Zɛkalaya 3:1-10
3 Na ɔhilele me ɛsɔfo kpanyinli Dwɔhyua+ mɔɔ gyi Gyihova anwumabɔvolɛ ne anyunlu la, na ɛnee Seetan+ gyi ɔ sa fema zo kɛ ɔsi ye adenle.
2 Akee Gyihova anwumabɔvolɛ ne zele Seetan kɛ: “O Seetan, Gyihova ɛdea wɔ,+ Gyihova mɔɔ ɛkpa nu ɛye Gyɛlusalɛm+ la ɛdea wɔ! Asoo tɛ ɛyɛne mɔɔ ɛlɛsɔ la a bɛye bɛvi senle ne anu la?”
3 Ɛnee Dwɔhyua wula adɛladeɛ evinli na ɔgyi anwumabɔvolɛ ne anyunlu.
4 Anwumabɔvolɛ ne zele bɛdabɛ mɔɔ bɛgyi ɔ nyunlu ɛkɛ ne la kɛ, “Bɛyeye ye adɛladeɛ evinli ne mɔ.” Akee ɔzele ye kɛ, “Nea, meye wɔ ɛtane* ne mɔ mevi ɛ nwo, na bɛbawula wɔ adɛladeɛ ngɛnlɛma.”+
5 Ɔti menganle kɛ: “Bɛbɔ ye abotile mɔɔ anwo te la.”+ Na bɛvale abotile mɔɔ anwo te la bɛzoale ye na bɛwulale ye adɛladeɛ; na ɛnee Gyihova anwumabɔvolɛ ne gyi bɛ nwo ɛkɛ.
6 Akee Gyihova anwumabɔvolɛ ne zele Dwɔhyua kɛ:
7 “Mɔɔ ɛlɔne Gyihova ɛha la ɛne, ‘Saa ɛdua me ndenle ne mɔ anu na ɛyɛ gyima mɔɔ meva memaa wɔ la a, mebamaa wɔayɛ ndɛnebuavolɛ wɔ me sua nu+ na wɔanlea* me awuke ne mɔ azo; na mebamaa wɔ adenle meamaa wɔara me nyunlu kɛ menli mɔɔ gyi ɛke la.’
8 “‘O Ɛsɔfo Kpanyinli Dwɔhyua, ɛdawɔ nee ɛ gɔnwo mɔ mɔɔ dede ɛ nyunlu ɛkɛ ne la, mesɛlɛ bɛ bɛdie, ɔluakɛ menli ɛhye mɔ le sɛkɛlɛneɛ; nea! melɛmaa me sonvolɛ+ mɔɔ ye duma a le Ɛfifilɛ+ la ara!
9 Nea bolɛ ne mɔɔ meva mezie Dwɔhyua anyunlu la! Ɛnyelɛ nsuu wɔ bolɛ ko ne anwo; na melɛkɛlɛ zolɛ, mebaye azɛlɛ ne azo fɔlɛlilɛ meavi ɛkɛ wɔ kenle kokye,’+ ɛlɔne Gyihova a se a.
10 “Kenle zɔhane bɛ nuhua ko biala bado ɛsalɛ avɛlɛ ɔ gɔnwo ara ye vanye nee ye feege baka bo,” ɛlɔne Gyihova a se a.+
