Yizikeɛle 47:1-23
47 Akee ɔvale me ɔziale ɔrale ɛzonlenlɛsua ne adenle ne anwo,+ na ɛkɛ ne menwunle kɛ nzule vi ɛzonlenlɛsua ne anuhɔlɛ ne abo ɛlɛse ahɔ aduduleɛ afoa nu,+ ɔluakɛ ɛzonlenlɛsua ne anye kile aduduleɛ. Ɛnee nzule ne vi ɛzonlenlɛsua ne abo fema zo, wɔ afɔlemokyea ne nyiakɛ afoa nu a ɛlɛse a.
2 Akee ɔvale me ɔluale sɔlɔ anlenkɛ kpole ne+ anu ɔvindele na ɔvale me ɔluale alienwo nehane ɔrale findezo anlenkɛ kpole ne mɔɔ ɔ nye kile aduduleɛ la anwo,+ na menwunle kɛ nzule ɛlɛsenze avi fema zo.
3 Nrenyia ne vale ɛzuzunyɛma lɛle ɔ sa nu hɔle aduduleɛ afoa nu,+ ɔzuzule kubit* 1,000 na ɔmaanle menluale nzule ne anu; na ɛnee nzule ne kuma dwu me gyakɛ taboa ne anwo.
4 Akee ɔzuzule 1,000 bieko na ɔmaanle menluale azule ne anu, na ɛnee ɔli me gyakɛ kpɔkɛ zo.
Eza ɔzuzule 1,000 bieko na ɔmaanle menluale nu, na ɛnee azule ne la me bo.
5 Mɔɔ ɔzuzule 1,000 bieko la, ɔyɛle azudenle na meangola meanwudwu meampɛ, ɔluakɛ ɛnee azule ne ɛyɛ kuma mɔɔ kyesɛ bɛweɛ, azudenle mɔɔ bɛngola bɛnwudwu bɛmpɛ a.
6 Ɔbizale me kɛ: “Sonla ra, wɔnwu ɛhye ɔ?”
Akee ɔmaanle mendiale na menziale mengɔle azudenle ne anloa.
7 Mɔɔ menziale mengɔle la, menwunle kɛ mbaka dɔɔnwo wɔ azule ne anloa wɔ ye foa ko nee ye foa ko.+
8 Akee ɔzele me kɛ: “Azule ɛhye se kɔ aduduleɛ maanzinli ne anu na ɔtoa zo ɔkɔ Alaba*+ na ɔkɔgua nyevile ne anu. Saa ɔkɔgua nyevile+ ne anu a, ɔbayɛ nzule mɔɔ wɔ nu la ayile.
9 Anyewɔzo abɔdeɛ* dɔɔnwo bahola adɛnla ɛleka biala mɔɔ azule* ne mɔ baze ahɔ la. Fɛlɛ babu ɛkɛ, ɔluakɛ azule ɛhye baze ɛkɛ. Bɛbayɛ nzule mɔɔ wɔ nyevile ne anu la ayile, na ɛleka biala mɔɔ azudenle ne baze ahɔ la ɛkɛ ne debie biala banyia ngoane.
10 “Fɛlɛkyevoma bagyinla ɔ nloa ɔvi Ɛn-gidae+ too yeahɔdwu Ɛn-ɛgeleeyem, bɛbanyia ɛleka mɔɔ bɛbarɛlɛ bɛ avonle la wɔ ɛkɛ. Fɛlɛ ngakyile dɔɔnwo babu ɛkɛ ne, kɛ Nyevile Kpole ne*+ anu ɛdeɛ ne la.
11 “Ɔbanyia ɛleka mɔɔ mɛtɛlɛmɛtɛlɛ wɔ nee ɛleka mɔɔ azia wɔ, na bɛnrɛyɛ ɛhye mɔ ayile. Ɛleka ɛhye mɔ bayɛ ngyenle ngome.+
12 “Mbaka ngakyile kɔsɔɔti mɔɔ bɛdi bɛ nzoleɛ* la bafifi azudenle ne foa ko nee foa ko. Bɛ nya ɛnrɛnwoso; yɛɛ bɛ nzoleɛ ɛnrɛpe. Bɛbazo ma fofolɛ siane biala, ɔluakɛ bɛnyia bɛ nzule bɛfi ɛzonlenlɛsua ne anu.+ Bɛbali zolɛ ma ne na bɛava bɛ nya ne bɛayɛ ayile.”+
13 Mɔɔ Tumivolɛ Awulae Gyihova ɛha la ɛne: “Ɛhye a le azɛlɛ ne mɔɔ bɛbahyɛ bɛamaa Yizilayɛ mbusua 12 ne kɛ bɛ agyapadeɛ la, na Dwosefi banyia nwiɔ.+
14 Bɛbava bɛayɛ bɛ ɛdeɛ na bɛahyɛ ye pɛpɛɛpɛ.* Menganle ndane kɛ mebava azɛlɛ ɛhye meamaa bɛ nenyia mɔ,+ na kɛkala bɛhyɛ* bɛmaa bɛ kɛ bɛ agyapadeɛ.
15 “Azɛlɛ ne ɛweɛne ne mɔɔ la sɔlɔ afoa nu la ɛne: Ɔvi Nyevile Kpole ne anloa ɔkɔfa Hɛtelɔn+ ɔkɔ Zidade,+
16 Heemate,+ Bɛlota+ yɛɛ Sabelaem mɔɔ la Damasekɛse azɛlɛ ne nee Heemate azɛlɛ ne avinli, ɔkɔdwu Heezɛ-hatikɔn mɔɔ wɔ Hɔɔlan+ ɛweɛne zo la.
17 Ɔti ɛweɛne ne bala nyevile ne anloa yeahɔdwu Heeza-yinɔn,+ na yeava Damasekɛse ɛweɛne zo yeahɔdwu sɔlɔ, na yeahɔ Heemate+ ɛweɛne zo. Sɔlɔ ɛweɛne ne ɛne.
18 “Aduduleɛ ɛdeɛ ne la Hɔɔlan nee Damasekɛse avinli, na ɔkɔfa Dwɔdan ne anloa ɔdua Geleade+ nee Yizilayɛ azɛlɛ ne avinli. Bɛzuzu bɛvi ɛweɛne ne azo bɛhɔ aduduleɛ nyevile* ne anloa. Aduduleɛ ɛweɛne ne ɛne.
19 “Nyiakɛ ɛweɛne* ne bavi Teemaa ahɔ Mɛlebate-keedɛhye+ nzule ne mɔ anwo, na yeavi Bɔnza*+ ne anwo yeahɔ Nyevile Kpole ne anloa. Nyiakɛ ɛweɛne* ne ɛne.
20 “Nyevile Kpole ne wɔ ye adɔleɛ, ɔvi ɛweɛne ne azo too kɔdwu ɛleka bie mɔɔ ɔ nee Libo-heemate*+ bɛ nye bɔ zolɛ la. Adɔleɛ ɛweɛne ne ɛne.”
21 “Bɛhyɛ azɛlɛ ɛhye bɛva, bɛhyɛ bɛmaa Yizilayɛ mbusua 12 ne.
22 Bɛhyɛ bɛva bɛyɛ bɛ agyapadeɛ na bɛva bie bɛmaa nyɛvolɛ mɔɔ de bɛ avinli na bɛwo mralɛ wɔ mekɛ mɔɔ bɛ nee bɛ de la; na bɛbayɛ kɛ bɛvi Yizilayɛ maanle ne anu la. Bɛ nee bɛ bɛanyia agyapadeɛ wɔ Yizilayɛ mbusua ne mɔ anu.
23 Ɔwɔ kɛ bɛmaa ɛyɛvolɛ ne agyapadeɛ wɔ abusua ne mɔɔ ɔde bɛ azɛlɛ zo la avinli,” Tumivolɛ Awulae Gyihova a se a.
Ɔbodwɛkɛ
^ Anzɛɛ “ɛsɛlɛ zo.”
^ Anzɛɛ “ɛkɛla.”
^ Hibulu aneɛ nu, “azudenle nwiɔ.”
^ Ɛhye kile, Mɛdetɛlenia ne.
^ Hibulu aneɛ nu, “aleɛ.”
^ Hibulu aneɛ nu, “bɛdɛnla zo, awie ko biala nee ɔ diema.”
^ Hibulu aneɛ nu, “bɛgua nwolɛ ma.”
^ Ɛhye kile, Nyevile Wulera.
^ Hibulu aneɛ nu, “Nyiakɛ afoa nu wɔ nyiakɛ.”
^ Ɛhye kile, Yigyibiti Bɔnza.
^ Hibulu aneɛ nu, “Nyiakɛ afoa nu wɔ nyiakɛ.”
^ Anzɛɛ “Heemate adenle zo.”
