Zɛkalaya 6:1-15
6 Akee memaanle me nye zo bieko na menwunle ehwili nna kɛ bɛvi awoka nwiɔ avinli bɛlɛba, na awoka ne mɔ le kɔbele awoka.
2 Ehwili ne mɔɔ limoa la mgbɔnwɔ ne mɔ le ngɔkɔlɛ, na ehwili ne mɔɔ tɔ zo nwiɔ la mgbɔnwɔ ne mɔ le bile bile.+
3 Ehwili ne mɔɔ tɔ zo nsa la mgbɔnwɔ ne mɔ le fufule fufule yɛɛ mɔɔ tɔ zo nna la mgbɔnwɔ ne mɔ le ndetandeta yɛɛ alualu.+
4 Membizale anwumabɔvolɛ ne mɔɔ ɛnee ɔ nee me ɛlɛtendɛ la kɛ: “Me menle, na ɛhye mɔ noko ɛ?”
5 Anwumabɔvolɛ ne buale me kɛ: “Ɛhye mɔ a le anwuma sunsum nna ne+ mɔɔ bɛragyinlanle azɛlɛ ye kɔsɔɔti Awulae ne anyunlu na bɛlɛkɔ la.+
6 Mɔɔ* ye mgbɔnwɔ ne mɔ le bile bile la ɛlɛkɔ sɔlɔ azɛlɛ ne azo;+ mgbɔnwɔ fufule ne mɔ ɛlɛkɔ nyevile ne anzi lɔ; yɛɛ mɔɔ bɛ nwo le ndetandeta la ɛlɛkɔ nyiakɛ azɛlɛ ne azo.
7 Na ɛnee mɔɔ bɛ nwo le alualu la anye ɛbolo kɛ bɛkakpɔsa azɛlɛ ne azo.” Na ɔhanle kɛ: “Bɛhɔ, bɛhɔkpɔsa azɛlɛ ne azo.” Na bɛbɔle ɔ bo kɛ bɛkpɔsa azɛlɛ ne azo.
8 Akee ɔdeanle nu na ɔzele me kɛ: “Nea, bɛdabɛ mɔɔ bɛlɛkɔ sɔlɔ azɛlɛ ne azo la ɛmaa Gyihova sunsum ne ɛlie ɔ menle wɔ sɔlɔ azɛlɛ ne azo.”
9 Gyihova edwɛkɛ ne rale me ɛkɛ ne bieko kɛ:
10 “Die mɔɔ Hɛledae, Tobaegya yɛɛ Gyedeeya nee ye vi menli mɔɔ wɔ akɛlɛzonlenlɛ nu ɛkɛ ne rale la; na kenle zɔhane, ɛ nee menli ɛhye mɔ mɔɔ bɛvi Babelɔn bɛra la ɛhɔ Zɛfanaya ara Dwosaya sua nu.
11 Fa dwɛtɛ fufule nee nvutuke yɛ belemgbunli kyɛlɛ* na fa soa Gyɛhozadake ara Dwɔhyua+ mɔɔ ɔle ɛsɔfo kpanyinli la.
12 Na ka kile ye kɛ,“‘Mɔɔ ɛlɔne Gyihova ɛha la ɛne: “Nrenyia ne mɔɔ bɛfɛlɛ ye Ɛfifilɛ+ la ɛne. Ɔbafifi wɔ ɛleka mɔɔ ɔwɔ la, na yeazi Gyihova ɛzonlenlɛsua ne.+
13 Yemɔ a ɔbazi Gyihova ɛzonlenlɛsua ne a, na yemɔ a anyunlunyia* ne bayɛ ye ɛdeɛ a. Ɔbadɛnla ye belemgbunli ebia zo yeali tumi, na eza ɔbayɛ ɛsɔfo wɔ ye belemgbunli ebia ne azo,+ na anzodwolɛ badɛnla bɛ mu nwiɔ bɛ avinli.*
14 Na belemgbunli kyɛlɛ ne* bayɛ ngakyedeɛ* wɔ Gyihova ɛzonlenlɛsua ne anu yeamaa Hilɛm, Tobaegya, Gyedeeya+ yɛɛ Zɛfanaya ara Hɛn.
15 Na bɛdabɛ mɔɔ bɛwɔ moamoa la bara na bɛazɔ nu bɛazi Gyihova ɛzonlenlɛsua ne.” Na bɛbanwu kɛ ɛlɔne Gyihova a zoanle me bɛ nwo ɛkɛ a. Saa bɛtie Gyihova bɛ Nyamenle ne ane a, ɛhye mɔ amuala bazi.’”
Ɔbodwɛkɛ
^ Ɛhye kile, ehwili ne mɔɔ.
^ Anzɛɛ “belemgbunli kyɛlɛ kpole bie.”
^ Anzɛɛ “enililɛ.”
^ Ɛhye kile, ye gyima kɛ tumivolɛ nee ɛsɔfo avinli.
^ Anzɛɛ “belemgbunli kyɛlɛ kpole bie.”
^ Anzɛɛ “ngakyelɛ.”
