Dwobu 1:1-22
1 Ɛnee nrenyia bie mɔɔ bɛfɛlɛ ye Dwobu*+ la de Ɛɛze azɛlɛ zo. Ɔle tenlenenli yɛɛ ɔdi nɔhalɛ;*+ ɔsulo Nyamenle na ɔtwe ɔ nwo ɔfi ɛtane nwo.+
2 Ɔwole mralɛ mrenyia nsuu nee mralɛ mraalɛ nsa.
3 Ɛnee ye nyɛmoa le mboane 7,000, afunlumu 3,000, nlankɛ 1,000 yɛɛ asoaso* 500 nee sonvolɛma dɔɔnwo kpalɛ, ɔti ɔrayɛle sonlakpole ɔdɛlale menli mɔɔ wɔ Aduduleɛ la amuala.
4 Ɔ mra mrenyia ne mɔ anu biala to ɛkponle wɔ ye sua nu wɔ kenle mɔɔ ɔkɛhile* la. Bɛfɛlɛ bɛ mediema mraalɛ nsa ne mɔ na bɛ nee bɛ didi na bɛnono.
5 Saa bɛto ɛkponle ne bɛmaa ɔyia bɛ ti a, Dwobu soa maa bɛkɔfɛlɛ bɛ amaa yeade bɛ nwo. Akee ɔdwazo nwonlomɔ mangyee ne na ɔbɔ ɛyelalɛ afɔle ɔmaa bɛ nuhua ko biala.+ Ɔluakɛ Dwobu ka kɛ: “Bie a me mra ne mɔ ɛyɛ ɛtane na bɛdendɛ bɛtia Nyamenle wɔ bɛ ahonle nu.” Ɛhye a Dwobu yɛle ye mekɛ biala a.+
6 Mɔɔ kenle ne dwule la, nɔhalɛ Nyamenle ne amra*+ hɔgyinlanle Gyihova anyunlu,+ na Seetan+ noko rale ɛkɛ ne bie.+
7 Na Gyihova bizale Seetan kɛ: “Ɛvi nienwu a wɔra a?” Seetan buale Gyihova kɛ: “Mevi azɛlɛ ne azo akpɔsa ɛhɔlɛ nee zolɛ ɛluolualɛ nu a mera a.”+
8 Na Gyihova bizale Seetan kɛ: “Wɔzuzu* me sonvolɛ Dwobu anwo ɔ? Awie biala ɛnle azɛlɛ ye azo mɔɔ ɔle kɛ ɔdaye a. Ɔle tenlenenli yɛɛ ɔdi nɔhalɛ;*+ ɔsulo Nyamenle na ɔtwe ɔ nwo ɔfi ɛtane nwo.”
9 Na Seetan buale Gyihova kɛ: “Asoo mgbane ala a Dwobu sulo Nyamenle a?+
10 Asoo ɛtɛbɔle* ɔdaye, ye abusua ne yɛɛ debie biala mɔɔ ɔlɛ la anwo bane ɔ?+ Wɔyila ɔ sa anloa gyima zo,+ yɛɛ ye nyɛmoa ɛzo kpalɛ wɔ azɛlɛ ne azo.
11 Noko saa ɛkulo a, tende ɛ sa ka debie biala mɔɔ ɔlɛ la na nea, saa ɔnrɛgyinla ɛ nyunlu ɔnrɛdendɛ ɔnrɛtia wɔ a.”
12 Akee Gyihova zele Seetan kɛ: “Nea! Debie biala mɔɔ ɔlɛ la wɔ ɛ sa nu. Nrenyia mumua ne ala a ɔnle kɛ ɛfa ɛ sa ɛka ye a!” Ɔti Seetan vile Gyihova anyunlu ɛkɛ ne hɔle.+
13 Kenle ko bie mɔɔ ɔ mra mrenyia ne mɔ nee ɔ mra mraalɛ ne mɔ ɛlɛdi debie na bɛlɛno nwanye wɔ bɛ diema nrenyia kpanyinli ne sua nu la,+
14 ɛbɔfoɔ rale Dwobu anwo ɛkɛ razele ye kɛ: “Mɔɔ nlankɛ ne mɔ ɛlɛfundu azɛlɛ ne na asoaso ne mɔ ɛlɛdidi bɛ nwo ɛkɛ ne la
15 Sibama rale bɛ nwo zo na bɛhyehyele bɛ bɛhɔle, na bɛvale konle dadeɛ bɛhunle sonvolɛma ne mɔ. Me ngomekye ala a mevi ɛsalɛ mɔɔ mera kɛ mebaha meahile wɔ a.”
16 Mɔɔ ɔgua zo ɔlɛtendɛ la, fofolɛ rale na ɔhanle kɛ: “Senle* mɔɔ vi Nyamenle ɛkɛ la, vi anwuma radɔle mboane ne mɔ nee sonvolɛma ne avinli na ɔzɔle ɔyelale bɛ! Me ngomekye ala a mevi ɛsalɛ mɔɔ mera kɛ mebaha meahile wɔ a.”
17 Mɔɔ ɔgua zo ɔlɛtendɛ la, fofolɛ rale na ɔhanle kɛ: “Kaledeama+ hyɛle bɛ nwo ekpunli nsa na bɛrale afunlumu ne mɔ anwo zo na bɛvale bɛ bɛhɔle, bɛvale konle dadeɛ bɛhunle sonvolɛma ne mɔ. Me ngomekye ala a mevi ɛsalɛ mɔɔ mera kɛ mebaha meahile wɔ a.”
18 Mɔɔ ɔgua zo ɔlɛtendɛ la, fofolɛ noko rale na ɔhanle kɛ: “Ɛnee ɛ mra mrenyia ne mɔ nee ɛ mra mraalɛ ne mɔ ɛlɛdi debie na bɛlɛno nwanye wɔ bɛ diema nrenyia kpanyinli ne sua nu.
19 Arɛlevilɛ nu ala anwoma kpole bie vi fienemgbole ne anu rabɔle sua ne mgbɛnezo nna ne, ɔti ɔbubule ɔguale ɛ mra ne mɔ anwo zo na ɔhunle bɛ. Me ngomekye ala a mevi ɛsalɛ mɔɔ mera kɛ mebaha meahile wɔ a.”
20 Ɛkɛ ne ala Dwobu dwazole na ɔtetele ye tɛladeɛ ne anu na ɔkpale ɔ ti; akee ɔdule ɔdɔle aze na ɔbɔle ɔ ti aze
21 na ɔhanle kɛ:
“Menlɛle me nwo zɔ a menvile me mame akunlu membale a,Na mebalɛ me nwo zɔ a meazia meahɔ a.+
Gyihova a vale maanle a,+ yɛɛ Gyihova a ɛlie a.
Ayɛlɛyelɛ ɛha Gyihova duma ne dahuu.”
22 Wɔ ɛhye mɔ amuala anu, Dwobu anyɛ ɛtane anzɛɛ yeando Nyamenle ɛzonle kɛ yeyɛ ɛtane.*
Ɔbodwɛkɛ
^ Ɔkola ɔkile “Awie Mɔɔ Bɛkpɔ Ye.”
^ Anzɛɛ “Ɔle tenlenenli mɔɔ edwɛkɛ ɛnle ɔ nwo; ɔgyinla ye munlililɛ nu.” Nea Edwɛkɛbohilelɛ.
^ Hibulu aneɛ nu, “asoaso mbelɛ.”
^ Anzɛɛ “ɔkɛdwu ɔ nwo zo.”
^ Anzɛɛ “anwumabɔvolɛma.”
^ Hibulu aneɛ nu, “Wɔva wɔ ahonle wɔzie.”
^ Anzɛɛ “tenlenenli mɔɔ edwɛkɛ ɛnle ɔ nwo; ɔgyinla ye munlililɛ nu.” Nea Edwɛkɛbohilelɛ.
^ Hibulu aneɛ nu, “ɛtɛdiele.”
^ Anzɛɛ ɔkola ɔkile, “Ɛsɛnlɛmanye.”
^ Anzɛɛ “yeanga edwɛkɛ ɛtane biala yeantia Nyamenle.”
