Zɛkalaya 5:1-11
5 Memaanle me nye zo bieko, na menwunle nwomamobɔleɛ bie mɔɔ ɛdu lua anwomanyunlu la.
2 Ɔbizale me kɛ: “Duzu a ɛnwu ye a?”
Membuale ye kɛ: “Menwu kɛ nwomamobɔleɛ bie ɛdu lua anwomanyunlu, ye tendenle le kubit 20* yɛɛ ye tɛtɛlɛ le kubit 10.”
3 Akee ɔzele me kɛ: “Ɛhye a le munzule ne mɔɔ ɛlɛkɔ azɛlɛ ye azo amuala la, ɔluakɛ awie biala mɔɔ wua,+ kɛ mɔɔ bɛhɛlɛ ye wɔ ye foa ko la, bɛtɛtwenle ɔ nzo; yɛɛ awie biala mɔɔ ka ndane,+ kɛ mɔɔ bɛhɛlɛ ye wɔ ye foa ko ɛhendeɛ ne la, bɛtɛtwenle ɔ nzo.
4 Kɛ ɛlɔne Gyihova se la ɛne, ‘Mezoa ye na ɔbawolo awule ne nee awie biala mɔɔ fa me duma ka adalɛ ndane la sua nu; na ɔbadɛnla sua zɔhane anu na yeazɛkye ye mbaka nee ye awolɛ ne mɔ.’”
5 Akee anwumabɔvolɛ ne mɔɔ ɛnee ɔ nee me ɛlɛtendɛ la rale ɔ nyunlu na ɔzele me kɛ: “Mesɛlɛ wɔ, maa ɛ nye zo na nea deɛ ne mɔɔ ɛlɛkɔ la.”
6 Ɔti membizale kɛ: “Duzu debie ɔ?”
Ɔbuale me kɛ: “Yifa kɛndɛne* ne a ɛlɛkɔ a.” Ɔdoale zo kɛ: “Debie mɔɔ amumuyɛma zɔho ye wɔ azɛlɛ ye azo amuala la ɛne.”
7 Na menwunle kɛ bɛye nduazo kutukpunli ne mɔɔ bɛva sumi bɛyɛ la, na ɛnee raalɛ bie de kɛndɛne ne anu.
8 Ɔti ɔhanle kɛ: “Raalɛ ɛhye gyi ɛkɛ ne maa Amumuyɛ.” Akee ɔzuhunle ye ɔdole yifa kɛndɛne ne anu bieko na ɔvale ɔ ti ne mɔɔ le sumi la ɔhedale zo.
9 Akee memaanle me nye zo na menwunle mraalɛ nwiɔ bie kɛ bɛdu bɛlua anwoma ne anu bɛlɛba. Bɛ ndɛba le kɛ akoso* ndɛba la. Na bɛmaanle kɛndɛne ne zo bɛhɔle anwomanyunlu.*
10 Ɔti membizale anwumabɔvolɛ ne mɔɔ ɛnee ɔ nee me ɛlɛtendɛ la kɛ: “Nienwu a bɛ nee yifa kɛndɛne ne ɛlɛkɔ a?”
11 Ɔbuale kɛ: “Bɛ nee ye ɛlɛkɔ Hyaenaa* azɛlɛ zo,+ bɛkazi sua bɛamaa ye; na saa bɛwie a, bɛbava ye bɛazie ɛkɛ wɔ ɛleka mɔɔ ɔfɛta ye la.”
Ɔbodwɛkɛ
^ Hibulu aneɛ nu, “yifa” le debie anzɛɛ kɛndɛne mɔɔ bɛfa bɛsuzu yifa la. Yifa le L 22. Nea Mok. B14.
^ Ɔle aloma.
^ Hibulu aneɛ nu, “bɛluale azɛlɛ ne nee anwuma avinli.”
^ Ɛhye kile, Babelonia.
