Zɛkalaya 13:1-9
13 “Kenle zɔhane, bɛbadu bula bɛamaa Devidi abozoamra nee Gyɛlusalɛmma na bɛava bɛanrinzi ɛtane nee evinli.+
2 Kɛ ɛlɔne Gyihova se la ɛne, “Kenle zɔhane, mebaye ananze aluma meavi azɛlɛ ne azo,+ na bɛnrɛhakye bɛ bieko; na mebaye ngapezoma+ nee sunsum ɛtane ne mɔ noko meavi azɛlɛ ne azo.
3 Na saa awie ka ngapezo bieko a, ye papa nee ye mame mɔɔ bɛwole ye la baze ye kɛ, ‘Ɛbawu, ɔluakɛ wɔbɔ adalɛ wɔ Gyihova duma nu.’ Na ye papa nee ye mame mɔɔ bɛwole ye la bava debie awɔ ye, ɔluakɛ yeha ngapezo.+
4 “Kenle zɔhane, ngapezonli biala babɔ anyiemgba wɔ ye ɛnyelɛzodeɛnwunlɛ nwo wɔ mekɛ mɔɔ ɔbaha ngapezo la; na bɛnrɛwula enrinli* tɛladeɛ+ bɛnrɛbɛlɛbɛla menli bieko.
5 Na ɔbaha kɛ, ‘Menle ngapezonli. Mele ɛyazonlɛnli, ɔluakɛ awie dɔle me wɔ me ngakula nu.’
6 Na saa awie biza ye kɛ, ‘Na nganlɛ ɛhye mɔ mɔɔ bɛwɔ wɔ awane zo la noko ɛ?’* a, ɔbabua kɛ, ‘Menyianle nganlɛ ɛhye mɔ wɔ me gɔnwo mɔ* sua nu.’”
7 “O konle dadeɛ, dwazo tia me mboaneneavolɛ ne,+Dwazo tia sonla mɔɔ le me gɔnwo la,” kɛ ɛlɔne Gyihova se la ɛne.
“Bɔ mboaneneavolɛ ne,+ na maa mboane ne mɔ ɛbɔ asande;+Na mebava me sa meazie ngyikyi ne mɔ anwo.”
8 Kɛ Gyihova se la ɛne, “Azɛlɛ ye amuala,”“Saa bɛkyɛ nuhua nsa a, nwiɔ bavi ɛkɛ na bɛaminli;*Na mɔɔ tɔ zo nsa ne la ala a baha a.
9 Na mebamaa mɔɔ tɔ zo nsa la ava senle nu;Na mebadu bɛ nu evinli kɛ mɔɔ bɛtu dwɛtɛ fufule nu evinli la,Na meazɔ bɛ meanlea kɛ mɔɔ bɛsɔ nvutuke bɛnea la.+
Bɛbabɔ me duma,Na mebalie bɛ zo.
Mebaha kɛ, ‘Bɛle me menli,’+
Na bɛaha kɛ, ‘Gyihova le yɛ Nyamenle.’”
Ɔbodwɛkɛ
^ Anzɛɛ “ngapezonli.”
^ Hibulu aneɛ nu, “bɛwɔ ɛ sa nwo la noko ɛ?” Ɛhye kile, bɛwɔ ɛ kɛnra zo anzɛɛ ɛ nzi.
^ Anzɛɛ “bɛdabɛ mɔɔ bɛkulo me edwɛkɛ la.”
^ Anzɛɛ “bɛawu.”
