Yizikeɛle 45:1-25
45 “‘Saa bɛlɛkyɛ azɛlɛ ne kɛ bɛ agyapadeɛ a,+ anrɛɛ bɛpɛ azɛlɛ ne ɛleka nwuanzanwuanza ne bie bɛyɛ ndoboa bɛmaa Gyihova.+ Ɔwɔ kɛ ye tendenle yɛ kubit* 25,000, na ye tɛtɛlɛ yɛ kubit 10,000.+ Ɔ muala* bayɛ ɛleka nwuanzanwuanza.
2 Ɛhye anu a ɛleka nwuanzanwuanza ne mɔɔ ye tɛbanu nna ne mɔ amuala sɛ mɔɔ ye tendenle le kubit 500 na ye tɛtɛlɛ le kubit 500* la wɔ a,+ yɛɛ ɔbanyia adidileka mɔɔ le kubit 50 la wɔ ye tɛbanu ne mɔ biala azo.+
3 Suzu ɛleka mɔɔ ye tendenle le kubit 25,000 na ye tɛtɛlɛ le kubit 10,000 la wɔ nu, na yemɔ azo a ɛzonlenlɛsua ne mɔɔ le debie nwuanzanwuanza kpalɛ la bagyinla a.
4 Ɔbayɛ azɛlɛ ne anu ɛleka nwuanzanwuanza yeamaa ɛsɔfoma ne mɔ,+ ɛzonlenlɛsua ne anu sonvolɛma mɔɔ bɛba Gyihova anyunlu bɛbasonle ye la.+ Ɔbayɛ ɛleka mɔɔ bɛbasisi bɛ azua nee ɛleka nwuanzanwuanza yeamaa ɛzonlenlɛsua ne.
5 “‘Livaema mɔɔ bɛsonle wɔ ɛzonlenlɛsua ne anu la bɛanyia ɛleka mɔɔ ye tendenle le kubit 25,000 na ye tɛtɛlɛ le kubit 10,000 la,+ yɛɛ bɛbanyia aleɛlilɛ azua* 20+ kɛ bɛ agyapadeɛ.
6 “‘Bɛva ɛleka mɔɔ ye tendenle le kubit 25,000 (ɔ nee ndoboa nwuanzanwuanza ne sɛ) na ye tɛtɛlɛ le kubit 5,000 la bɛmaa kɛ suakpole ne azɛlɛ.+ Ɔbayɛ Yizilayɛma amuala ɛdeɛ.
7 “‘Na kpanyinli ne azɛlɛ ɛdeɛ ne bala ndoboa nwuanzanwuanza ne foa ko nee ɛleka mɔɔ bɛpɛ bɛdo ɛkɛ bɛmaa suakpole ne la noko foa ko. Ɔbabikye ndoboa nwuanzanwuanza ne nee suakpole ne azɛlɛ ne. Ɔbala adɔleɛ afoa nu nee aduduleɛ afoa nu. Ye tendenle, ɔvi adɔleɛ mɔɔ kɔdwu aduduleɛ la bayɛ kɛ mbusua ne mɔ ɛdeɛ ne la anu ko.+
8 Azɛlɛ ɛhye bayɛ ye agyapadeɛ wɔ Yizilayɛ. Me mgbanyima ne mɔ ɛnrɛsisi me menli ne bieko,+ na bɛbava azɛlɛ ne bɛamaa Yizilayɛma kɛ mɔɔ bɛ mbusua ne mɔ de la.’+
9 “Mɔɔ Tumivolɛ Awulae Gyihova ɛha la ɛne: ‘Yizilayɛ mgbanyima, bɛyɛ bɛmaa yebo zo!’
“‘Bɛgyakyi bɛ basabasayɛlɛ nee bɛ nzisi ne, na bɛli pɛlepɛle na bɛyɛ mɔɔ tenrɛ la.+ Bɛgyakyi me menli ne agyapadeɛ ɛlielɛ,’+ Tumivolɛ Awulae Gyihova a se a.
10 ‘Bɛva tone, yifa ɛzuzudeɛ* yɛɛ baate ɛzuzudeɛ* mɔɔ bɛdi munli la bɛzuzu ninyɛne.+
11 Ɔwɔ kɛ yifa ɛzuzudeɛ ne nee baate ɛzuzudeɛ ne yɛ ko. Ɔwɔ kɛ baate ɛzuzudeɛ ne yɛ homa* ngyɛnu bulu anu ko, yɛɛ ɔwɔ kɛ yifa ɛzuzudeɛ ne yɛ homa ngyɛnu bulu anu ko. Bɛbagyinla homa ne azo a bɛazuzu a.
12 Hyikɛle*+ ko le gilaa* 20. Na hyikɛle 20 nee hyikɛle 25 yɛɛ hyikɛle 15 bayɛ meena* ko amaa bɛ.’
13 “‘Ndoboa mɔɔ ɔwɔ kɛ bɛfa bɛmaa la ɛne: hwiiti homa ko anu yifa ngyɛnu nsia anu ko yɛɛ baale homa ko anu yifa ngyɛnu nsia anu ko.
14 Nwole dodo mɔɔ bɛbava bɛamaa la ɔwɔ kɛ gyinla baate ɛzuzudeɛ zo. Kɔɔ* ngyɛnu bulu anu ko le baate ko, na baate bulu bayɛ homa ko, ɔluakɛ baate bulu le homa ko.
15 Na wɔ Yizilayɛma nyɛmoa ne mɔ anu, ɔwɔ kɛ bɛye boane ko bɛfi mboane 200 biala anu bɛfa bɛba. Bɛbava ɛhye mɔ bɛabɔ ma afɔle,+ ɛyelalɛ afɔle+ yɛɛ anzodwolɛ afɔle,+ amaa bɛali menli ne ati mgbɔdalɛ,’+ Tumivolɛ Awulae Gyihova a se a.
16 “‘Menli mɔɔ de azɛlɛ ne azo la amuala bava ndoboa ɛhye+ arɛlɛ Yizilayɛ kpanyinli ne.
17 Noko kpanyinli ne a bava ɛyelalɛ afɔlebɔdeɛ,+ ma afɔlebɔdeɛ+ nee nza afɔlebɔdeɛ ne mɔ ara wɔ ɛvoyia mekɛ,+ siane fofolɛ, Ɛnwomenlelielɛ kenle+ nee ɛvoyia kɔsɔɔti mɔɔ ɔwɔ kɛ Yizilayɛma di la anu a.+ Ɔdaye a ɔbava ɛtane afɔlebɔdeɛ ne, ma afɔlebɔdeɛ ne, ɛyelalɛ afɔlebɔdeɛ ne nee anzodwolɛ afɔlebɔdeɛ ne mɔ yeara a, amaa bɛava bɛali Yizilayɛma ati mgbɔdalɛ.’
18 “Mɔɔ Tumivolɛ Awulae Gyihova ɛha la ɛne: ‘Wɔ siane ne mɔɔ limoa la kenle mɔɔ limoa la anu, fa ɛnlankɛ ralɛ nyinli mɔɔ te kpɔkɛ la te ɛzonlenlɛsua ne anwo fi ɛtane nwo.+
19 Ɛsɔfo ne bava ɛtane afɔlebɔdeɛ ne mogya ne bie aha ɛzonlenlɛsua ne anlenkɛ ne felɛmo ne,+ afɔlemokyea ne ndazo ne mgbɛnezo nna ne mɔ yɛɛ ɔ kunlu lɔ alienwo ɛkɛ anlenkɛ kpole ne felɛmo ne anwo.
20 Ɛhye a bɛbayɛ ye wɔ siane ne kenle mɔɔ tɔ zo nsuu la azo a, ɔluakɛ bie a awie anye ɛnla nwo anzɛɛ ɔnze yeyɛ ɛtane;+ na ɔwɔ kɛ bɛdi ɛzonlenlɛsua ne ati mgbɔdalɛ.+
21 “‘Siane ne mɔɔ limoa la kenle mɔɔ tɔ zo 14 ne azo, bɛbali Akpabɛnwo ɛvoyia ne.+ Bɛbali paano mɔɔ mgbɔvonle ɛnle nu la kenle nsuu.+
22 Kenle zɔhane, kpanyinli ne bava ɛnlankɛ ralɛ nyinli ko yeamaa bɛava bɛabɔ ɛtane nwo afɔle bɛamaa ɔdaye nee menli mɔɔ de azɛlɛ ne azo la amuala.+
23 Ɛvoyialilɛ ne kenle nsuu ne anu amuala, ɔbava nlankɛ mralɛ nyinli nsuu mɔɔ bɛte kpɔkɛ la yɛɛ mboane nyinli nsuu mɔɔ bɛte kpɔkɛ la yeabɔ ɛyelalɛ afɔle yeamaa Gyihova kenle ko biala,+ yɛɛ ɔbava abɔnkye nyinli yeabɔ ɛtane nwo afɔle kenle ko biala.
24 Eza ɔwɔ kɛ ɔfa ɛnlankɛ ralɛ nyinli biala anwo yifa ko nee boane nyinli ko biala anwo yifa ko yɛɛ yifa ko biala anwo nwole hin ko* ɔmaa kɛ ma afɔlebɔdeɛ.
25 “‘Siane ne mɔɔ tɔ zo nsuu la kenle 15 ne azo, ɔwɔ kɛ ɔfa ninyɛne ɛhye mɔ ala, ɛtane afɔlebɔdeɛ, ɛyelalɛ afɔlebɔdeɛ, ma afɔlebɔdeɛ yɛɛ nwole ne ɔmaa wɔ ɛvoyialilɛ ne kenle nsuu ne mɔ anu.’”+
Ɔbodwɛkɛ
^ Anzɛɛ “Wɔ ye ɛweɛne ne mɔ amuala anloa.”
^ Hibulu aneɛ nu, “ɛke 500 ɛke 500.”
^ Anzɛɛ “ekpumgbunli.”
