Zɛkalaya 11:1-17
11 “O Lɛbanɔn, buke wɔ nlenkɛ ne mɔ,Amaa senle ayela wɔ sida mbaka ne mɔ.
2 Bɛmɛ dwunipa mbaka, bɛzu alɔbɔlɛ ɛzunlɛ ɔluakɛ sida mbaka ɛgua aze;Bɛzɛkye mbaka mgbole ne mɔ!
Bɛmɛ Beehyan oku mbaka, bɛzu alɔbɔlɛ ɛzunlɛ,Ɔluakɛ kpɔkɛmile ne ɛzɛkye!
3 Bɛdie! Mboaneneavolɛma ɛlɛsu alɔbɔlɛ ɛzunlɛ,Ɔluakɛ bɛ anyunlunyia ne ɛhɔ.
Bɛdie! Awenade ngyikyi ne mɔ* ɛlɛkpo,Ɔluakɛ kpɔkɛmile mɔɔ wɔ Dwɔdan ne anloa la ɛzɛkye.
4 “Mɔɔ Gyihova me Nyamenle ne se la ɛne, ‘Bɛnlea mboane mɔɔ bɛkahu bɛ la azo,+
5 bɛdabɛ mɔɔ bɛtɔ bɛ la ku bɛ+ noko bɛnli nwolɛ fɔlɛ. Yɛɛ bɛdabɛ mɔɔ bɛtɔne bɛ la+ ka kɛ, “Ayɛlɛyelɛ ɛha Gyihova ɔluakɛ mebayɛ sukoavolɛ.” Na bɛ mboaneneavolɛma ne akunlu ɛnyelɛyela bɛ ɛmmaa bɛ fee.’+
6 Kɛ Gyihova se la ɛne, “‘Me kunlu ɛnrɛyelɛyela me ɛnrɛmaa menli mɔɔ de azɛlɛ ne azo la bieko. Ɔti mebava awie ko biala meawula ɔ gɔnwo nee ye belemgbunli ne asa anu; na bɛbazɛkye azɛlɛ ne, na menrɛlie bɛ menrɛvi bɛ sa nu.’”
7 Na bɛmɛ bɛ ti membɔle ɔ bo kɛ menea mboane mɔɔ bɛkahu bɛ la anwo zo,+ O mboane mɔɔ ɛlɛnwu amaneɛ. Ɔti menvale kpɔma nwiɔ, na menvɛlɛle ko Ɛlolɛ, yɛɛ menvɛlɛle ko ne noko Koyɛlɛ,+ na membɔle ɔ bo meneanle mboane ne mɔ anwo zo.
8 Na menyele mboaneneavolɛma nsa ali wɔ siane ko anu, ɔluakɛ meannyia* bɛ nwo abotane bieko na bɛdabɛ noko bɛhyile me.*
9 Na menganle kɛ: “Menrɛnlea bɛ nwo zo bieko. Bɛmaa mɔɔ ɛlɛwu la ɛwu, na bɛmaa mɔɔ ɛlɛminli la ɛminli. Na bɛdabɛ mɔɔ bɛha la, bɛmaa bɛli bɛ gɔnwo mɔ nwonane.”
10 Ɔti menvale me kpɔma ne mɔɔ bɛfɛlɛ ye Ɛlolɛ+ la mempepɛle nu, na menzɛkyele ngyekyeleɛ ne mɔɔ me nee maanle maanle ne mɔ amuala yɛle la.
11 Ɔti kenle zɔhane, ɔzɛkyele, na ɛnee mboane ne mɔ mɔɔ ɛlɛnwu amaneɛ la bie mɔ mɔɔ ɛlɛnea me la ze kɛ ɔle Gyihova edwɛkɛ.
12 Akee menzele bɛ kɛ: “Saa ɔle kpalɛ ɔmaa bɛ a, bɛva me ahatualɛ ne bɛmaa me; saa tɛ ye zɔ a, ɛnee bɛmaa ɔwɔ ɛkɛ.” Na bɛvale dwɛtɛ fufule 30 bɛduale me kakɛ.+
13 Akee Gyihova zele me kɛ: “Fuandi gua gya ne anu—anyunlunyia bolɛ ne mɔɔ bɛpɛle bɛmaanle me la.+ Ɔti menvale dwɛtɛ fufule 30 ne na menvuandinle menguale gya ne mɔɔ wɔ Gyihova sua nu ɛkɛ ne la anu.+
14 Akee mempepɛle me kpɔma ne mɔɔ tɔ zo nwiɔ mɔɔ bɛfɛlɛ ye Koyɛlɛ+ la anu, na menzɛkyele mediemayɛlɛ mɔɔ wɔ Dwuda nee Yizilayɛ avinli la.+
15 Na Gyihova zele me kɛ: “Akee fa mboaneneavolɛ ne mɔɔ anwo ɛnlɛ nvasoɛ la ninyɛne ne.+
16 Ɔluakɛ mebamaa mboaneneavolɛ bie ara azɛlɛ ne azo. Ɔnrɛnlea mboane ne mɔ mɔɔ ɛlɛminli la;+ ɔnrɛkpondɛ mboane ngyikyi ne mɔ anzɛɛ ɔnrɛyɛ mɔɔ ɛboda la+ ayile anzɛɛ ɔnrɛmaa mɔɔ te kpɔkɛ la aleɛ. Emomu, ɔbali mboane mɔɔ ɛlɔ la nwonane+ na yeakpakyekpakye bɛ ndwɛlɛ ne mɔ anu.+
17 Me mboaneneavolɛ mgbane ne, mɔɔ yekpo me mboane ne mɔ la, ye gyakɔ!+
Konle dadeɛ bapɛ ɔ sa na yeadu ɔ nye fema ne.
Ɔ sa badwe bɔkɔɔ,Yɛɛ ɔ nye fema ne bazi* bɔkɔɔ.
Ɔbodwɛkɛ
^ Anzɛɛ “awenade ngakula mɔɔ anwo yɛ se la.”
^ Anzɛɛ “me ɛkɛla annyia.”
^ Anzɛɛ “bɛ ɛkɛla hyile me.”
^ Hibulu aneɛ nu, bayɛ “monzomonzo.”
