Zɛkalaya 7:1-14
7 Na wɔ Belemgbunli Dalayɛse ɛvolɛ mɔɔ tɔ zo nna la anu, Gyihova edwɛkɛ rale Zɛkalaya+ ɛkɛ ne wɔ siane ngɔnla ne mɔɔ bɛfɛlɛ ye Keselɛve* la kenle mɔɔ tɔ zo nna la azo.
2 Menli mɔɔ wɔ Bɛtɛle la zoanle Hyalizɛ nee Religɛm-mɛlɛke nee ye mrenyia ne mɔ kɛ bɛhɔzɛlɛ Gyihova anyunlu ɛlolɛ,
3 bɛbiza ɛlɔne Gyihova sua* nu ɛsɔfoma nee ngapezoma ne mɔ kɛ: “Menzu wɔ siane ne mɔɔ tɔ zo nnu+ la anu na mendua aleɛlilɛ, kɛ mɔɔ meyɛ ye wɔ ɛvolɛ dɔɔnwo anu la ɔ?”
4 Ɛlɔne Gyihova edwɛkɛ ne rale me ɛkɛ ne bieko kɛ:
5 “Ka kile menli mɔɔ wɔ azɛlɛ ne azo la kɔsɔɔti nee ɛsɔfoma ne kɛ, ‘Mekɛ mɔɔ bɛhyele ɛhɔne na bɛzunle alɔbɔlɛ ɛzunlɛ wɔ siane nnu ne nee siane nsuu ne+ anu too ɛvolɛ 70 la,+ asoo bɛhyele bɛmaanle me?
6 Na mekɛ mɔɔ bɛlɛdi na bɛlɛno la, asoo bɛanli yɛɛ bɛanlo bɛammaa bɛ nwo ɔ?
7 Asoo ɔnle kɛ bɛtie Gyihova edwɛkɛ ne mɔɔ ɔmaanle ye alimoa ngapezoma ne bɔle ye nolo,+ wɔ mekɛ mɔɔ ɛnee menli dede Gyɛlusalɛm nee azuamgbole mɔɔ ɛbɔ ye ɛyia la azo anzodwolɛ nu la, yɛɛ mekɛ mɔɔ ɛnee menli de Nɛgɛbe nee Hyifɛla la ɔ?’”
8 Gyihova edwɛkɛ ne rale Zɛkalaya ɛkɛ ne bieko kɛ:
9 “Mɔɔ ɛlɔne Gyihova ɛha la ɛne, ‘Bɛva pɛlepɛlelilɛ bɛbua ndɛne nɔhalɛ nu,+ na bɛ nee bɛ gɔnwo mɔ ɛli ye wɔ ɛlɔlɛ kpundii+ nee anwunvɔnezelɛ nu.
10 Bɛmmasisi kunlavolɛ anzɛɛ arisa ralɛ,+ ɛyɛvolɛ+ anzɛɛ ehyianli;+ yɛɛ bɛmmafa bɛ diema anwo adwenle ɛtane wɔ bɛ ahonle nu.’+
11 Noko bɛkpole kɛ bɛbadie,+ na bɛyɛle anzosesebɛ bɛhakyile bɛ nzi bɛzile me,+ na bɛduoduale bɛ nzo amaa bɛande.+
12 Bɛmaanle bɛ ahonle yɛle se kɛ daemɔn*+ la na bɛandie mɛla* ne nee edwɛkɛ ne mɔɔ ɛlɔne Gyihova luale ye sunsum ne azo vale zoanle alimoa ngapezoma ne mɔ la.+ Ɔti ɛlɔne Gyihova vale bɛ nwo ɛya kpole kpalɛ.”+
13 “‘Kɛ mɔɔ menvɛlɛle* na bɛandie la,+ zɔhane ala a bɛvɛlɛle na meandie a,’+ ɛlɔne Gyihova a se a.
14 ‘Na menvale anwoma kpole bie membɔle bɛ asande wɔ maanle maanle mɔɔ bɛnze lɔ la kɔsɔɔti anu,+ na azɛlɛ mɔɔ bɛgyakyile ye bɛ nzi la dɔle mgbane mɔɔ awie ɛngɔ anzɛɛ ɛmba a;+ ɔluakɛ bɛmaanle azɛlɛ kɛnlɛma ne hakyile debie ɛzulolɛ bie.’”
Ɔbodwɛkɛ
^ Anzɛɛ “ɛzonlenlɛsua.”
^ Anzɛɛ ɔkola ɔkile, “bolɛ ɛsesebɛ.”
^ Anzɛɛ “adehilelɛ.”
^ Anzɛɛ “ɔvɛlɛle.”
