Dwobu 2:1-13
2 Nzinlii mɔɔ kenle ne dwule bieko la, nɔhalɛ Nyamenle ne amra*+ hɔgyinlanle Gyihova anyunlu,+ na Seetan noko rale ɛkɛ ne bie hɔgyinlanle Gyihova anyunlu.+
2 Na Gyihova bizale Seetan kɛ: “Ɛvi nienwu a wɔra a?” Seetan buale Gyihova kɛ: “Mevi azɛlɛ ne azo akpɔsa ɛhɔlɛ nee zolɛ ɛluolualɛ nu a mera a.”+
3 Na Gyihova bizale Seetan kɛ: “Wɔzuzu* me sonvolɛ Dwobu anwo ɔ? Awie biala ɛnle azɛlɛ ye azo mɔɔ ɔle kɛ ɔdaye a. Ɔle tenlenenli yɛɛ ɔdi nɔhalɛ,*+ ɔsulo Nyamenle na ɔtwe ɔ nwo ɔfi ɛtane nwo. Ɛbɔle mɔdenle kɛ ɛmaa meazɛkye* ye mgbane gyɛne nu ala ɛdeɛ,+ noko ɔtɛdɛ ye nɔhalɛlilɛ* nu kpundii.”+
4 Na Seetan buale Gyihova kɛ: “Bɛfa nwonane bɛmaa bɛdie nwonane. Sonla bava debie biala mɔɔ ɔlɛ la yeamaa yeava yealie ye ngoane.*
5 Noko saa ɛkulo a, tende ɛ sa ka ye bowule nee ye nwonane na nea, saa ɔnrɛgyinla ɛ nyunlu ɔnrɛdendɛ ɔnrɛtia wɔ a.”+
6 Akee Gyihova zele Seetan kɛ: “Nea! Ɔwɔ ɛ sa nu. Ye ngoane* ne ala a mmaye ɛfi ɛkɛ a!”
7 Ɔti Seetan vile Gyihova anyunlu ɛkɛ ne hɔle na ɔmaanle nyila mɔɔ yɛ nyane la bobɔle Dwobu+ ɔvi ɔ ti zo kɔdwu ɔ gyakɛ abo.
8 Na Dwobu vale buakɛ ebule* bie vonvoanle ɔ nwo na ɔdɛnlanle nzonle nu.+
9 Awieleɛ bɔkɔɔ ne, ɔ ye bizale ye kɛ: “Ɛtɛdɛ wɔ nɔhalɛlilɛ* nu kpundii ɔ? Tendɛ tia Nyamenle na wu!”
10 Noko ɔzele ye kɛ: “Ɛtendɛ kɛ mraalɛ ahoasea ne mɔ anu ko la. Asoo debie kpalɛ ala a ɔwɔ kɛ yɛdie yɛfi nɔhalɛ Nyamenle ne ɛkɛ na ɔnle kɛ yɛdie mɔɔ le ɛtane la noko ɔ?+ Wɔ ɛhye mɔ amuala anu, Dwobu anva ɔ nloa anyɛ ɛtane biala.+
11 Dwobu agɔnwo mɔ nsa dele munzule ne mɔɔ ɛdo ye la kɔsɔɔti, na bɛ nuhua ko biala vi ye ɛleka rale—Ɛlefaze+ mɔɔ vi Timan, Beledade+ mɔɔ vi Hyuaa+ yɛɛ Zofaa+ mɔɔ vi Neeyama la. Ɔti bɛliele bɛdole nu kɛ bɛbayia nu na bɛ nee Dwobu ahɔli nyane na bɛakyekye ɔ rɛle.
12 Mekɛ mɔɔ bɛlua moa na bɛnwunle ye la, bɛannwu kɛ ɔdaye ɔ. Bɛbɔle ɔ bo kɛ bɛsu kpole na bɛtetele bɛ adɛladeɛ ne mɔ anu, na bɛvuandinle ndɛtɛlɛ wɔ anwomanyunlu na ɔraguale bɛ ti zo.+
13 Akee bɛ nee ye dɛnlanle azɛlɛ ne anwo kenle nsuu alehyenlɛ nee aledwolɛ. Bɛ nuhua biala anga edwɛkɛ kpɔkɛ ko bɔbɔ angile ye, ɔluakɛ bɛnwunle kɛ ye nyanelilɛ ne le kpole kpalɛ.+
Ɔbodwɛkɛ
^ Anzɛɛ “anwumabɔvolɛma.”
^ Hibulu aneɛ nu, “Wɔva wɔ ahonle wɔzie.”
^ Anzɛɛ “tenlenenli mɔɔ edwɛkɛ ɛnle ɔ nwo.”
^ Hibulu aneɛ nu, “ɛmaa meame.”
^ Anzɛɛ “munlililɛ.” Nea Edwɛkɛbohilelɛ.
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “foandɛkɛ.”
^ Anzɛɛ “munlililɛ.” Nea Edwɛkɛbohilelɛ.
