Yizikeɛle 46:1-24
46 “Mɔɔ Tumivolɛ Awulae Gyihova ɛha la ɛne: ‘Kenle nsia ne mɔɔ bɛfa bɛyɛ gyima la, ɔwɔ kɛ bɛto ɔ kunlu lɔ alienwo anlenkɛ kpole ne mɔɔ ɔ nye kile aduduleɛ la anu,+ noko saa ɔdwu Ɛnwomenlelielɛ kenle ne nee siane fofolɛ kenle ne a, ɔwɔ kɛ bɛbuke.
2 Kpanyinli ne vi alienwo nehane bava anlenkɛ kpole ne abenlana ne anu yeawolo,+ na yeagyinla anlenkɛ kpole ne felɛmo ne anwo. Ɛsɔfo ne babɔ ye ɛyelalɛ afɔle ne nee ye anzodwolɛ afɔle ne mɔ, na ɔbabutu ɔ nyunlu aze wɔ anlenkɛ kpole ne anuhɔlɛ ne na akee yeavinde yeahɔ. Noko ɔnle kɛ bɛto anlenkɛ kpole ne anu too nɔsolɛ nu.
3 Menli ne noko babutubutu bɛ nyunlu aze wɔ Gyihova anyunlu wɔ anlenkɛ kpole zɔhane anuhɔlɛ ne wɔ Ɛnwomenlelielɛ kenle nee siane fofolɛ kenle ne mɔ anu.+
4 “Ɔwɔ kɛ kpanyinli ne fa mboane mralɛ nyinli nsia mɔɔ bɛte kpɔkɛ nee boane nyinli ko mɔɔ ɔte kpɔkɛ la ɔbɔ nane mumua ɛyelalɛ afɔle ɔmaa Gyihova wɔ Ɛnwomenlelielɛ kenle ne.+
5 Ɔbava yifa* ko yeaboka boane nyinli ne anwo na yeava debie biala mɔɔ ɔbahola la yeaboka mboane mralɛ nyinli ne mɔ anwo, yɛɛ yifa ko biala anwo nwole hin* ko yeayɛ ma afɔlebɔdeɛ ne.+
6 Bɛbava ɛnlankɛ ralɛ nyinli ko, mboane mralɛ nyinli nsia yɛɛ boane nyinli ko bɛabɔ afɔle wɔ siane fofolɛ kenle ne; ɔwɔ kɛ bɛyɛ nane mɔɔ bɛte kpɔkɛ.+
7 Ɔwɔ kɛ ɔfa yifa ko ɔboka ɛnlankɛ ralɛ nyinli ne anwo, yifa ko ɔboka boane nyinli ne anwo yɛɛ debie biala mɔɔ ɔbahola ye fa la ɔboka mboane mralɛ nyinli ne mɔ anwo ɔbɔ ma afɔle ne. Na ɔwɔ kɛ ɔfa nwole hin ko ɔboka yifa ko biala anwo.
8 “‘Saa kpanyinli ne ɛlɛwolo a, ɔbava adenle ne mɔɔ la anlenkɛ kpole ne abenlana ne anu la anu a yeawolo a, na saa ɔlɛfinde noko a, ɛkɛ ne a ɔbava a.+
9 Na saa menli ne ba Gyihova anyunlu wɔ ɛvoyialilɛ mekɛ ne mɔ anu a,+ ɔwɔ kɛ menli mɔɔ bava sɔlɔ anlenkɛ kpole ne+ anu ahɔzonle la fa nyiakɛ anlenkɛ kpole ne+ anu finde, yɛɛ ɔwɔ kɛ menli mɔɔ bava nyiakɛ anlenkɛ kpole ne anu awolo nu la fa sɔlɔ anlenkɛ kpole ne anu finde. Ɔnle kɛ awie biala fa anlenkɛ kpole ne mɔɔ ɔvale nuhua ɔwolole la anu ɔfinde, ɔwɔ kɛ bɛdua anlenkɛ kpole ne mɔɔ ɔ nee mɔɔ bɛvale nuhua bɛwolole la anye bɔ zolɛ la anu a bɛfinde a.
10 Kpanyinli ne mɔɔ wɔ bɛ avinli la ɛdeɛ, saa bɛlɛba a ɔwɔ kɛ ɔ nee bɛ ba, yɛɛ saa bɛlɛfinde a ɔwɔ kɛ ɔ nee bɛ finde.
11 Wɔ ɛvoyialilɛ nu nee ɛlobɔ ne mɔ anloa, ɔwɔ kɛ ɔfa yifa ko ɔboka ɛnlankɛ ralɛ nyinli ne anwo, yifa ko ɔboka boane nyinli ne anwo nee debie biala mɔɔ ɔbahola ye fa la ɔboka mboane mralɛ nyinli ne mɔ anwo, na ɔfa nwole hin ko ɔboka yifa ko biala anwo ɔbɔ ma afɔle ne.+
12 “‘Saa kpanyinli ne ɛlɛfi ye ɛhulolɛ nu ava ɛyelalɛ afɔlebɔdeɛ+ anzɛɛ anzodwolɛ afɔlebɔdeɛ arɛlɛ Gyihova a, ɔwɔ kɛ bɛbuke anlenkɛ kpole ne mɔɔ ɔ nye kile aduduleɛ la bɛmaa ye, na ɔbava ye ɛyelalɛ afɔlebɔdeɛ nee ye anzodwolɛ afɔlebɔdeɛ ne yeara kɛ mɔɔ ɔyɛ ye wɔ Ɛnwomenlelielɛ kenle ne ala la.+ Saa ɔfinde ɔkɔ a, ɔwɔ kɛ bɛto anlenkɛ kpole ne anu.+
13 “‘Ɔwɔ kɛ ɛfa boaneralɛ nyinli mɔɔ ɛli ɛvolɛ ko na ɔte kpɔkɛ la ɛbɔ nane mumua ɛyelalɛ afɔle ɛmaa Gyihova kenle ko biala.+ Ɔwɔ kɛ ɛyɛ ɛhye nwonlomɔ biala.
14 Nwonlomɔ biala, ɔwɔ kɛ ɛfa yifa ngyɛnu nsia anu ko ɛboka nwolɛ ɛmaa kɛ ma afɔlebɔdeɛ, yɛɛ nwole hin ngyɛnu nsa anu ko mɔɔ bɛbava bɛakponde esamo kpalɛ ne azo la ɛboka nwolɛ kɛ dahuu ma afɔlebɔdeɛ ɛmaa Gyihova. Ɛhye le ngyehyɛleɛ mɔɔ wɔ ɛkɛ ne dahuu.
15 Ɔwɔ kɛ bɛfa boaneralɛ nyinli ne, ma afɔlebɔdeɛ ne yɛɛ nwole ne bɛba nwonlomɔ biala kɛ dahuu ɛyelalɛ afɔlebɔdeɛ.’
16 “Mɔɔ Tumivolɛ Awulae Gyihova ɛha la ɛne: ‘Saa kpanyinli ne fa ahyɛlɛdeɛ* maa ɔ mra mrenyia ne mɔ anu ko biala kɛ ye agyapadeɛ a, ɔbayɛ ɔ mra mrenyia ne mɔ agyapadeɛ. Ɔle agyapadeɛ mɔɔ bɛnyia a.
17 Noko saa ɔfa ye agyapadeɛ ne bie ɔkyɛ ye sonvolɛ bie a, ɔbayɛ ye ɛdeɛ kɔkpula fanwodi ɛvolɛ ne;+ na akee kpanyinli ne azia alie ye debie. Ɔ mra mrenyia ne mɔ agyapadeɛ ɛdeɛ ne a bayɛ bɛ ɛdeɛ dahuu a.
18 Ɔnle kɛ kpanyinli ne tu awie biala fi ye agyapadeɛ zo na ɔdie bɛ agyapadeɛ ne. Ɔwɔ kɛ ɔfa ɔdaye mumua ne ye agyapadeɛ ne bie ɔmaa ɔ mra mrenyia ne mɔ, amaa bɛanvoa me menli ne bie bɛanvi ye agyapadeɛ* ne azo.’”
19 Akee ɔvale me ɔluale adenle ne+ mɔɔ la anlenkɛ kpole ne anwo ɛkɛ ne la anu ɔrale ɛsɔfoma ne aleɛlilɛ azua* nwuanzanwuanza ne mɔ mɔɔ bɛ nye kile sɔlɔ afoa nu+ la anwo, na menwunle ɛleka bie wɔ ɔ nzi nehane wɔ adɔleɛ afoa nu.
20 Ɔzele me kɛ: “Ɛke a le ɛleka mɔɔ ɛsɔfo ne mɔ bado fɔlɛlilɛ afɔlebɔdeɛ ne nee ɛtane afɔlebɔdeɛ ne nee ɛleka mɔɔ bɛbado ma afɔlebɔdeɛ ne mɔ la,+ amaa bɛanva debie biala bɛangɔ findezo alienwo ɛkɛ na bɛanva nwuanzanwuanzayɛlɛ* bɛangɔmaa menli ne.”+
21 Ɔvale me ɔvindele ɔrale findezo alienwo ɛkɛ na ɔ nee me hɔvale alienwo ɛkɛ mgbɛnezo nna ne mɔ anu, na menwunle alienwo ko wɔ findezo alienwo ɛkɛ ne mgbɛnezo biala anu.
22 Alienwo ngyikyi mɔɔ bɛ ndendenle le kubit* 40 na bɛ tɛtɛlɛ le kubit 30 la wɔ alienwo ɛkɛ ne mgbɛnezo nna ne mɔ anu. Nna ne amuala mgbole sɛ.*
23 Bɛlie bane* ekyi wɔ ko biala anwo bɛyia, yɛɛ bɛsisi ɛleka mɔɔ bɛbado afɔlebɔdeɛ ne mɔ la wɔ bane ne aze.
24 Akee ɔzele me kɛ: “Ɛhye mɔ le azua mɔɔ ɛzonlenlɛsua ne anu sonvolɛma ne to menli ne afɔlebɔdeɛ ne mɔ wɔ nu a.”+
Ɔbodwɛkɛ
^ Anzɛɛ “azɛlɛ.”
^ Anzɛɛ “azɛlɛ.”
^ Anzɛɛ “ekpumgbunli.”
^ Hibulu aneɛ nu, “anwondelɛ.”
^ Anzɛɛ “Nna ne amuala nee bɛ mgbɛnezo ne mɔ amuala mgbole sɛ.”
^ Anzɛɛ “ɛhonlone.”
