Ayezaya 6:1-13
6 Wɔ ɛvolɛ ne mɔɔ Belemgbunli Yuzaya wule la anu,+ menwunle Gyihova kɛ ɔde belemgbunli ebia kpole bie anu,+ na ye tɛladeɛ ne anloa yile ɛzonlenlɛsua ne tɛkɛɛ.
2 Ɛnee sɛlafen gyigyi ɔ ti zo anwuma; ko biala lɛ ndɛbalɛ nsia. Ko biala fa nwiɔ keda* ɔ nyunlu, ɔfa nwiɔ ɔkeda ɔ gyakɛ anwo yɛɛ ɔfa nwiɔ ɔtu.
3 Na ko fɛlɛ ko na ɔka kɛ:
“Nwuanzanwuanza, nwuanzanwuanza, nwuanzanwuanza a le ɛlɔne Gyihova.+
Ye anyunlunyia ɛyi azɛlɛ ye amuala tɛkɛɛ.”
4 Na ɛnelɛ ne dede ne* maanle ndɛla ne mɔ mɔɔ dedɛ anlenkɛ ne anu la wosole, na esike yile sua ne tɛkɛɛ.+
5 Akee menganle kɛ: “Medame, me gyakɔ!
Mewu mewie,*Ɔluakɛ mele sonla mɔɔ me nloa anu edwɛkɛ nwo ɛnde,Yɛɛ mede menli mɔɔ bɛ nloa anu edwɛkɛ nwo ɛnde la avinli;+Ɔluakɛ meva me nye menwu Belemgbunli ne, ɛlɔne Gyihova mumua ne!”
6 Na sɛlafen ne ko dule rale me nwo ɛkɛ, na ɛnee ɔlɛ samɛnlakɛ woonwu+ mɔɔ yeva fefadeɛ yeye yevi afɔlemokyea ne azo la wɔ ɔ sa nu.+
7 Ɔvale ɔ sa ɔhanle me nloa na ɔhanle kɛ:
“Nea! Deɛ ɛhye ɛha ɛ nloa.
Bɛye wɔ fɔlɛlilɛ ne bɛvi ɛkɛ,Yɛɛ bɛkpɔda wɔ ɛtane ne.”
8 Akee mendele Gyihova ane kɛ ɔlɛbiza kɛ: “Nwane a menzoa ye a, na nwane a bahɔ amaa yɛ a?”+ Na menganle kɛ: “Mewɔ ɛke! Soa me!”+
9 Na ɔbuale kɛ, “Kɔ, na kɔha kile menli ɛhye kɛ:
‘Bɛbadie, bɛadie,Noko bɛnrɛde ɔ bo;Bɛbanlea, bɛanlea,Noko bɛnrɛnwu ɛhwee.’+
10 Maa menli ɛhye ahonle ɛsolo,+Maa bɛ nzo ɛyɛ se,+Na bɛheda bɛ nye,Amaa bɛanva bɛ nye bɛannwu debieNa bɛanva bɛ nzo bɛande edwɛkɛ,Amaa bɛ ahonle ande ɔ boNa bɛahakyi na meayɛ bɛ ayile.”+
11 Yemɔti menganle kɛ: “O Gyihova, kɔkpula kenlenzu?” Akee ɔhanle kɛ:
“Kɔkpula kɛ azuamgbole ne mɔ bazɛkye mɔɔ awie ɛnde zolɛNa azua ne mɔ ayɛ mɔɔ menli ɛnle nuNa azɛlɛ ne azɛkye adɔ mgbane;+
12 Kɔkpula kɛ Gyihova bavoa menli yeamaa bɛahɔ moamoa+Na azɛlɛ ne mɔɔ ɛdɔ mgbane la ayɛ kpole.
13 “Noko saa ngyɛnu bulu anu ko ka ɛkɛ a, bɛbazia bɛayela ye kɛ baka kpole nee oku baka mɔɔ bɛpɛ ye bɛdo aze na bɛgyakyi ye dosinli ne la; ma* mɔɔ le nwuanzanwuanza la a bayɛ ye dosinli ne a.”
Ɔbodwɛkɛ
^ Hibulu aneɛ nu, “Ɔfa nwiɔ ɔkeda.”
^ Anzɛɛ “Na ahenle mɔɔ dendɛle la ane.”
^ Hibulu aneɛ nu, “Bɛha me nloa bɛdo nu.”
^ Anzɛɛ “ralɛ.”
