Dwobu 18:1-21
18 Beledade+ mɔɔ vi Hyuaa la buale kɛ:
2 “Kenlenzu a ɛbagyakyi ɛdendɛlɛ a?
Da ndelebɛbo ali amaa yɛdayɛ noko yɛahola yɛadendɛ.
3 Duzu ati a ɔwɔ kɛ ɛbu yɛ kɛ nane,+Na ɛbu yɛ ahoasea* wɔ ɛ nye zo ɛ?
4 Saa bɔbɔ ɛfa ɛya ɛtete wɔ nu* azinli azinli a,Asoo ɛdawɔ ti, bɛbakpo azɛlɛ ne,Anzɛɛ bodane badu avi ɔ bo zo ne ɔ?
5 Ɛhɛe, bɛbanlua amumuyɛnli kɛnlaneɛ,Na ye senle ɛnrɛzɔ bieko.+
6 Ye ɛdanlɛsua ne anu wienyi ne bayɛ awozinli,Na kɛnlaneɛ ne mɔɔ ta ɔ nwo zo la banlu.
7 Ye ɛdialɛ anu ɛsesebɛ ne anu bado,Na ɔdaye ye folɛdulɛ bamaa yeadɔ aze.+
8 Ɔluakɛ ɔ gyakɛ bava ye ahɔwolo avonle nu,Na yealuolua asawu ne anu.
9 Ɛhane bazɔ ɔ gyakɛ anzi;Ɛhane bahye ye.+
10 Bɛva nyɛma bɛvea azɛlɛ bo bɛzua ye ɛhane,Yɛɛ bɛzua ɛhane wɔ ye adenle nu.
11 Ɛzulolɛ nwunlonwunla ye wɔ ɛleka biala+Yɛɛ bɛfoa ye ndinlizo.
12 Ye anwosesebɛ wie,Yɛɛ esiane+ bamaa yeatotɔ.*
13 Ewule ɛzulolɛ kpalɛ* bazɛkye ɔ sa nee ɔ gyakɛ;Ɔbali ye nwonane.
14 Bɛye ye bɛfi banebɔlɛ mɔɔ wɔ ye ɛdanlɛsua ne anu la anwo+Na bɛfa ye bɛkɔ ɛzulolɛ ne mɔ belemgbunli ne* ɛkɛ.
15 Nyɛvolɛ* badɛnla ye ɛdanlɛsua nu;Bɛbava sɔlefa bɛakponde ye awuke nu.+
16 Ɔle kɛ baka la, ye ndinli bawu,Na ye ngane ne mɔ agyengye.
17 Ye ngakyelɛ baminli azɛlɛ ne azo,Na bɛnrɛbɔ ye duma* wɔ awɔdenle ne azo.
18 Bɛbaye ye bɛavi wienyi nu bɛahɔ awozinli nuNa bɛavoa ye bɛavi ewiade.
19 Ɔnrɛnyia mralɛ nee ɔ bo zo amra wɔ ye menli avinli,Yɛɛ awie ɛnrɛha ɔ nzi, wɔ ɛleka mɔɔ ɛnee ɔde* la.
20 Saa ye mekɛ dwu a, ɔbazi menli mɔɔ wɔ Adɔleɛ la anwoYɛɛ ɛzulolɛ baha menli mɔɔ wɔ Aduduleɛ la.
21 Ɛhye a to ɛtanevolɛ ɛdanlɛ azuaNee mɔɔ ɛnze Nyamenle la tɛnlabelɛ a.”
Ɔbodwɛkɛ
^ Anzɛɛ ɔkola ɔkile, “yɛ nwo ɛnde.”
^ Anzɛɛ “wɔ ɛkɛla nu.”
^ Anzɛɛ “yeadia yeadɔ zo.”
^ Hibulu aneɛ nu, “Ewule belamunli ralɛ ne.”
^ Anzɛɛ “ewule ɛzulolɛ bie.”
^ Hibulu aneɛ nu, “Debie mɔɔ ɛnle ye ɛdeɛ la.”
^ Hibulu aneɛ nu, “ɔnrɛnyia duma biala.”
^ Anzɛɛ “ɔdɛnlanle ye mekɛ ekyi.”