Dwobu 15:1-35
15 Ɛlefaze+ mɔɔ vi Timan la buale kɛ:
2 “Asoo nrɛlɛbɛvolɛ bava kpolerazulɛ mgbane* abua edwɛkɛ,Anzɛɛ ɔbava aduduleɛ anwoma ne yeayi ɔ ko ɔ?
3 Edwɛkɛ mgbane mɔɔ bɛfa bɛtwi sonla nyunlu la ɛnle ɛhwee,Yɛɛ ɛdendɛlɛ ala azo ɛnlɛ nvasoɛ.
4 Ɛdawɔ ti Nyamenle ɛzulolɛ ɛminli,Yɛɛ wɔmaa Nyamenle anwo ɛdwenledwenlenlɛ biala ɛha aze.
5 Ɔluakɛ wɔ nvonleɛ a kile wɔ mɔɔ ɔwɔ kɛ ɛka a,*Yɛɛ wɔkpa mɛlɛbɛla edwɛkɛ.
6 Ɛdawɔ ɛ nloa a bua wɔ fɔlɛ a, na tɛ me ɔ;Ɛdawɔ ɛ nloa babonle ne a di daselɛ tia wɔ a.+
7 Asoo wɔmɔ a ɛle sonla mɔɔ bɛlimoale bɛwole wɔ a,Anzɛɛ bɛwole wɔ kolaa na bɛabɔ awoka ngyikyi ne mɔ ɔ?
8 Saa Nyamenle ɛlɛka fealeranu edwɛkɛ a asoo ɛte?Anzɛɛ asoo ɛ ngomekye a ɛze nrɛlɛbɛ a?
9 Duzu a ɛze ye mɔɔ yɛmɛ yɛnze a?+
Duzu a ɛte ɔ bo mɔɔ yɛmɛ yɛnde ɔ bo a?
10 Egyɛnema nee mgbanyinli wɔ yɛ avinli,+Menli mɔɔ ɛnyi ɛdɛla wɔ papa bɔbɔ la.
11 Nyamenle arɛlekyekyelɛ ne le ekyi maa wɔ ɔ?Anzɛɛ edwɛkɛ mɔɔ bɛka ye bɛtɛɛ bɛkile wɔ la noko le ekyi maa wɔ ɔ?
12 Duzu ati a ɛmaa wɔ ahonle futu a,Na duzu ati a ɛ nye ɛva ɛya ɛ?
13 Ɔluakɛ ɛfa Nyamenle mumua ne anwo ɛya,*Na ɛmaa edwɛkɛ zɛhae mɔ fi ɛ nloa anu finde.
14 Sonla dasanli le duzu mɔɔ ɔwɔ kɛ ɔ nwo te a?Anzɛɛ sonla boni a raalɛ ɛwo ye mɔɔ ɔwɔ kɛ ɔyɛ tenlenenli a?+
15 Nea! Ɔnlɛ ye nwuanzanwuanzama ne anu diedi,Yɛɛ anwuma bɔbɔ anwo ɛnde wɔ ɔ nye zo.+
16 Na akee sonla mɔɔ le kyibadeɛ na yekpɔlɔ,+Sonla mɔɔ no ninyɛndane kɛ nzule la!
17 Mebabɔ wɔ amaneɛ; tie me!
Mebaha mɔɔ menwu ye la,
18 Nrɛlɛbɛvolɛma ka mɔɔ bɛdele bɛvile bɛ papa mɔ ɛkɛ,+Ninyɛne mɔɔ bɛanva bɛanvea bɛ la.
19 Bɛvale azɛlɛ ne bɛmaanle bɛ ngomekye,Na ɛyɛvolɛ biala ampɛ nu wɔ bɛ avinli.
20 Amumuyɛnli nwu amaneɛ wɔ ye mekɛ kɔsɔɔti anu,Wɔ ɛvolɛ mɔɔ bɛva bɛzie ɛkɛ bɛmaa atisesebɛnli la kɔsɔɔti anu.
21 Ɔte ɛnelɛ ɛzulolɛ wɔ ɔ nzo nu;+Nwule ba ɔ nwo zo wɔ anzodwolɛ mekɛ nu.
22 Ɔnlie ɔnli kɛ ɔbanriandi yeavi awozinli nu;+Bɛva ye bɛzie ɛkɛ bɛmaa konle dadeɛ.
23 Ɔkpɔsɛkpɔsa ɔkpondɛ aleɛ*—nienwu a ɔwɔ a?
Ɔze ye wienyi kɛ kenle anu awozinli ne ɛbikye.
24 Anwongyelelɛ nee nyanelilɛ kɔ zo nwunlonwunla ye;Bɛkolo ɔ nwo zo kɛ belemgbunli mɔɔ ɛziezie ɔ nwo ɛlɛkɔ konle la.
25 Ɔluakɛ ɔtende ɔ sa ɔtia NyamenleNa ɔbɔ mɔdenle kɛ ɔdwazo yeatia Tumivolɛ Bedevinli ne;*
26 Ɔyɛ anzosesebɛ na ɔdwazo ɔtia Ye,Ɔfa ye enyinlike ɛzamo, ɛsesebɛ ne;*
27 Ɛnlome ɛheda ɔ nyunlu,Yɛɛ ɔ nze nu le ɛnlome ngome;
28 Ɔtɛnla azuamgbole mɔɔ badɔ mgbane la azo,Azua mɔɔ awie ɛnrɛdɛnla nu,Mɔɔ bɛbayɛ awolɛ edukue la anu.
29 Ɔnrɛnyia ɔ nwo, yɛɛ ye anwonyia ɛnrɛyɛ kpole,Anzɛɛ ye agyapadeɛ ɛnrɛdɛlɛ wɔ azɛlɛ ne azo.
30 Ɔnrɛvi awozinli nu ɔnrɛnriandi;Sendɔlɔra bayela ye baka mɔɔ ɛfifi,*Na Nyamenle anloa anu anwoma bahu ye.+
31 Ɔnle kɛ ɔminli na ɔfa ɔ nwo ɔto debie mɔɔ nvasoɛ ɛnle zo la azo,Ɔluakɛ mɔɔ ɔbanyia ye wɔ ɔ nzi la bayɛ mgbane.
32 Ye mekɛ ɛnrɛdwu na yeazi,Yɛɛ ye mbaka ngane ne mɔ ɛnrɛyɛ ngɛnlɛma.+
33 Ɔbayɛ kɛ vanye mɔɔ kpolo ye ma amunli,Nee ɔlivi baka mɔɔ kpolo ye ndotolo ne mɔ la.
34 Ɔluakɛ amumuyɛma* ayia bayɛ mgbane,+Yɛɛ senle bayela menli mɔɔ die belaebo la ɛdanlɛ azua.
35 Bɛnrenzɛ ngyegyelɛ na bɛwo amumuyɛ,Yɛɛ bɛ ko wo mɛlɛbɛla.”
Ɔbodwɛkɛ
^ Anzɛɛ “adwenle mɔɔ le kɛ anwoma mɔɔ ɛlɛtu kpole la.”
^ Anzɛɛ “wɔ nvonleɛ maa ɛ nloa ndetelɛ.”
^ Hibulu aneɛ nu, “ɛkakyi wɔ sunsum ne ɛtia Nyamenle.”
^ Hibulu aneɛ nu, “paano.”
^ Anzɛɛ “ɔkile kɛ ɔ nwo yɛ se tɛla ye.”
^ Hibulu aneɛ nu, “ye enyinlike anzi agbɔkɛ agbɔkɛ ne.”
^ Ɛhye kile, anyelazo biala mɔɔ ɔbanyia ye bieko la.
^ Anzɛɛ “kpɔkyevolɛma.”
