Yizikeɛle 7:1-27
7 Gyihova nee me dendɛle bieko kɛ:
2 “Na wɔmɔ, sonla ra, mɔɔ Tumivolɛ Awulae Gyihova ɛlɛka ahile Yizilayɛ maanle ne la ɛne: ‘Awieleɛ! Awieleɛ ne ɛra azɛlɛ ye muleɛ nna ne mɔ azo.
3 Wɔ awieleɛ ɛdwu, na mebazoa me ɛya ne wɔ ɛ nwo lɔ, na mebabua wɔ ndɛne kɛ mɔɔ wɔ ndenle ne mɔ de la na meamaa wɔabu wɔ bɛkyi nyɛleɛ ne mɔ kɔsɔɔti anwo mgbonda.
4 Me nye ɛnrɛze wɔ anwunvɔne; yɛɛ me kunlu ɛnrɛyelɛyela me,+ ɔluakɛ mebava mɔɔ bavi wɔ ndenle ne mɔ anu ara la a meara ɛ nwo zo a, na ɛbanwu wɔ bɛkyi nyɛleɛ ne mɔ anwo amaneɛ.+ Na bɛbanwu kɛ medame a mele Gyihova a.’+
5 “Mɔɔ Tumivolɛ Awulae Gyihova ɛha la ɛne: ‘Nea! Munzule, munzule titili bie ɛlɛba.+
6 Awieleɛ bie ɛlɛba; awieleɛ ne bara; ɔbamaa ɔ nwo zo* yeatia wɔ. Nea! Ɔlɛba.
7 Ɛdawɔ mɔɔ ɛde azɛlɛ ne azo la, wɔ mekɛ* ɛdwu. Mekɛ ne ɛlɛba, kenle ne ɛbikye.+ Bɛlɛyɛ bɛgyebɛgye noko tɛ fɛlɛkolilɛ ɛdeɛdeanlɛ wɔ awoka zo ɔ.
8 “‘Ɔnrɛhyɛ biala mebawola me ɛya ne meagua ɛ nwo zo,+ na mebazoa me ɛya ne amuala wɔ ɛ nwo lɔ,+ na mebabua wɔ ndɛne kɛ mɔɔ wɔ ndenle ne mɔ de la na meamaa wɔabu wɔ bɛkyi nyɛleɛ ne mɔ kɔsɔɔti anwo mgbonda.
9 Me nye ɛnrɛze wɔ anwunvɔne; yɛɛ me kunlu ɛnrɛyelɛyela me.+ Mebava mɔɔ bavi wɔ ndenle ne mɔ anu ara la a meara ɛ nwo zo a, na ɛbanwu wɔ bɛkyi nyɛleɛ ne mɔ anwo amaneɛ. Na bɛbanwu kɛ medame, Gyihova a melɛtwe bɛ nzo a.+
10 “‘Nea, kenle ne! Nea, ɔlɛba!+ Wɔ mekɛ* ɛdwu; baka ne ɛbɔ ndotolo yɛɛ anwomemaazo* ɛfifi.
11 Basabasayɛlɛ ɛnyi ɛyɛ amumuyɛyɛlɛ baka.+ Bɛdabɛ anzɛɛ bɛ anwonyia anzɛɛ bɛ menli dɔɔnwo ne anzɛɛ bɛ anyunlunyia biala ɛnrɛnyia ngoane.
12 Mekɛ ne bara, kenle ne badwu. Bɛmmamaa mɔɔ tɔ debie la di fɛlɛko yɛɛ bɛmmamaa mɔɔ tɔne debie la di nyane, ɔluakɛ ɛya ne wɔ bɛ menli ne amuala anwo zo.*+
13 Na mɔɔ tɔne debie la ɛnrɛzia ɛnrɛhɔ mɔɔ ɔdɔnenle ye la anwo, wɔ mekɛ mɔɔ bɛlie ye ngoane bɔbɔ la, ɔluakɛ ɛnyelɛzodeɛnwunlɛ ne tia menli ne amuala. Awie biala ɛnrɛzia yɛɛ ye nvonleɛ* ne ati, awie biala ɛnrɛnyia ngoane.
14 “‘Bɛbɔ aweɛne tendenle ne+ yɛɛ awie biala ɛziezie ɔ nwo, noko awie biala ɛngɔ konle, ɔluakɛ me ɛya ne wɔ menli ne amuala anwo zo.+
15 Konle dadeɛ ne wɔ alienwo lɔ+ yɛɛ ewulenzane nee ɛhɔne wɔ sua ne azo. Awie biala mɔɔ wɔ ɛbɔ nu la bawu konle dadeɛ nloa, yɛɛ ɛhɔne nee ewulenzane bahu menli mɔɔ wɔ suakpole ne azo la.+
16 Bɛ menli mɔɔ banyia bɛ ti la bahɔ awoka ne mɔ azo, na bɛ nuhua biala bali nyane wɔ ye nvonleɛ nwo kɛ abubule mɔɔ wɔ bɔnza nu la.+
17 Bɛ sa ne mɔ amuala bahendɛhenda nwolɛ kpokpɔdwɔlɔɔ, na bɛ gyakɛ agbɔkɛ ne mɔ amuala ahwi nzule.*+
18 Bɛheda ɛrele,+ na anwowosolɛ ɛdɔ bɛ nwo.* Awie biala anyunlu bagua aze, yɛɛ etile biala azo bakpa.*+
19 “‘Bɛbavuandi bɛ dwɛtɛ fufule bɛagua awɔdenle ne mɔ azo yɛɛ bɛ nvutuke bayɛ kyibadeɛ amaa bɛ. Bɛ dwɛtɛ fufule anzɛɛ bɛ nvutuke ɛnrɛhola ɛnrɛlie bɛ wɔ Gyihova ɛya kenle ne.+ Bɛ kunlu* ɛnrɛdwo bɛ nwo yɛɛ bɛ ko ɛnrɛyi, ɔluakɛ yeyɛ* azedolɛ bolɛ mɔɔ maa bɛyɛ nvonleɛ a.
20 Bɛvale bɛ anwoneɛ ngɛnlɛma ne mɔ bɛdule bɛ nwo, na bɛvale bɛyɛle bɛ munzule ananze ne mɔ, bɛ kyibadeɛ ananze ne mɔ.+ Ɛhye ati a mebamaa yeayɛ bɛkyi debie yeamaa bɛ la.
21 Mebava ye* meawula nyɛvolɛ ne mɔ asa anu meamaa bɛave na meamaa amumuyɛma mɔɔ wɔ azɛlɛ ne azo la ava ahɔ, na bɛbagua nwolɛ evinli.
22 “‘Mebaye me nye meavi bɛ nwo,+ na bɛbagua me ɛleka ne mɔɔ vea la* anwo evinli, na nwule bawolo ɛkɛ na bɛagua nwolɛ evinli.+
23 “‘Yɛ kyeenyi* ne,+ ɔluakɛ ndɛnebualɛ nwo mogya ɛyi azɛlɛ ne azo tɛkɛɛ+ yɛɛ amumuyɛyɛlɛ ɛyi suakpole ne azo tɛkɛɛ.+
24 Mebava maanle maanle mɔɔ bɛnle kpalɛ fee la meara,+ na bɛbava bɛ azua ne mɔ bɛayɛ bɛ ɛdeɛ,+ na mebamaa menli mɔɔ anwo yɛ se la adubɛnwo ne ara awieleɛ, na bɛbagua bɛ ɛzonlenlɛ azua ne mɔ anwo evinli.+
25 Saa bɛ amaneɛnwunlɛ ne ba a, bɛbakpondɛ anzodwolɛ, noko bɛnrɛnyia bie.+
26 Munzule badoa munzule, na amaneɛbɔlɛ adoa amaneɛbɔlɛ yɛɛ menli bakpondɛ ɛnyelɛzodeɛnwunlɛ avi ngapezonli ɛkɛ,+ noko mɛla* mɔɔ vi ɛsɔfo ne mɔ ɛkɛ ne la nee mgbanyima ne mɔ folɛdulɛ baminli.+
27 Belemgbunli ne bali nyane,+ na adekilevolɛ ne aheda arɛlebɔlɛ* yɛɛ ɛzulolɛ bamaa menli mɔɔ wɔ azɛlɛ ne azo la asa awoso. Mebayɛ bɛ kɛ mɔɔ bɛ ndenle ne mɔ de la, na meabua bɛ ndɛne kɛ mɔɔ bɛbuale ndɛne la. Na bɛbanwu kɛ medame a mele Gyihova a.’”+
Ɔbodwɛkɛ
^ Hibulu aneɛ nu, “ɔbadunwue.”
^ Anzɛɛ ɔkola ɔkile, “abotile ne.”
^ Hibulu edwɛkɛkpɔkɛ ne eza kile akɛnrasesebɛ mɔɔ ɛnle kpalɛ mɔɔ bɛfa bɛyɛ debie anzɛɛ awie mɔɔ yɛ debie mɔɔ ɔnlɛ adenle ɔnyɛ la.
^ Anzɛɛ ɔkola ɔkile, “Abotile ne.”
^ Ɛhye kile, menli mɔɔ tɔ agyapadeɛ anzɛɛ menli mɔɔ tɔne agyapadeɛ la ɛnrɛnyia nvasoɛ, ɔluakɛ ɛzɛkyelɛ ne bara bɛ muala bɛ nwo zo.
^ Anzɛɛ ɔkola ɔkile, “bɛ nvonleɛ.”
^ Ɛhye kile, ɛzulolɛ ti bɛbabiebie bɛ nwo.
^ Ɛhye kile, bɛbakpa bɛ ti enrinli wɔ nyanelilɛ nu.
^ Hibulu aneɛ nu, “ɛheda bɛ nwo zo.”
^ Anzɛɛ “Bɛ ɛkɛla akunlu.”
^ Ɛhye kile, bɛ dwɛtɛ fufule nee bɛ nvutuke ɛyɛ.
^ Ɛhye kile, bɛ dwɛtɛ fufule nee bɛ nvutuke mɔɔ bɛva bɛyɛ ananze la.
^ Ɔda ali kɛ ɔfale Gyihova ɛzonlenlɛ sua ne akunlu nehane kpalɛ anwo.
^ Ɛhye kile, akɛlɛzonlenlɛ nu kyeenyi.
^ Anzɛɛ “adehilelɛ.”
^ Anzɛɛ “alɔbɔlɛ.”
