Ayezaya 19:1-25
19 Nrɛlaleɛ mɔɔ tia Yigyibiti la ɛne:+
Nea! Gyihova de amungu mɔɔ anwo yɛ ndɛ la azo ɛlɛba Yigyibiti.
Yigyibiti nyamenle ne mɔ mɔɔ nvasoɛ ɛnle bɛ nwo zo la anwo bawoso bɛ wɔ ɔ nyunlu,+Na Yigyibitima ahonle badu.
2 “Mebamaa Yigyibitinli adwazo atia Yigyibitinli,Na bɛaho bɛatia bɛ nwo,Ko biala nee ɔ diema nee ɔ gɔnwo baho,Suakpole baho atia suakpole, belemgbunlililɛ baho atia belemgbunlililɛ.
3 Yigyibitima anye zo bada bɛ,Na mebazɛkye bɛ ngyehyɛleɛ biala.+
Bɛbahɔbiza edwɛkɛ wɔ nyamenle mɔɔ nvasoɛ ɛnle bɛ nwo zo,Silihyelɛma, menli mɔɔ tendɛ sunsum ɛtane nloa azo yɛɛ bɛdabɛ mɔɔ bɛka kenle bie edwɛkɛ la ɛkɛ.+
4 Mebaye Yigyibiti meawula menlenlɛ bie mɔɔ ati yɛ se la asa anu,Na belemgbunli atisesebɛ bie bali bɛ nwo zo tumi,”+ kɛ ɛlɔne Gyihova, nɔhalɛ Awulae ne se la ɛne.
5 Nyevile ne anu nzule basesa,Yɛɛ azule ne basesa na yeayɛ resee.+
6 Azule ne mɔ babɔ nvoanvoa;Yigyibiti Naele kanale ne mɔ basesa na bɛayɛ resee.
Ndɔ nee ndile ne mɔ bakpɔlɔ.+
7 Mbaka mɔɔ wɔ Azule Naele ne anwo nee Naele ne anloa,Yɛɛ ninyɛne mɔɔ bɛlua wɔ Naele ne anloa+ la amuala bawu.+
Anwoma ne bapia bɛ ahɔ.
8 Fɛlɛkyevoma bali nyane,Menli mɔɔ to koba wɔ Naele ne anu la bazu aye awolɛ,Na bɛdabɛ mɔɔ bɛto avonle wɔ azule ne anu la azo bade.
9 Menli mɔɔ yɛ bolɔfodɔ* nwo gyima+Yɛɛ bɛdabɛ mɔɔ bɛnwo ɛdanlɛ fufule la babɔ anyiemgba.
10 Ye menli mɔɔ nwo ndanlɛ la anwo babubu bɛ;Ɛkpafoma kɔsɔɔti bali nyane.*
11 Zowan mgbanyima+ le ahoasea.
Falo folɛtuvoma mɔɔ ze nrɛlɛbɛ la ɛndu folɛ kpalɛ.+
Duzu ati a bɛka bɛkile Falo kɛ:
“Mele nrɛlɛbɛvolɛma ara,Mele tete arelemgbunli ne mɔ ara ɛ”?
12 Ɛnee akee wɔ nrɛlɛbɛvolɛma ne wɔ ni?+
Saa bɛze Yigyibiti anwo kpɔkɛ mɔɔ ɛlɔne Gyihova ɛbɔ la a, maa bɛha.
13 Zowan mgbanyima ɛyɛ ahoasea;Bɛbɛlɛbɛla Nɔfo* mgbanyima;+Ye mbusua mgbanyima ɛmaa Yigyibiti ɛminli.
14 Gyihova ɛwola anyezota sunsum ɛgua ɔ nwo zo;+Yɛɛ bɛmaa Yigyibiti ɛminli wɔ debie biala ɛyɛlɛ nu,Kɛ nzanli mɔɔ ɛbo ɛfefe na ɔla nu la.
15 Na Yigyibiti ɛnrɛhola ɛnrɛyɛ debie biala,Etile o, dualɛ o, ngane anzɛɛ ndile* ɛnrɛhola ɛnrɛyɛ ɛhwee.
16 Kenle zɔhane Yigyibiti bayɛ kɛ raalɛ, ɔ nwo bawoso ye na ye ahonle adu ɔlua ɛlɔne Gyihova asa ne mɔɔ ɔbava yeara ɔ nwo zo la anwo ɛzulolɛ ti.+
17 Na Dwuda azɛlɛ ne bamaa ɛzulolɛ aha Yigyibiti. Bɛbɔ ye duma bɔbɔ a bɛ ahonle badu ɔlua kpɔkɛ mɔɔ ɛlɔne Gyihova ɛbɔ ɛtia bɛ la ati.+
18 Kenle zɔhane azuamgbole nnu mɔɔ wɔ Yigyibiti la baha Keena aneɛ+ na bɛaha ndane kɛ bɛbali nɔhalɛ bɛamaa ɛlɔne Gyihova. Bɛbavɛlɛ suakpole ne ko Ɛzɛkyelɛ Suakpole.
19 Kenle zɔhane bɛbazi afɔlemokyea bɛamaa Gyihova wɔ Yigyibiti azɛlɛ ne avinli na bɛakpɔnla pila bɛamaa Gyihova wɔ ye ɛweɛne zo.
20 Ɔbayɛ ɛlɔne Gyihova anwo sɛkɛlɛneɛ nee daselɛ wɔ Yigyibiti azɛlɛ zo; ɔlua menli mɔɔ sisi bɛ la ati, bɛbazu bɛavɛlɛ Gyihova na ɔbazoa dievolɛ kpole bie yeamaa yealie bɛ.
21 Gyihova bamaa Yigyibitima anwu ye, yɛɛ Yigyibitima banwu Gyihova wɔ kenle zɔhane; bɛbava afɔlebɔdeɛ nee ahyɛlɛ ninyɛne bɛara na bɛbabɔ Gyihova ɛwɔkɛ na bɛali zolɛ.
22 Gyihova bahwe Yigyibiti anzo,+ ɔbahwe ɔ nzo na yeayɛ ye ayile; na bɛbazia bɛara Gyihova ɛkɛ, ɔbadie bɛ nzɛlɛlɛ na yeayɛ bɛ ayile.
23 Kenle zɔhane ademgbole+ bala Yigyibiti nee Aselea avinli. Akee Aselea bara Yigyibiti na Yigyibiti ahɔ Aselea, na Yigyibiti nee Aselea babɔ nu azonle Nyamenle.
24 Kenle zɔhane Yizilayɛ badɔ Yigyibiti nee Aselea azo nsa,+ na ɔbayɛ nyilalɛ yeamaa azɛlɛ ye,
25 ɔluakɛ ɛlɔne Gyihova bayila ye na yeaha kɛ: “Nyilalɛ ɛha me menli Yigyibiti nee Aselea mɔɔ le me sa anloa gyima la yɛɛ Yizilayɛ, me agyapadeɛ ne.”+
Ɔbodwɛkɛ
^ Ɔle kɛ fiene la.
^ Anzɛɛ “ɛkɛla bali nyane.”
^ Anzɛɛ “Mɛmefese.”
^ Anzɛɛ ɔkola ɔkile, “ɛrɛlakɛ anzɛɛ ndɔ.”
