Ayezaya 7:1-25
7 Wɔ Yuzaya ara Dwotam ara Ehaze,+ Dwuda belemgbunli ne mekɛ zo, Selea Belemgbunli Rilizen nee Relɛmalaya ara Pikaa,+ Yizilayɛ belemgbunli ne rale kɛ ɔ nee Gyɛlusalɛm baho, noko yeangola yeango yeanva* suakpole ne.+
2 Bɛbɔle Devidi abozoamra amaneɛ kɛ: “Selea ɛhɔboka Yifelaem anwo.”
Na Ehaze nee ye menli ne ahonle dule na bɛ nwo wosole bɛ kɛ ɛbɔ nu mbaka mɔɔ anwoma ɛlɛbɔ bɛ la.
3 Akee Gyihova zele Ayezaya kɛ: “Mesɛlɛ wɔ, finde na ɛ nee ɛ ra Hyiyaa-gyahyɛbe* ɛhɔyia Ehaze,+ wɔ sɔlɔ nzubula adenle ne mɔɔ kɔ azɛlɛ ne mɔɔ bɛkpo ninyɛne wɔ zo la ademgbole ne azo lɔ.+
4 Ka kile ye kɛ, ‘Nea boɛ na gyinla ɛ nwo. Mmasulo yɛɛ mmamaa wɔ ahonle tu ɔlua ɛyɛne azinli nwiɔ ɛhye mɔɔ ɛlɛkpu esike la ati, Rilizen nee Selea yɛɛ Relɛmalaya ara ne ɛya kpole ne ati.+
5 Ɔluakɛ Selea nee Yifelaem yɛɛ Relɛmalaya ara ne ɛbɔ ɛ nwo kpɔkɛ ɛtane kɛ:
6 “Bɛmaa yɛhɔ Dwuda anwo zo yɛhɔtete ye nu* na yɛli ɔ nwo zo konim yɛva,* na yɛva Tabiale ara nrenyia ne yɛyɛ ye belemgbunli.”+
7 “‘Edwɛkɛ mɔɔ Tumivolɛ Awulae Gyihova ɛha la ɛne:
“Ɔnrɛyɛ boɛ,Yɛɛ ɔnrɛzi ɛlɛ.
8 Ɔluakɛ Selea ati a le Damasekɛse,Yɛɛ Damasekɛse ati a le Rilizen.
Ɛvolɛ 65 ala anuBɛbazɛkye Yifelaem bɔkɔɔ na ɔnrɛyɛ maanle bieko.+
9 Yifelaem ati a le Samɛlea,+Yɛɛ Samɛlea ati a le Relɛmalaya ara ne.+
Saa bɛannyia diedi kpundii a,Bɛnrɛhola kpundii gyinla.”’”
10 Gyihova doale zo zele Ehaze kɛ:
11 “Biza sɛkɛlɛneɛ fi Gyihova wɔ Nyamenle ne ɛkɛ;+ ɔbahola yeayɛ kuma kɛ Nla* anzɛɛ ye tendenle bahola adwu anwomanyunlu.”
12 Noko Ehaze hanle kɛ: “Menrɛbiza, yɛɛ menrɛzɔ Gyihova menrɛnlea.”
13 Akee Ayezaya hanle kɛ: “O Devidi abozoamra, mesɛlɛ bɛ bɛdie. Asoo ɔle debie ekyi kɛ bɛkɛha menli ɛya ɔ? Eza bɛkpondɛ kɛ bɛka Nyamenle ɛya ɔ?+
14 Yemɔti Gyihova mumua ne bamaa wɔ sɛkɛlɛneɛ: Nea! Bɛlɛra ne banrenzɛ na yeawo ralɛ nrenyia,+ na ɔbado ye duma Yemanoɛle.*+
15 Ɔkadwu mekɛ mɔɔ ɔbanwu kɛzi bɛkpo ɛtane na bɛfa kpalɛ la, ɔbali bɛta nee wolɛ.
16 Ɔluakɛ kolaa na kakula ne anwu kɛzi bɛkpo ɛtane na bɛfa kpalɛ la, arelemgbunli nwiɔ ne mɔɔ ɛsulo bɛ la azɛlɛ ne badɔ mgbane bɔkɔɔ.+
17 Gyihova bamaa mekɛ mɔɔ bie ɛtɛtole bɛ ɛlɛ ɔvi mekɛ mɔɔ Yifelaem hwenle ɔ nwo vile Dwuda anwo la ara ɛdawɔ nee wɔ menli ne nee wɔ papa sua nu amra anwo zo,+ ɔluakɛ ɔbava Aselea belemgbunli ne yeara.+
18 “Kenle zɔhane, Gyihova babɔ nvonloma avɛlɛ nrɛzenra mɔɔ wɔ Yigyibiti Naele azudenle ne mɔ anu wɔ moamoa lɔ nee wolɛ mɔɔ wɔ Aselea azɛlɛ zo la,
19 na bɛ muala bɛbara, na bɛaradɛnlɛdɛnla mbɔnza* mgbole, awolɛ adokule ne mɔ yɛɛ mbowule nu nee ɛleka mɔɔ nzule wɔ la kɔsɔɔti.
20 “Kenle zɔhane, Gyihova babɔ biledi* ɛkpa avi maanzinli mɔɔ wɔ Azule ne* anzi lɔ la ɛkɛ, ɔbalua Aselea belemgbunli ne anwo zo+ yeakpa ɔ ti nee ɔ gyakɛ anwo enrinli na eza yeakpa ɔ kɛsa enrinli ne.
21 “Kenle zɔhane, sonla bava ɛnlankɛ ralɛ nee mboane nwiɔ azie.
22 Na kɛmɔ meleke babu la ati, ɔbali bɛta, na awie biala mɔɔ baha azɛlɛ ne azo la bali bɛta nee wolɛ.
23 “Kenle zɔhane, ɛleka biala mɔɔ ɛnee vanye 1,000 mɔɔ ye bolɛ le dwɛtɛ fufule 1,000 wɔ la, mbowule nee ndile ngome a bafifi ɛkɛ a.
24 Menli bava ɛda nee ɛda mbaka ahɔ ɛkɛ, ɔluakɛ azɛlɛ ne azo amuala bayɛ mbowule nee ndile.
25 Na awoka ne mɔ azo amuala mɔɔ ɛnee bɛfa koanlɛ bɛdɔ la, ndile nee mbowule ti, bɛnrɛbikye ɛkɛ; bɛbayɛ nlankɛ adidileka na mboane aluolua ɛkɛ.”
Ɔbodwɛkɛ
^ Anzɛɛ ɔkola ɔkile, “bɛangola bɛango bɛanva.”
^ Ɔ bo kile “Menli Mɔɔ Ɛha La Ala A Bazia Ara A.”
^ Anzɛɛ ɔkola ɔkile, “yɛhɔnwunlonwunla ye.”
^ Anzɛɛ “na yɛpɛ adokule yɛgua ye bane ne anu.” Hibulu aneɛ nu, “yɛbubu ye.”
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Ɔ bo kile “Nyamenle Nee Yɛ De.”
^ Anzɛɛ “azudenle.”
^ Anzɛɛ “dadeɛ dɛma.”
^ Ɛhye kile, Yufileti azule ne.
