeɛle 42:1-20
42 Akee ɔvale me ɔhɔle findezo alienwo ɛkɛ wɔ sɔlɔ afoa nu.+ Na ɔvale me ɔrale sua ne mɔɔ aleɛlilɛ azua ne mɔ wɔ nu mɔɔ ɛvi ɛkɛ ne a ɛnee ɛlɛkɔ ɛleka wienyi ne,+ sua ne mɔɔ doa zo wɔ sɔlɔ la anwo.+
2 Ɔvi sɔlɔ anlenkɛ ne anloa mɔɔ ba la tendenle le kubit* 100, yɛɛ ye tɛtɛlɛ le kubit 50.
3 Ɔwɔ ɔ kunlu lɔ alienwo ɛkɛ mɔɔ ye tɛtɛlɛ le kubit 20+ la nee adenle ne mɔɔ bɛva awolɛ bɛyɛ mɔɔ wɔ findezo alienwo ɛkɛ ne la avinli. Ye abenlana ne mɔ anye bobɔ zo yɛɛ bɛle ɛbolɔnsam ndazo nsa.
4 Adenle bie la aleɛlilɛ azua* ne mɔ anyunlu wɔ sua ne akunlu+ nehane mɔɔ ye tɛtɛlɛ le kubit 10 yɛɛ ye tendenle le kubit 100 a,* na bɛ nlenkɛ ne mɔ anye kile sɔlɔ.
5 Anwuma aleɛlilɛ azua ne mɔ anu le ngyikyi tɛla aze nee avinli ɛdeɛ ne mɔ, ɔluakɛ bɛ abenlana ne mɔ vale bɛ ɛleka ne dɔɔnwo.
6 Ɛnee ɛbolɔnsam ne le ndazo nsa, noko bɛnlɛ mpila kɛ alienwo ne mɔ mpila ɛdeɛ ne la. Ɛhye ati a anwuma azua ne mɔ anu yɛle ngyikyi dɛlale aze nee avinli ɛdeɛ ne mɔ la.
7 Ɔ nzi lɔ bane ne mɔɔ bɛva awolɛ bɛlie mɔɔ bikye aleɛlilɛ azua ne mɔ wɔ findezo alienwo ɛkɛ ne, mɔɔ ɔ nye kile aleɛlilɛ azua ɛhendeɛ ne mɔ anwo la, tendenle le kubit 50.
8 Aleɛlilɛ azua ne mɔ mɔɔ bikye findezo alienwo ɛkɛ ne la tendenle le kubit 50, noko ɛhendeɛ ne mɔ mɔɔ bɛ nye kile ɛzonlenlɛsua ne anwo la tendenle le kubit 100.
9 Adenle la aleɛlilɛ azua ne mɔ aduduleɛ afoa nu mɔɔ bɛkola bɛdua nu bɛfi findezo alienwo ɛkɛ ne bɛkɔ ɛkɛ a.
10 Eza aleɛlilɛ azua wɔ alienwo ɛkɛ ne bane ne mɔɔ bɛva awolɛ a bɛlie la anu* wɔ aduduleɛ, bɛbikye ɛleka wienyi ne nee sua ne.+
11 Adenle bie la bɛ nyunlu ɛkɛ ne kɛ sɔlɔ aleɛlilɛ azua ne mɔ ɛdeɛ ne la.+ Bɛ ndendenle nee bɛ tɛtɛlɛ le ko, yɛɛ ndenle mɔɔ bɛdua nu bɛfinde nee kɛzi bɛsisi azua ne mɔ la le kɛ sɔlɔ ɛdeɛ ne ala la. Bɛ nlenkɛ ne mɔ
12 le kɛ aleɛlilɛ azua ne mɔ mɔɔ wɔ nyiakɛ la nlenkɛ ne mɔ. Anlenkɛ bie wɔ adenle ne mɔlebɛbo, wɔ bane ne mɔɔ bɛva awolɛ bɛlie mɔɔ wɔ aduduleɛ afoa nu la anwo ɛkɛ, ɛleka mɔɔ awie kola wolo ɛkɛ a.+
13 Akee ɔzele me kɛ: “Aleɛlilɛ azua ne mɔ mɔɔ wɔ sɔlɔ nee aleɛlilɛ azua ne mɔ mɔɔ wɔ nyiakɛ mɔɔ wɔ ɛleka wienyi ne anwo ɛkɛ ne la+ a le aleɛlilɛ azua nwuanzanwuanza ne mɔ a, ɛleka mɔɔ ɛsɔfoma mɔɔ ɛlɛkɔ Gyihova anyunlu la di afɔlebɔdeɛ nwuanzanwuanza kpalɛ ne mɔ la.+ Ɛkɛ ne a bɛfa afɔlebɔdeɛ nwuanzanwuanza kpalɛ ne mɔ, ma afɔlebɔdeɛ, ɛtane afɔlebɔdeɛ yɛɛ fɔlɛlilɛ afɔlebɔdeɛ ne mɔ bɛgua a, ɔluakɛ ɛleka ne le nwuanzanwuanza.+
14 Saa ɛsɔfo ne mɔ wolo ɛkɛ a, ɔwɔ kɛ bɛyeye bɛ adɛladeɛ ne mɔ mɔɔ bɛvale bɛyɛle gyima la, na ɔnle kɛ bɛfa bɛfi nwuanzanwuanza ɛleka ne bɛkɔ findezo alienwo ɛkɛ,+ ɔluakɛ ɛhye mɔ le nwuanzanwuanza. Bɛbawula adɛladeɛ fofolɛ kolaa na bɛahɔ ɛleka mɔɔ menli ne mɔ wɔ la.”
15 Mɔɔ ɔzuzule ɛzonlenlɛsua ne akunlu ɛleka ne mɔ* ɔwiele la, ɔvale me ɔluale anlenkɛ kpole ne mɔɔ ɔ nye kile aduduleɛ la anu ɔvindele,+ na ɔzuzule ɛkɛ ne amuala.
16 Ɔvale ɛzuzulɛ baka* ne ɔzuzule aduduleɛ afoa nu ɛdeɛ ne. Kɛ mɔɔ ɛzuzulɛ baka ne kile la, ɔvi ye foa ko kɔdwu ye foa ko le baka ne tendenle 500.
17 Ɔzuzule sɔlɔ afoa nu ɛdeɛ ne, na kɛ mɔɔ ɛzuzulɛ baka ne kile la, ɔle baka ne tendenle 500.
18 Ɔzuzule nyiakɛ afoa nu ɛdeɛ ne, na kɛ mɔɔ ɛzuzulɛ baka ne kile la, ɔle baka ne tendenle 500.
19 Ɔhakyile ɔ nye ɔhɔle adɔleɛ afoa nu. Ɔvale ɛzuzulɛ baka ne ɔzuzule baka ne tendenle 500.
20 Ɔzuzule ye afoa nna ne mɔ amuala. Bɛlie bane wɔ nwolɛ amuala+ bɛyia, ye tendenle le baka ne 500 yɛɛ ye tɛtɛlɛ noko le baka ne 500,+ amaa yeahyɛ ɛleka mɔɔ le nwuanzanwuanza nee ɛleka mɔɔ awie biala kola kɔ ɛkɛ ne la anu.+
Ɔbodwɛkɛ
^ Anzɛɛ “ekpumgbunli.”
^ Kɛ mɔɔ Giliki Septuagint ne kile la, “ye tendenle le kubit 100.” Hibulu edwɛkɛ ne kenga kɛ: “Adenle mɔɔ ye tendenle le kubit ko la.” Nea Mok. B14.
^ Hibulu aneɛ nu, “wɔ ye tɛtɛlɛ nu.”
^ Hibulu aneɛ nu, “sua ne mɔɔ wɔ ɔ kunlu lɔ.”
