Zɛkalaya 1:1-21
1 Wɔ Dalayɛse ɛvolɛ mɔɔ tɔ zo nwiɔ na ye siane mɔtwɛ ne azo,+ Gyihova edwɛkɛ rale Yedo ara, Bɛlikaya ara, ngapezonli Zɛkalaya*+ ɛkɛ ne kɛ:
2 “Gyihova vale bɛ ze mɔ anwo ɛya kpole.+
3 “Ka kile bɛ kɛ, ‘Mɔɔ ɛlɔne Gyihova ɛha la ɛne: “‘Bɛzia bɛrɛla me nwo ɛke,’ kɛ ɛlɔne Gyihova se la ɛne, ‘na mebazia meara bɛ nwo ɛkɛ,’+ ɛlɔne Gyihova a ɛha a.”’
4 “‘Bɛmmayɛ kɛ bɛ ze mɔ mɔɔ alimoa ngapezoma ne hanle ɛhye hilele bɛ la: “Mɔɔ ɛlɔne Gyihova ɛha la ɛne, ‘Mesɛlɛ bɛ, bɛhwe bɛ nwo* bɛvi bɛ ndenle ɛtane nee bɛ nyɛleɛ ɛtane ne mɔ anwo.’”’+
“‘Noko bɛandie me, yɛɛ bɛanyɛ,’+ kɛ Gyihova se la ɛne.
5 “‘Nienwu a bɛ ze mɔ wɔ a? Asoo ngapezoma ne dɛnlanle aze dahuu?
6 Noko me edwɛkɛ nee me mɛla mɔɔ menvale memaanle me azonvolɛ, ngapezoma ne la, asoo yeamba nu wɔ bɛ ze mɔ anwo zo ɔ?’+ Ɔti bɛziale bɛrale me nwo ɛkɛ na bɛhanle kɛ: ‘Ɛlɔne Gyihova nee yɛ ɛli ye kɛ mɔɔ yɛ ndenle nee yɛ nyɛleɛ de, kɛ mɔɔ ɔzile kpɔkɛ kɛ ɔbayɛ ala la.’”+
7 Wɔ siane 11 ne mɔɔ le Hyibate* la kenle mɔɔ tɔ zo 24 ne mɔɔ le Dalayɛse ɛvolɛ mɔɔ tɔ zo nwiɔ la anu,+ Gyihova edwɛkɛ rale Yedo ara, Bɛlikaya ara, ngapezonli Zɛkalaya ɛkɛ ne kɛ:
8 “Nɔe ne menwunle ɛnyelɛzodeɛnwunlɛ bie. Ɛnee nrenyia bie de ɛkpɔnwɔ kɔkɔlɛ zo na ɔgyinlanle mɛtɛle mbaka ne mɔ mɔɔ wɔ bɔnza ne anu la anu; na mgbɔnwɔ ngɔkɔlɛ, ngɔkɔlɛ nee ɛbenle afonla yɛɛ fufule fufule gyigyi ɔ nzi ɛkɛ.”
9 Ɔti membizale ye kɛ: “Me menle, na mgbɔnwɔkavoma ɛhye mɔ noko ɛ?”
Anwumabɔvolɛ ne mɔɔ ɛnee ɔ nee me ɛlɛtendɛ la buale me kɛ: “Mebahile wɔ mgbɔnwɔkavoma holɛ ko.”
10 Akee nrenyia ne mɔɔ gyi mɛtɛle mbaka ne mɔ anu la hanle kɛ: “Ɛhye mɔ a Gyihova ɛzoa bɛ kɛ bɛkpɔsa azɛlɛ ne azo la.”
11 Na bɛzele Gyihova anwumabɔvolɛ ne mɔɔ ɛnee gyi mɛtɛle mbaka ne mɔ anu la kɛ: “Yɛkpɔsa azɛlɛ ne azo, na nea! azɛlɛ ne azo kɔsɔɔti ɛyɛ koonwu yɛɛ anzodwolɛ wɔ zo.”+
12 Ɔti Gyihova anwumabɔvolɛ ne hanle kɛ: “O ɛlɔne Gyihova, kenlenzu a ɛbaze Gyɛlusalɛm nee Dwuda azuamgbole mɔɔ wɔva bɛ nwo ɛya too ɛvolɛ 70 la anwunvɔne a?”+
13 Gyihova vale edwɛkɛ kɛnlɛma mɔɔ kyekye bɛ rɛle la buale anwumabɔvolɛ ne mɔɔ ɛnee ɔ nee me ɛlɛtendɛ la.
14 Akee anwumabɔvolɛ ne mɔɔ ɛnee ɔ nee me ɛlɛtendɛ la zele me kɛ: “Tea nu kɛ, ‘Mɔɔ ɛlɔne Gyihova ɛha la ɛne: “Mebava mɔdenlebɔlɛ mealie Gyɛlusalɛm nee Zayɔn, ɛhɛe mɔdenlebɔlɛ kpole.+
15 Meva maanle maanle mɔɔ bɛ nwo ɛdɔ bɛ la anwo ɛya kpole kpalɛ,+ ɔluakɛ menvale me menli ne anwo ɛya ekyi bie ala+ noko maanle maanle ɛhye mɔ ɛva bie ɛboka bɛ amaneɛnwunlɛ ne anwo.”’+
16 “Ɛhye ati mɔɔ Gyihova ɛha la ɛne: “‘Mebava anwunvɔnezelɛ meazia meara Gyɛlusalɛm,+ na bɛbazi me sua ne wɔ ɛkɛ,”+ kɛ ɛlɔne Gyihova se la ɛne, “na bɛbava ɛzuzunyɛma bɛazuzu Gyɛlusalɛm.”’+
17 “Tea nu bieko na ka kɛ, ‘Mɔɔ ɛlɔne Gyihova ɛha la ɛne: “Kpalɛyɛlɛ babu me azuamgbole ne mɔ azo bieko; na Gyihova bakyekye Zayɔn arɛle bieko+ na yeakpa nu yeaye Gyɛlusalɛm bieko.”’”+
18 Akee memaanle me nye zo na menwunle mɛne nna.+
19 Ɔti membizale anwumabɔvolɛ ne mɔɔ ɛnee ɔ nee me ɛlɛtendɛ la kɛ: “Duzu a le ɛhye mɔ?” Ɔbuale kɛ: “Mɛne ɛhye mɔ a bɔle Dwuda,+ Yizilayɛ+ nee Gyɛlusalɛm+ asande la.”
20 Akee Gyihova hilele me dwinvolɛma nna.
21 Membizale kɛ: “Duzu a ɛhye mɔ ɛlɛba arayɛ a?”
Ɔhanle kɛ: “Mɛne ɛhye mɔ a bɔle Dwuda asande bɔkɔɔ mɔɔ awie angola ammaa ɔ ti zo la. Ɛhendeɛ ne mɔ noko baraha bɛ ɛzulolɛ, bɛbabubu maanle maanle ne mɔ mɔɔ maanle bɛ mɛne zo tiale Dwuda azɛlɛ ne kɛ bɛbɔ ye asande la mɛne.”
