Ayezaya 41:1-29
41 “Bɛmɛ mbɔra, bɛyɛ koonwu bɛdie me;*Bɛmaa maanle maanle ne mɔ ɛnyia anwosesebɛ fofolɛ.
Bɛmaa bɛbikye me na akee bɛdendɛ.+
Bɛmaa yɛyia nu wɔ ndɛnebualɛ ti.
2 Nwane a ɛye awie ɛvi aduduleɛ,+Na yevɛlɛ ye wɔ tenleneyɛlɛ nu kɛ ɔrɛla Ɔ gyakɛ abo,*Ɔmaa ɔva maanle maanle ɔmaa yeNa ɔmaa ɔnlea arelemgbunli nwo zo a?+
Nwane a ɔmaa bɛyɛ kɛ munlutu wɔ ye konle dadeɛ nloa,Na ɔfa ye ɛda ne ɔbɔ bɛ asande kɛ abonle mɔɔ anwoma ɛlɛbɔ ye la a?
3 Ɔfoa bɛ, na ɔpɛ nu mɔɔ debie ɛnzi ye adenleWɔ adenle mɔɔ ɔtɛfale zo ɛlɛ la azo.
4 Nwane a ɛyɛ ɛhye na yeli nwolɛ gyima,Na yevɛlɛ awolɛndoazo ne mɔ ɔvi mɔlebɛbo ne a?
Medame Gyihova a mele Alimoa Ne a;+Na wɔ menli mɔɔ li amozi la anu, kɛ mede ala la ɛne.”+
5 Mbɔra ne mɔ ɛnwu ye na bɛ ahonle ɛdu.
Azɛlɛ ye muleɛ nna ne amuala anwo woso bɛ.
Bɛbikye na bɛba bɛ nyunlu.
6 Ko biala boa ɔ gɔnwoNa ɔka ɔkile ɔ diema kɛ: “Nyia anwosesebɛ.”
7 Ɔti dwinvolɛ maa mbulalɛ dwinvolɛ anwosesebɛ;+Awie mɔɔ fa hamenle tenrɛdenrɛ debie laMaa mɔɔ fa hamenle bobɔ ninyɛne wɔ bulalɛ zo la anwosesebɛ.
Ɔka deɛ mɔɔ yesosɔ la anwo edwɛkɛ kɛ: “Ɔle kpalɛ.”
Akee ɔfa pɛlɛko ɔbobɔ nuhua amaa yeandɔ aze.
8 “Noko wɔmɔ Yizilayɛ, ɛle me sonvolɛ,+O Gyekɔbo, wɔmɔ mɔɔ mekpa nu meye wɔ,+Me gɔnwo Ebileham ara,+
9 Wɔmɔ mɔɔ menyele wɔ menvile azɛlɛ ne anloa nehane,+Yɛɛ wɔmɔ mɔɔ menvɛlɛle wɔ menvile moamoa nehane la.
Menganle mengilele wɔ kɛ, ‘Ɛle me sonvolɛ;+Mekpa nu meye wɔ; metɛkpole wɔ.+
10 Mmasulo, ɔluakɛ me nee wɔ lua.+
Mmadwenledwenle, ɔluakɛ mele wɔ Nyamenle.+
Mebamaa wɔ anwosesebɛ, ɛhɛe, mebaboa wɔ,+Mebava me tenleneyɛlɛ ɛsalɛ fema ne meazɔ wɔ nu ɛsesebɛ.’
11 Nea! Menli kɔsɔɔti mɔɔ ɛva ɛ nwo ɛya la babɔ anyiemgba na bɛ nyunlu agua aze.+
Menli kɔsɔɔti mɔɔ nee wɔ ko la bayɛ mgbane na bɛ bo zo aminli.+
12 Ɛbakpondɛ menli mɔɔ nee wɔ dwudwu la, noko ɛnrɛnwu bɛ;Menli mɔɔ fa konle toa wɔ la bayɛ mgbane kɛ debie mɔɔ ɛnle ɛkɛ la.+
13 Ɔluakɛ medame Gyihova wɔ Nyamenle ne, melɛ ɛ sa fema ne anu,Na melɛka meahile wɔ kɛ, ‘Mmasulo, mebaboa wɔ.’+
14 Mmasulo, wɔmɔ Gyekɔbo mɔɔ ɛle kɛ sone,*+Bɛmɛ Yizilayɛma, mebaboa bɛ,” kɛ bɛ Kpɔnevolɛ Gyihova,+ Yizilayɛ Nwuanzanwuanza Ko ne se la ɛne.
15 “Nea! Meyɛ wɔ ma ɛwosolɛ baka,+Ma ɛwosolɛ debie fofolɛ mɔɔ ɔ gye le nwiɔ.
Ɛbatietia awoka ne mɔ azo na wɔabubu bɛNa wɔamaa awoka ngyikyi ne mɔ ayɛ kɛ abonle la.
16 Ɛbakpogya bɛ,Na anwoma ne bapia bɛ ahɔ;Ahumu bamaa bɛabɔ asande.
Ɛbali fɛlɛko wɔ Gyihova anu,+Na ɛbava Yizilayɛ Nwuanzanwuanza Ko ne wɔadu ɛ nwo.”+
17 “Menli mɔɔ anwo ɛhyele bɛ nee ehyiavolɛma kpondɛ nzule, noko bie ɛnle ɛkɛ.
Nzuhɔne ɛmaa bɛ tafinlima azo ɛwe.+
Medame Gyihova, mebalie bɛ zo.+
Medame Yizilayɛ Nyamenle ne, menrɛkpo bɛ.+
18 Mebamaa azule aze awoka ngyikyi mɔɔ ɛhwee ɛnle zo la azo+Na azudenle adenrɛ mbɔnza ne mɔ anu.+
Mebamaa fienemgbole ahakyi ɛleka mɔɔ azule se laNa azɛlɛ resee ahakyi nzubula.+
19 Mebalua sida baka,Akasea nee mɛtɛle yɛɛ paane baka wɔ ɛsɛlɛ zo.+
Mebamaa dwunipa baka,Nee aahye* baka yɛɛ sepelɛse baka afifi fienemgbole nu,+
20 Amaa menli kɔsɔɔti anlea na bɛanwu yeBɛadie na bɛade ɔ boKɛ Gyihova asa a ɛyɛ ɛhye a,Yɛɛ Yizilayɛ Nwuanzanwuanza Ko ne a ɛmaa yeyɛ zɔ a.”+
21 Gyihova se, “Bɛha bɛ edwɛkɛ.”
Gyekɔbo Belemgbunli ne se, “Bɛva nwolɛ daselɛ bɛrɛla.”
22 “Bɛmaa yɛnwu nwolɛ daselɛ na bɛha ninyɛne mɔɔ bazi la bɛhile yɛ.
Bɛha ninyɛne dɛba* ne mɔ anwo edwɛkɛ bɛhile yɛ,Amaa yɛadwenledwenle nwolɛ* na yɛanwu mɔɔ bavi nu ara la.
Anzɛɛ bɛha ninyɛne mɔɔ ɛlɛba la bɛhile yɛ.+
23 Bɛha mɔɔ bazi kenle bie la bɛhile yɛ,Amaa yɛanwu kɛ bɛle nyamenle.+
Ɛhɛe, bɛyɛ debie kpalɛ anzɛɛ ɛtane,Amaa yɛnwu ye a yeazi yɛ nwo.+
24 Nea! Bɛnle ɛhwee,Yɛɛ mɔɔ bɛyɛ la le mgbane.+
Awie biala mɔɔ kɛzonle bɛ la le kyibadeɛ.+
25 Meye awie mevi sɔlɔ nehane, na ɔbara,+Awie mɔɔ vi aduduleɛ nehane+ mɔɔ bara me duma nu la.
Ɔbatietia tumivolɛma anwo zo kɛ asɛɛ bɛle ndɛtɛlɛ,+Kɛ nwovolɛ mɔɔ ɛlɛfɔtɔ ndɛtɛlɛ la.
26 Nwane a hanle ɛhye anwo edwɛkɛ wɔ mɔlebɛbo ne, amaa yɛanwu ye,Anzɛɛ ɔvi tete ne, amaa yɛahola yɛaha kɛ, ‘Ɔle nɔhalɛ’ a?+
Nɔhalɛ nu, awie ambɔ ye nolo!
Awie biala anga!
Awie ande edwɛkɛ biala anvi bɛ ɛkɛ!”+
27 Medame a menlimoale menganle mengilele Zayɔn kɛ: “Nea!+ Bɛmɛ ɛne!”
Na mebamaa awie mɔɔ lɛ edwɛkpa la ara Gyɛlusalɛm.+
28 Noko mengɔle zo meneanle, na meannwu awie biala;Bɛ nuhua ko bɔbɔ ɛnle ɛkɛ mɔɔ tu folɛ a.
Menzele bɛ kɛ bɛbua.
29 Nea! Bɛ muala bɛle mgbane.*
Bɛ gyima le mgbane.
Bɛ mbulalɛ ananze ne mɔ le anwoma nee debie mɔɔ ɛnle ɛkɛ.+
Ɔbodwɛkɛ
^ Anzɛɛ “bɛyɛ koonwu wɔ me nyunlu.”
^ Ɛhye kile, kɛ ɔrazonle Ye.
^ Ɛhye kile, awie mɔɔ ɛnlɛ anwobanebɔlɛ nee koahweabane.
^ Baka kpole bie mɔɔ ye tendenle le mita 15. Baka ne kɔla le nzonle.
^ Anzɛɛ “yɛava yɛ ahonle yɛali ɔ nzi.”
^ Hibulu aneɛ nu, “alimoa ninyɛne.”
^ Anzɛɛ “bɛle kɛ debie mɔɔ ɛnle ɛkɛ.”
