Yizikeɛle 8:1-18
8 Na ɛvolɛ mɔɔ tɔ zolɛ nsia, ye siane nsia ne kenle mɔɔ tɔ zolɛ nnu la azo, mɔɔ ɛnee mede me sua nu na Dwuda mgbanyima dede me nyunlu ɛkɛ la, Tumivolɛ Awulae Gyihova asa zɔle me wɔ ɛkɛ.
2 Mekɛ mɔɔ melɛnea la, menwunle debie mɔɔ zɔho senle la; ɛnee senle wɔ debie mɔɔ le kɛ ɔ nze la abo,+ na ɔvi ɔ nze zo mɔɔ kɔ ye anwuma la ta kɛ nvutuke nee dwɛtɛ fufule afonla mɔɔ ta la.+
3 Akee ɔdendenle debie bie mɔɔ zɔho ɛsalɛ la na ɔzɔle me ti enrinli ne ekyi anu, na ɔlua Nyamenle ɛnyelɛzodeɛnwunlɛ ne azo, sunsum ne maanle me zo hɔle anwomanyunlu na ɔvale me ɔrale Gyɛlusalɛm, na ɔvale me ɔhɔle anlenkɛ kpole ne mɔɔ wɔ suakunlu ɛkɛ+ na ɔ nye kile sɔlɔ la anloa, ɛleka mɔɔ awozonlezonlenlɛ nungule ɛhwenlɛ sɛkɛlɛneɛ* mɔɔ maa bɛtwe nungule la gyi la.+
4 Na nea! ɛnee Yizilayɛ Nyamenle ne anyunlunyia ne wɔ ɛkɛ,+ ɔle kɛ deɛ ne mɔɔ menwunle ye wɔ azɛlɛ sɛsɛ ne azo lɔ la.+
5 Akee ɔzele me kɛ: “Sonla ra, mesɛlɛ wɔ maa ɛ nye zo na nea sɔlɔ nehane.” Ɔti memaanle me nye zo na meneanle sɔlɔ nehane, na ɛnee nungule ɛhwenlɛ sɛkɛlɛneɛ* ne gyi afɔlemokyea ne anlenkɛ kpole ne mɔɔ wɔ sɔlɔ la anuhɔlɛ ne.
6 Na ɔzele me kɛ: “Sonla ra, ɛnwu bɛkyi ninyɛne mgbane mgbane mɔɔ Yizilayɛma ɛlɛyɛ wɔ ɛke,+ ninyɛne mɔɔ maa metwe me nwo mefi me ɛzonlenlɛsua ne anwo mekɔ moamoa la ɔ?+ Noko ɛbanwu bɛkyi ninyɛne mɔɔ ɛnle kpalɛ fee bɔbɔ la.”
7 Akee ɔvale me ɔrale alienwo ɛkɛ ne anlenkɛ ne anloa, na mɔɔ meneanle la, menwunle tokule bie wɔ bane ne anu.
8 Ɔzele me kɛ: “Sonla ra, mesɛlɛ wɔ, tu tokule wɔ bane ne anu.” Ɔti mendule tokule wɔ bane ne anu, na menwunle adenle bie.
9 Ɔzele me kɛ: “Wolo kɔ nuhua na nea ninyɛndane, bɛkyi ninyɛne mɔɔ bɛlɛyɛ ye wɔ ɛke la.”
10 Ɔti menwolole mengɔle nu na meneanle, na menwunle nane ngakyile mɔɔ twenle bɛ nwo aze nee nane anwo ɛzulolɛ kɔsɔɔti mɔɔ bɛle kyibadeɛ+ la ananze yɛɛ kyibadeɛ ananze* kɔsɔɔti wɔ Yizilayɛma avinli;+ ɛnee bɛdɔlɔdɔlɔ bɛ wɔ bane ne anwo amuala.
11 Ɛnee Yizilayɛma mgbanyima 70 gyigyi bɛ nyunlu ɛkɛ, na ɛnee Hyeefan+ ara Gyeeyazanaya boka bɛ a bɛgyigyi ɛkɛ ne a. Ɛnee bɛ nuhua ko biala lɛ debie mɔɔ bɛfa bɛkpu ayilevuanlɛ la ɔ sa nu, na ayilevuanlɛ ne esike ne ɛlɛfo ahɔ anwuma.+
12 Ɔzele me kɛ: “Sonla ra, ɛnwu mɔɔ Yizilayɛ mgbanyima ɛlɛyɛ ye wɔ awozinli nu, wɔ ɛleka mɔɔ bɛ nuhua ko biala ananze ne mɔ wɔ* wɔ ye suakunlu la ɔ? Ɔluakɛ bɛse, ‘Gyihova ɛnnwu yɛ. Gyihova ɛgyakyi azɛlɛ ne.’”+
13 Na ɔdoale zo ɔzele me kɛ: “Ɛbanwu bɛkyi ninyɛne bɔbɔ mɔɔ ɛnle kpalɛ fee mɔɔ bɛlɛyɛ la.”
14 Ɔti ɔvale me ɔrale Gyihova sua ne sɔlɔ anlenkɛ kpole ne anloa, na menwunle kɛ mraalɛ bie dede ɛkɛ na bɛlɛsu nyamenle Tamɛze.
15 Na ɔzele me bieko kɛ: “Sonla ra, asoo ɛnwu ɛhye? Ɛbanwu bɛkyi ninyɛne bɔbɔ mɔɔ ɛnle kpalɛ fee mɔɔ tɛla ɛhye mɔ la.”+
16 Ɔti ɔvale me ɔrale Gyihova suakunlu alienwo ɛkɛ.+ Ɛnee mrenyia kɛyɛ 25 wɔ Gyihova ɛzonlenlɛsua ne anuhɔlɛ ne, wɔ abenlana ne nee afɔlemokyea ne avinli, na bɛhakyi bɛ nzi bɛzi Gyihova ɛzonlenlɛsua ne yɛɛ bɛ nye kile aduduleɛ nehane; ɛnee bɛlɛbɔ bɛ ti aze bɛamaa sɛnzɛne ne wɔ aduduleɛ.+
17 Ɔzele me kɛ: “Sonla ra, ɛnwu ɛhye ɔ? Asoo ɔle debie ekyi kɛ Dwudama kɛyɛ bɛkyi ninyɛne ɛhye mɔ na bɛkɛva basabasayɛlɛ bɛkɛyi azɛlɛ ne azo+ na bɛkɛha me ɛya dahuu ɔ? Nea, bɛlɛfa baka ngane ne* bɛaha me bonyi.
18 Ɔti me nee bɛ bali ye wɔ ɛya zo. Me nye ɛnrɛze bɛ anwunvɔne yɛɛ me kunlu ɛnrɛyelɛyela me.+ Bɛbadea nu kpole wɔ me nzo nu bɔbɔ ɛdeɛ, noko menrɛdie bɛ.”+
Ɔbodwɛkɛ
^ Anzɛɛ “ananze.”
^ Anzɛɛ “ananze.”
^ Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
^ Anzɛɛ “yeva yeziezie ɛkɛ.”
^ Ɔda ali kɛ ɔle baka ngane mɔɔ bɛfa bɛdi gyima wɔ awozonle ɛzonlenlɛ nu.
