Ayezaya 47:1-15
47 O Babelɔn,*+Dwu badɛnla munlutu nu,
O Kaledeama suakpole,*Tɛnla azɛlɛ nwo wɔ ɛleka mɔɔ belemgbunli ebia ɛnle ɛkɛ la,+Ɔluakɛ menli ɛnrɛdɛfɛdɛfɛ wɔ yɛɛ bɛnrɛlielie wɔ zo bieko.
2 Fa ɛdibolɛ na ti esamo.
Ye ɛ ti zo aguzo ne.
Ye wɔ tɛladeɛ ne maa ɛ gyakɛ anwo ɛgua ɛkɛ.
Pɛ azule ne mɔ.
3 Ɛ nwo bala zo.
Wɔ anyiemgba ne bala ali.
Mebali nzenralɛ,+ na awie biala ɛnrɛzi me adenle.*
4 “Yɛ kpɔnevolɛ ne—Ye duma a le ɛlɔne Gyihova—Yemɔ a le Yizilayɛ Nwuanzanwuanza Ko ne.”+
5 Tɛnla ɛkɛ ne koonwu maa awozinli ɛva wɔ,O Kaledeama suakpole;+Bɛnrɛvɛlɛ wɔ Arelemgbunlililɛ Ɔbahyema* bieko.+
6 Menvale me menli ne anwo ɛya.+
Menguale me agyapadeɛ ne anwo evinli,+Na menvale bɛ menwulale ɛ sa nu.+
Noko wɔanze bɛ anwunvɔne.+
Ɛvale gyɛnvayile ɛlomboɛ ɛdole mrelera bɔbɔ akɔme zo.+
7 Ɛhanle kɛ: “Mebayɛ Ɔbahyema* dahuu.”+
Wɔandwenle ninyɛne ɛhye mɔ anwo;Wɔanzuzu kɛzi edwɛkɛ ɛhye mɔ bahɔwie ye la anwo.
8 Akee tie ɛhye, O wɔmɔ mɔɔ ɛkulo anyelielɛ,+Mɔɔ ɛ nwo ɛdɔ wɔ na ɛka ye wɔ wɔ ahonle nu kɛ:
“Medame a le medame, na awie bieko ɛnle ɛkɛ.+
Menrɛyɛ kunlavolɛ.
Menrɛli abawuo ɛlɛ.”+
9 Noko ninyɛne nwiɔ ɛhye bado wɔ arɛlevilɛ nu kenle ko ala:+
Ɛbali abawuo na wɔayɛ kunlavolɛ.
Bɛbava bɛ tumi ne amuala bɛara ɛ nwo zo+Ɔlua wɔ silihyelɛ bebelebe ne nee wɔ ngonyiayelɛ tumi kpole ne amuala ati.*+
10 Ɛvale ɛ rɛle ɛwulale wɔ amumuyɛyɛlɛ ne anu.
Ɛhanle kɛ: “Awie biala ɛnnwu me.”
Wɔ nrɛlɛbɛ nee wɔ adwenle ne a ɛmaa wɔminli a,Na ɛka ye wɔ wɔ ahonle nu kɛ: “Medame a le medame, na awie bieko ɛnle ɛkɛ.”
11 Noko munzule bado wɔ,Na wɔ ngonyia nyɛleɛ ne mɔ biala ɛnrɛhola ɛnrɛzi ye adenle.*
Amaneɛnwunlɛ bara ɛ nwo zo; na ɛnrɛhola ɛnrɛyɛ nwolɛ ɛhwee.
Ɛzɛkyelɛ bara ɛ nwo zo arɛlevilɛ nu mɔɔ ɛ nye ɛnla a.+
12 Akee toa wɔ ngonyiayelɛ nee wɔ silihyelɛ bebelebe ne,+Mɔɔ sumunli wɔ ngakula nu wɔvɛ nwolɛ la azo.
Bie a ɔbaboa wɔ;Bie a ɔbaha menli ɛzulolɛ.
13 Wɔ folɛtuvoma dɔɔnwo ne ɛmaa wɔvɛ.
Maa bɛdwazo na bɛlie wɔ,Bɛdabɛ mɔɔ bɛsonle ninyɛne mɔɔ wɔ anwuma,* mɔɔ bɛnea nwɔlɔra nu,+Bɛdabɛ mɔɔ bɛnea siane fofolɛNa bɛka ninyɛne mɔɔ bado wɔ la.
14 Nea! Bɛle kɛ ndile.
Senle bayela bɛ.
Bɛnrɛhola bɛnrɛlie bɛ nwo* bɛnrɛvi sendɔlɔra ne tumi nu.
Ɛhye ɛnle samɛnlakɛ mɔɔ maa bɛ nwo yɛ wuluwulu,Yɛɛ ɛhye ɛnle senle mɔɔ bɛtɛnla nwolɛ a.
15 Kɛ wɔ ngonyiama ne bayɛ la ɛne,Bɛdabɛ mɔɔ sumunli wɔ ngakula nu ɛ nee bɛ vɛle la.
Bɛbaluolua nu, ko biala bava ye adenle zo.*
Awie biala ɛnle ɛkɛ mɔɔ ɔbalie wɔ a.+
Ɔbodwɛkɛ
^ Hibulu aneɛ nu, “Kaledeama ara raalɛ.”
^ Hibulu aneɛ nu, “Babelɔn ara raalɛ mɔɔ ɛnze nrenyia.”
^ Anzɛɛ ɔkola ɔkile, “na menrɛze awie biala mɔɔ me nee ye kɛyia la anwunvɔne.”
^ Anzɛɛ “Belemgbunli Raalɛ.”
^ Anzɛɛ “Belemgbunli Raalɛ.”
^ Anzɛɛ ɔkola ɔkile, “Ɔnva nwo wɔ silihyelɛ nee wɔ ngonyiayelɛ ne amuala.”
^ Anzɛɛ “Na ɛnrɛnwu kɛzi ɛye nwolɛ ngonyia wɔamaa yeagyakyi a.”
^ Anzɛɛ ɔkola ɔkile, “Bɛdabɛ mɔɔ bɛkyɛ anwuma nu ekpunli ekpunli; Nwɔlɔra neɛnleanuma.”
^ Anzɛɛ “bɛ ɛkɛla.”
^ Hibulu aneɛ nu, “bahɔ ye maanzinli nu.”
