Zɛkalaya 12:1-14
12 Nyamenle nrɛlaleɛ:
“Gyihova edwɛkɛ mɔɔ fale Yizilayɛ anwo la ɛne,” kɛ Gyihova,Ahenle mɔɔ dɛlɛle anwuma ne anu,+Na ɔwulale azɛlɛ ne adiabo,+Na ɔyɛle ɛnwomenle* mɔɔ wɔ sonla nu la, se la ɛne.
2 “Nea, melɛmaa Gyɛlusalɛm ayɛ kanrɛlɛ* mɔɔ bamaa maanle maanle mɔɔ ɛbɔ ye ɛyia la kɔsɔɔti abobo a; na bɛbabɛnga Dwuda nee Gyɛlusalɛm bɛayia.+
3 Kenle zɔhane, mebamaa Gyɛlusalɛm ayɛ bolɛ ɛlomboɛ* amaa maanle maanle kɔsɔɔti. Bɛdabɛ mɔɔ bɛbamaa ye zo la kɔsɔɔti baboda kpole kpalɛ;+ na maanle maanle mɔɔ wɔ azɛlɛ ye azo la amuala baboɔboa bɛ nloa adwazo atia ye.”+
4 Kɛ Gyihova se la ɛne, “Kenle zɔhane, mebamaa ɛzulolɛ aha ɛkpɔnwɔ biala na meamaa mɔɔ ka la azɛ. Mebamaa me nye ahɔ Dwudama anwo zo, noko mebamaa maanle maanle ne mɔ ɛkpɔnwɔ biala anye azi.
5 Na Dwuda mbusua mgbanyinli baha ye bɛ ahonle nu kɛ, ‘Gyɛlusalɛmma le yɛ anwosesebɛ mɔɔ ɛlɔne Gyihova bɛ Nyamenle ne ɛva ɛmaa yɛ a.+
6 Kenle zɔhane, mebamaa Dwuda mbusua mgbanyinli ayɛ kɛ buakɛ mɔɔ senle wɔ nu na ɔgyi mbaka avinli nee tɛkɛ mɔɔ la ma mɔɔ bɛkyekye ye avile avile avinli la,+ bɛbayela maanle maanle mɔɔ ɛbɔ ɛyia bɛ mɔɔ bɛwɔ bɛ fema zo nee bɛ bɛne zo la amuala;+ na Gyɛlusalɛmma badɛnla bɛ bo zo ne* bieko, wɔ Gyɛlusalɛm.+
7 “Na Gyihova balimoa alie Dwuda ɛdanlɛ azua ne mɔ, amaa Devidi sua nu anyunlunyia nee Gyɛlusalɛmma anyunlunyia anyɛ kpole andɛla Dwuda.
8 Kenle zɔhane, Gyihova babɔ Gyɛlusalɛmma anwo bane;+ kenle zɔhane, mɔɔ le bɛtɛɛ wɔ bɛ avinli la bayɛ kɛ Devidi la, na Devidi abozoamra bayɛ kɛ Nyamenle, kɛ Gyihova anwumabɔvolɛ mɔɔ li bɛ nyunlu la.+
9 Na kenle zɔhane, mebanlea kɛ mebazɛkye maanle maanle mɔɔ dwazo tia Gyɛlusalɛm la amuala bɔkɔɔ.+
10 “Mebawola ɛlolɛ nee modolɛ sunsum meagua Devidi abozoamra nee Gyɛlusalɛmma anwo zo, na bɛbanlea ahenle mɔɔ bɛvale debie bɛwɔle ye la,+ na ɔdaye ti, bɛbazu alɔbɔlɛ ɛzunlɛ kɛ mɔɔ bɛsu ralɛ nrenyia mɔɔ bɛwole ye kokye la; yɛɛ bɛbali ɔ nwo nyane kpole kɛ mɔɔ bɛdi belamunli ralɛ nrenyia anwo nyane la.
11 Kenle zɔhane, alɔbɔlɛ ɛzunlɛ mɔɔ bazi Gyɛlusalɛm la bayɛ kpole kɛ alɔbɔlɛ ɛzunlɛ ne mɔɔ zile Heedadelemɔn mɔɔ wɔ Mɛgido Azɛlɛ sɛsɛ ne azo la.+
12 Na azɛlɛ ne bazu alɔbɔlɛ ɛzunlɛ, abusua biala bazu; Devidi abusua ne, yɛɛ bɛ mraalɛ ne mɔ; Neetan abusua ne,+ yɛɛ bɛ mraalɛ ne mɔ;
13 Livae abusua ne,+ yɛɛ bɛ mraalɛ ne mɔ; Hyemɛyae abusua ne,+ yɛɛ bɛ mraalɛ ne mɔ;
14 yɛɛ mbusua mɔɔ ɛha la amuala, abusua biala, yɛɛ bɛ mraalɛ ne mɔ.
Ɔbodwɛkɛ
^ Hibulu aneɛ nu, “sunsum.”
^ Anzɛɛ “kyɛnze.”
^ Anzɛɛ “adesoa.”
^ Anzɛɛ “ɛleka mɔɔ fɛta bɛ la.”
