Dwobu 20:1-29
20 Zofaa+ mɔɔ vi Neeyama la buale kɛ:
2 “Ɛhye ati, me adwenle mɔɔ ɛlɛgyegye me la ka me kɛ membua nwolɛ bieƆlua me nwo mɔɔ ɛlɛyelɛyela me la ati.
3 Mede ahwibɛnyunlu ne mɔɔ wɔva wɔbɔ me aholoba la;Na me ndelebɛbo* ka me kɛ membua.
4 Nɔhalɛ nu, ɛze ɛhye dɛba,Ɔluakɛ ɔle zɔ ɔvi mekɛ mɔɔ bɛbɔle sonla* bɛdole azɛlɛ ye azo la,+
5 Kɛ amumuyɛnli anyelielɛ ɛngyɛYɛɛ kpɔkyevolɛ* fɛlɛkolilɛ le mekɛ ekyi nu debie.+
6 Saa ye kpoleyɛlɛ ne kɔdwu anwumaNa ɔ ti kɔkpula amungu ne bɔbɔ a,
7 Ɔ bo zo babɔ bɔkɔɔ kɛ ɔdaye mumua ne ye ebinli;Bɛdabɛ mɔɔ ɛnee bɛnwu ye la babiza kɛ, ‘Ɔwɔ nienwu?’
8 Ɔbadu yeahɔ kɛ ɛlalɛ, na bɛnrɛnwu ye bieko;Bɛbavoa ye kɛ nɔɔzo ɛnyelɛzodeɛnwunlɛ la.
9 Ɛnyelɛ mɔɔ nwunle ye mekɛ bie la ɛnrɛnwu ye bieko,Yɛɛ ye awuke ne ɛnrɛnwu ye bieko.+
10 Ɔdaye mumua ne ɔ mra bakpondɛ ehyiavolɛma anyunlu ɛlolɛ,Na ɔbava anwonyia mɔɔ ɔliele ɔvile awie mɔ ɛkɛ ne la yeazia yeamaa bɛ.+
11 Ɔlɛ* mgbavolɛ nu anwosesebɛ kpalɛ,Noko ɔ nee ye anwosesebɛ ne kɔsɔɔti bawu.
12 Saa ɛtane yɛ fɛ wɔ ɔ nloa anu,Saa ɔfa ɔfea ɔ tafinlima abo,
13 Saa ɔmaa ɔyɛ ye fɛ na yeanyeNa ɔmaa ɔka ɔ nloa anu a,
14 Ye aleɛ ne bayɛ ɛnwonle wɔ ye nu;Ɔbayɛ kɛ ɛwɔbile pɔezen* wɔ ye nu.
15 Yeme anwonyia, noko ɔbave;Nyamenle baye avi ɔ kunlu avinde.
16 Ɔbanlo ɛwɔbile pɔezen;Bɔna gye* bahu ye.
17 Ɔnrɛnwu azudenle ne ɛlɛ,Wolɛ nee bɛta mɔɔ se kɛ azule la.
18 Ɔbaziane ye ninyɛne mɔɔ ɔnrɛli* bie a;Ɔnrɛli anwonyia mɔɔ yelua gualilɛ zo yenyia la bie.+
19 Ɔluakɛ yesisi ehyiavolɛma na yekpo bɛ;Yelie sua mɔɔ tɛ ɔdaye a ɔzile la.
20 Noko ɔ nzo nu ɛnrɛdwo ye;Ye anwonyia ne ɛnrɛlie ye ngoane.
21 Debie biala ɛnrɛha mɔɔ ɔbali a;Ɛhye ati a ye agyapadeɛ ne ɛnrɛhyɛ la.
22 Mekɛ mɔɔ ye anwonyia ne kɛgyinla zolɛ kpalɛ la, adwenleadwenle badɔ ɔ nwo;Munzule kɔsɔɔti bado ye.
23 Mekɛ mɔɔ ɔlɛdi aleɛ la,Nyamenle bazoa* ye ɛya wuluwulu ne wɔ ɔ nwo zo,Ɔbadɔ yeagua ɔ nwo zo yeahɔdwu ye anyalɛ ne anu.
24 Saa ɔnriandi bulalɛ akodeɛ a,Ɛda baka mɔɔ bɛva kɔbele ɛda bɛdo la bawɔ ye.
25 Ɔye ɛda baka mɔɔ kɛwɔ ɔ nzi la,Akodeɛ mɔɔ ta mɔɔ kɛwɔ ye bɔnyema ne anu la,Na ɛzulolɛ ka ye.+
26 Awozinli kabii ɛlɛkendɛ ye anwonyia;Senle mɔɔ tɛ sonla a wudale la bayela ye;Munzule ɛlɛkendɛ awie biala mɔɔ kɛha ye ɛdanlɛsua ne anu la.
27 Anwuma bamaa ye nvonleɛ ne ala ali;Azɛlɛ ne badwazo atia ye.
28 Azuyilɛ bapia ye sua ne ahɔ;Ɔbaze kpole kpalɛ wɔ Nyamenle* ɛya kenle ne anu.
29 Ɛhye a le amumuyɛnli kyɛfoa mɔɔ vi Nyamenle ɛkɛ a,Agyapadeɛ mɔɔ Nyamenle ɛva ɛzie ɛkɛ ɛmaa ye la.”
Ɔbodwɛkɛ
^ Hibulu aneɛ nu, “sunsum mɔɔ vi me ndelebɛbo nu la.”
^ Anzɛɛ “dasanli; Adam.”
^ Hibulu aneɛ nu, “amumuyɛnli.”
^ Hibulu aneɛ nu, “Ye mbowule lɛ.”
^ Anzɛɛ “bɔnyema.”
^ Hibulu aneɛ nu, “tafinlima.”
^ Hibulu aneɛ nu, “ɔnrɛme.”
^ Hibulu aneɛ nu, “Ɔbazoa.”
^ Hibulu aneɛ nu, “ye.”