Yizikeɛle 44:1-31
44 Ɔvale me ɔziale ɔrale ɛzonlenlɛsua ne findezo anlenkɛ kpole ne mɔɔ ɔ nye kile aduduleɛ la anloa,+ na ɛnee bɛdo nu.+
2 Akee Gyihova zele me kɛ: “Bɛbado anlenkɛ kpole ɛhye anu dahuu. Ɔnle kɛ bɛbuke, yɛɛ ɔnle kɛ dasanli biala dua nu; ɔluakɛ Gyihova, Yizilayɛ Nyamenle ne ɛlua nu,+ ɔti ɔwɔ kɛ bɛto nu dahuu.
3 Noko kpanyinli ne badɛnla ɛkɛ ali aleɛ wɔ Gyihova anyunlu,+ ɔluakɛ ɔle kpanyinli. Ɔbava abenlana ne anlenkɛ kpole ne anu yeara ɛkɛ, na yealua ɛkɛ ne yeavinde.”+
4 Akee ɔvale me ɔluale sɔlɔ anlenkɛ kpole ne anu ɔrale ɛzonlenlɛsua ne anyunlu. Mɔɔ meneanle la, menwunle kɛ Gyihova anyunlunyia ne ɛyi Gyihova ɛzonlenlɛsua ne anu tɛkɛɛ.+ Ɔti membutule me nyunlu aze.+
5 Akee Gyihova zele me kɛ: “Sonla ra, fa wɔ adwenle kɔ* zo, nea na tie debie biala mɔɔ fale Gyihova ɛzonlenlɛsua ne anwo ngyehyɛleɛ nwo nee nwolɛ mɛla ne mɔ mɔɔ mebaha meahile wɔ la kpalɛ. Nea ndenle mɔɔ bɛfa nu bɛkɔ ɛzonlenlɛsua ne anu nee ndenle mɔɔ bɛfa nu bɛfi ɛzonlenlɛsua ne anu bɛfinde la amuala kpalɛ.+
6 Ka kile Yizilayɛma mɔɔ ɛde atua la kɛ, ‘Mɔɔ Tumivolɛ Awulae Gyihova ɛha la ɛne: “O Yizilayɛma, bɛ bɛkyi nyɛleɛ ne mɔ ɛbo zo.
7 Saa bɛfa nyɛvolɛ mɔɔ bɛtɛpɛle bɛ mrenyiazo wɔ ahonle nee nwonane nu la bɛba me ɛzonlenlɛsua ne anu a, bɛgua me ɛzonlenlɛsua ne anwo evinli. Bɛfa paano, ɛnlome yɛɛ mogya bɛbɔ afɔle bɛmaa me wɔ mekɛ mɔɔ bɛva bɛ bɛkyi nyɛleɛ ne mɔ amuala bɛzɛkye me ngyekyeleɛ ne la.
8 Bɛannea me ninyɛne nwuanzanwuanza ne mɔ azo.+ Emomu bɛva awie mɔ kɛ bɛnlea me ɛzonlenlɛsua ne anu gyima ne mɔ azo.”’
9 “‘Mɔɔ Tumivolɛ Awulae Gyihova ɛha la ɛne: “Ɛyɛvolɛ biala mɔɔ wɔ Yizilayɛ mɔɔ bɛtɛpɛle ye mrenyiazo wɔ ahonle nu nee nwonane nu la ɛnrɛhɔ me ɛzonlenlɛsua ne anu.”’
10 “Noko Livaema mɔɔ hwenle bɛ nwo vile me nwo+ wɔ mekɛ mɔɔ Yizilayɛma hwenle bɛ nwo vile me nwo hɔlile bɛ kyibadeɛ ananze* ne mɔ anzi la, banwu bɛ nvonleɛ ne anwo amaneɛ.
11 Na bɛbayɛ azonvolɛ wɔ me ɛzonlenlɛsua ne anu bɛanlea ɛzonlenlɛsua ne nlenkɛ mgbole ne mɔ azo+ na bɛazonle wɔ ɛzonlenlɛsua ne anu. Bɛbahu nane mɔɔ bɛbava bɛabɔ ɛyelalɛ afɔle nee menli ne afɔle ne la, na bɛagyinla menli ne anyunlu bɛazonle bɛ.
12 Kɛmɔ bɛzonlenle bɛ wɔ bɛ kyibadeɛ ananze ne mɔ anyunlu na bɛyɛle azedolɛ bolɛ mɔɔ maanle Yizilayɛma yɛle ɛtane+ la ati a memaa me sa zo meha ndane metia bɛ la, na bɛbanwu bɛ nvonleɛ ne anwo amaneɛ,’ Tumivolɛ Awulae Gyihova a se a.
13 ‘Bɛnrɛra me nyunlu bɛnrɛazonle me kɛ ɛsɔfoma anzɛɛ bɛnrɛbikye me ninyɛne nwuanzanwuanza anzɛɛ nwuanzanwuanza kpalɛ ne mɔ anu biala anwo, na bɛbazoa bɛ anyiemgba ɔlua bɛkyi ninyɛne ne mɔ mɔɔ bɛyɛle la ati.
14 Noko mebamaa bɛanlea ɛzonlenlɛsua ne anu gyima ne mɔ azo, na bɛanlea ye ɛzonlenlɛ gyima ne nee debie biala mɔɔ ɔwɔ kɛ bɛyɛ ye wɔ ɛkɛ ne la amuala azo.’+
15 “‘Na Zeedɔko+ amra ne mɔ mɔɔ le Livae ɛsɔfoma mɔɔ nleanle me ɛzonlenlɛsua ne anu gyima ne mɔ azo wɔ mekɛ mɔɔ Yizilayɛma hwenle bɛ nwo vile me nwo la,+ bɛbabikye me na bɛazonle me, na bɛbagyinla me nyunlu bɛava ɛnlome+ nee mogya+ bɛabɔ afɔle bɛamaa me,’ Tumivolɛ Awulae Gyihova a se a.
16 ‘Bɛmɛ a bɛle menli mɔɔ bɛahɔ me ɛzonlenlɛsua ne anu a, na bɛbabikye me ɛkponle ne anwo bɛazonle me,+ na bɛanlea bɛayɛ bɛ gyima mɔɔ bɛyɛ bɛmaa me la.+
17 “‘Saa bɛlɛba ɔ kunlu lɔ alienwo ɛkɛ anlenkɛ kpole ne anwo a, ɔwɔ kɛ bɛwula lenen tɛladeɛ.+ Ɔnle kɛ bɛwula mboane enrinli tɛladeɛ biala wɔ mekɛ mɔɔ bɛlɛsonle wɔ ɔ kunlu lɔ alienwo ɛkɛ nlenkɛ mgbole ne mɔ anloa anzɛɛ nuhua la.
18 Ɔwɔ kɛ bɛfa lenen abotile bɛbɔ bɛ ti, na bɛwula nika mɔɔ keda bɛ ɛzɔlɛ nwo la.+ Ɔnle kɛ bɛwula debie biala mɔɔ bamaa ɛhɛlɛnra adu bɛ la.
19 Kolaa na bɛavinde bɛahɔ findezo alienwo ɛkɛ—ɛleka mɔɔ menli ne wɔ wɔ findezo alienwo ɛkɛ ne la—ɔwɔ kɛ bɛyeye bɛ adɛladeɛ ne mɔ mɔɔ bɛvale bɛhɔzonlenle la+ bɛgua aleɛlilɛ azua* nwuanzanwuanza ne mɔ anu.+ Akee bɛbawula adɛladeɛ fofolɛ, amaa bɛanlua bɛ adɛladeɛ ne mɔ azo bɛanva nwuanzanwuanzayɛlɛ* bɛangɔmaa menli ne.
20 Ɔnle kɛ bɛkpa bɛ ti enrinli+ anzɛɛ bɛgyakyi ye bɛmaa ɔyɛ ndendenle. Ɔwɔ kɛ bɛpepɛ bɛ ti enrinli ne azo ala.
21 Ɔnle kɛ ɛsɔfoma no nwanye kɔ ɔ kunlu lɔ alienwo ɛkɛ.+
22 Ɔnle kɛ bɛgya kunlavolɛ anzɛɛ raalɛ mɔɔ bɛbɔ ye ewole la;+ emomu, bɛgya raalɛ mɔɔ ɛnze nrenyia na ɔle Yizilayɛnli la anzɛɛ kunlavolɛ raalɛ mɔɔ ɛnee ɔ hu le ɛsɔfo la.’+
23 “‘Ɔwɔ kɛ bɛkilehile me menli ne ngakyile mɔɔ wɔ debie mɔɔ le nwuanzanwuanza nee debie mɔɔ ɛnle nwuanzanwuanza la avinli; na bɛmaa bɛnwu ngakyile mɔɔ wɔ debie mɔɔ anwo te nee debie mɔɔ anwo ɛnde la anu.+
24 Ɔwɔ kɛ bɛdi edwɛkɛ kɛ ndɛnebuavolɛma;+ ɔwɔ kɛ bɛbua ndɛne bɛmaa ɔ nee me ndɛnebualɛ ne mɔ yia.+ Ɔwɔ kɛ bɛdi me ɛvoyia kɔsɔɔti anwo mɛla nee ngyehyɛleɛ zo+ na bɛte me ɛnwomenlelielɛ kenle ne mɔ anwo.
25 Bɛmmakɔ dasanli biala funli nwo, anrɛɛ bɛ nwo bɛagua evinli. Noko bɛbahola bɛamaa bɛ papa, bɛ mame, bɛ ra nrenyia, bɛ ra raalɛ, bɛ diema nrenyia anzɛɛ bɛ diema raalɛ mɔɔ ɛtɛkɔle agyalɛ la funli agua bɛ nwo evinli.+
26 Na saa ɛsɔfo bie te ɔ nwo wie a, ɔwɔ kɛ ɔkendɛ kenle nsuu.
27 Kenle mɔɔ ɔbahɔ nwuanzanwuanza ɛleka ne, wɔ ɔ kunlu lɔ alienwo ɛkɛ, kɛ ɔkazonle wɔ nwuanzanwuanza ɛleka ne la, ɔwɔ kɛ ɔfa ye ɛtane afɔlebɔdeɛ ɔkɔ,’+ Tumivolɛ Awulae Gyihova a se a.
28 “‘Na bɛ agyapadeɛ ɛne: Mele bɛ agyapadeɛ.+ Bɛmmamaa bɛ agyapadeɛ biala wɔ Yizilayɛ, ɔluakɛ mele bɛ agyapadeɛ.
29 Bɛmɛ a bɛbali ma afɔlebɔdeɛ,+ ɛtane afɔlebɔdeɛ yɛɛ fɔlɛlilɛ afɔlebɔdeɛ+ ne mɔ a, na debie biala mɔɔ bɛyila zo wɔ Yizilayɛ la bayɛ bɛ ɛdeɛ.+
30 Ma mɔɔ kɛlimoa kɛbolo la kɔsɔɔti anu kpalɛ ne yɛɛ ndoboa biala mɔɔ vi bɛ ɛkɛ ne la bayɛ ɛsɔfoma ne ɛdeɛ.+ Na ɔwɔ kɛ bɛfa ma mɔɔ limoa la esamo bɛmaa ɛsɔfo ne.+ Ɛhye bamaa nyilalɛ adɛnla bɛ awuke ne mɔ anu.+
31 Ɔnle kɛ ɛsɔfoma di aloma anzɛɛ nane biala funli anzɛɛ mɔɔ bɛtete ye nu la.’+
Ɔbodwɛkɛ
^ Hibulu aneɛ nu, “fa wɔ ahonle sie.”
^ Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
^ Anzɛɛ “ekpumgbunli.”
^ Hibulu aneɛ nu, “anwondelɛ.”
