Yizikeɛle 6:1-14
6 Gyihova nee me dendɛle bieko kɛ:
2 “Sonla ra, kakyi ɛ nye wɔ Yizilayɛ awoka ne mɔ anwo lɔ na ka ngapezo tia bɛ.
3 Ka kɛ, ‘O Yizilayɛ awoka, bɛdie Tumivolɛ Awulae Gyihova edwɛkɛ: Mɔɔ Tumivolɛ Awulae Gyihova ɛlɛka ahile awoka ne mɔ, awoka ngyikyi, azudenle nee mbɔnza ne mɔ la ɛne: “Nea! Mebava konle dadeɛ meara bɛ nwo zo, na meazɛkye bɛ ɛzonlenlɛ ɛleka ne mɔ.*
4 Bɛbazɛkye bɛ afɔlemokyea ne mɔ, bɛbabubu bɛ ayilevuanlɛ afɔlemokyea ne mɔ,+ na mebavuandi bɛ menli mɔɔ bɛhu bɛ la meagua bɛ kyibadeɛ ananze* ne mɔ anyunlu.+
5 Mebavuandi Yizilayɛma avunli meagua bɛ kyibadeɛ ananze ne mɔ anyunlu, na meakponde bɛ mbowule ne mɔ meabɔ bɛ afɔlemokyea ne mɔ anwo meayia.+
6 Ɛleka biala mɔɔ bɛde la, bɛ azuamgbole ne mɔ badɔ mgbane+ na bɛ ɛzonlenlɛ ɛleka ne mɔ azɛkye na bɛagua ɛkɛ ne mgbane.+ Bɛbazɛkye bɛ afɔlemokyea ne mɔ na bɛabubu bɛ bɔkɔɔ, bɛ kyibadeɛ ananze ne mɔ baminli, bɛbabubu bɛ ayilevuanlɛ afɔlemokyea ne mɔ na bɛaye bɛ sa anloa gyima ne mɔ bɛavi ɛkɛ.
7 Na bɛbahu menli bɛagua bɛ avinli+ na bɛanwu kɛ medame a mele Gyihova a.+
8 “‘“Na saa mebɔ bɛ asande wɔ maanle maanle ne mɔ anu a, mebagyakyi bɛ nuhua bie mɔ, ɔluakɛ bɛ nuhua bie mɔ bɛanyia bɛ ti na bɛavi konle dadeɛ nloa wɔ maanle maanle ne mɔ anu.+
9 Na menli mɔɔ banyia bɛ ti la bahakye me wɔ maanle maanle mɔɔ bɛbava bɛ bɛahɔ akɛlɛzonlenlɛ nu wɔ ɛkɛ la anu.+ Bɛbanwu kɛ ɛnee me ɛbolɛ* ɛlɛte ɔluakɛ bɛanli nɔhalɛ* na bɛhakyile bɛ nzi bɛzile me+ yɛɛ bɛhulole bɛ kyibadeɛ ananze ne mɔ.*+ Bɛbaze ninyɛndane nee bɛkyi ninyɛne mɔɔ bɛyɛle la amuala anwo nyiane na bɛahyi bɛ.+
10 Bɛbanwu kɛ medame a mele Gyihova a na edwɛkɛ mɔɔ menganle kɛ mebava munzule ɛhye meara bɛ nwo zo la anyɛ mgbane.”’+
11 “Mɔɔ Tumivolɛ Awulae Gyihova ɛha la ɛne: ‘Bɔ ɛ sa nu na si ɛ gyakɛ aze na di nyane wɔ ninyɛndane nee bɛkyi ninyɛne mɔɔ Yizilayɛma ɛyɛ la kɔsɔɔti anwo, ɔluakɛ konle dadeɛ, ɛhɔne nee ewulenzane bahuhu bɛ agua bɛ lɔ.+
12 Bɛ nuhua ne mɔɔ wɔ moa la, ewulenzane bahu ye, bɛ nuhua ne mɔɔ bikye la bawu konle dadeɛ nloa, na awie biala mɔɔ kɛnyia ɔ ti wɔ ɛhye mɔ anu na ɔkɛha la ɛhɔne bahu ye ado ye lɔ; na mebawola me ɛya ne kɔsɔɔti meagua bɛ nwo zo.+
13 Na saa bɛnwu kɛ bɛ menli mɔɔ bɛhu bɛ la gua bɛ kyibadeɛ ananze ne mɔ anwo ɛkɛ, wɔ bɛ afɔlemokyea ne amuala anwo,+ boka tendenle biala azo, awoka mgbole kɔsɔɔti ati zo, baka buzuu biala abo nee mbaka mgbole mɔɔ bɛbɔ afɔle evuanlɛ* wɔ bɛ ngane ne mɔ abo bɛkpɔda bɛ kyibadeɛ ananze ne mɔ la a,+ bɛbanwu kɛ medame a mele Gyihova a.+
14 Mebadende me sa wɔ bɛ nwo zo na meamaa bɛ azɛlɛ ne adɔ mgbane, na bɛ tɛnlabelɛ ne mɔ kɔsɔɔti badɔ mgbane adɛla fienemgbole ne mɔɔ bikye Debela la. Na bɛbanwu kɛ medame a mele Gyihova a.’”
Ɔbodwɛkɛ
^ Hibulu aneɛ nu, “ɛleka mɔɔ wɔ anwuma.”
^ Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
^ Anzɛɛ “bɛlile bɛ nzi wɔ adwɔmanebɔlɛ nu.”
^ Anzɛɛ “bɛbɔle ɛbɛla ɛtane; bɛbɔle adwɔmane.”
^ Hibulu aneɛ nu, “ahonle.”
^ Anzɛɛ “afɔle mɔɔ sɔ ɛnyelɛ.”
