Dwobu 21:1-34
21 Dwobu buale kɛ:
2 “Bɛdie mɔɔ melɛka la kpalɛ;Bɛmaa ɛhye ɛyɛ arɛlekyekyelɛ mɔɔ bɛfa bɛamaa me.
3 Bɛnyia me nwo abotane na metendɛ;Metendɛ mewie a, akee bɛbahola bɛagolo me nwo.+
4 Asoo meka me ngyegyelɛ ne meahile sonla?
Ɛnee duzu ati a mehola mezi* abotane a?
5 Bɛnlea me! Ɔbazi bɛ nwo,Na bɛava bɛ sa bɛazɔ bɛ nloa.
6 Saa medwenle nwolɛ a, ɔgyegye me,Na me sonlabaka ne kɔsɔɔti woso.
7 Duzu ati a amumuyɛma kɔ zo tɛnla ngoane nu,+Bɛyɛ mrelera na bɛnyia bɛ nwo* a?+
8 Bɛ mra wɔ bɛ nwo ɛkɛ ne dahuu,Yɛɛ bɛnwu bɛ bo zo amra.
9 Bɛ azua ne mɔ gyi kpundii, bɛnzulo,+Yɛɛ Nyamenle ɛnva ye baka ne ɛndwe bɛ nzo.
10 Bɛ nlankɛ nyinli nyia mralɛ;Bɛ nlankɛ mbelɛ wo na bɛ ko ɛmkpɔne.
11 Bɛ mra mrenyia nriandi alienwo kɛ mboane,Yɛɛ bɛ mra wuluwulu.
12 Bɛfa akɛya nee haape bɛto edwɛneNa fulutu* ne ane maa bɛdi fɛlɛko.+
13 Bɛ kunlu dwo bɛ nwo wɔ bɛ ngoane mekɛ nuNa bɛkɔ Nla* ne anu wɔ anzodwolɛ nu.*
14 Noko bɛka bɛkile nɔhalɛ Nyamenle ne kɛ, ‘Gyakyi yɛ koonwu!
Yɛngulo kɛ yɛnwu wɔ ndenle ne mɔ.+
15 Tumivolɛ Bedevinli ne a le nwane mɔɔ ɔwɔ kɛ yɛsonle ye a?+
Saa yɛ nee ye di ngitanwo a, duzu nvasoɛ a yɛbanyia a?’+
16 Noko meze kɛ bɛnlɛ bɛ agyapadeɛ zo tumi.+
Me nee amumuyɛma adwenle* avinli twe.+
17 Fane nyɛ a amumuyɛma kɛnlaneɛ nu a?+
Fane nyɛ a esiane to bɛ a?
Fane nyɛ a Nyamenle fa ɛya sɛkye bɛ a?
18 Asoo bɛyɛ kɛ baka abonle ekyi bie mɔɔ anwoma ɛlɛbɔ ye la,Anzɛɛ abonle mɔɔ ahumu ɛlɛfa ye ahɔ la ɛlɛ ɔ?
19 Nyamenle bava sonla anzohwenlɛ azie amaa ɔ mra.
Noko maa Nyamenle ɛdua ye kakɛ amaa yeanwu ye.+
20 Maa ɔdaye ɔ nye ɛnwu ye ɛzɛkyelɛ,Na maa ɔnlo Tumivolɛ Bedevinli ne ɛya ne.+
21 Duzu ati a ɔdwenle mɔɔ bado ɔ mra wɔ ye ewule nzi la anwoWɔ mekɛ mɔɔ bɛbapɛ ye ngoane mekɛ ne azo* la ɛ?+
22 Asoo awie kola kilehile Nyamenle nrɛlɛbɛ,+Wɔ mekɛ mɔɔ Yemɔ a ɔbua mgbolema ndɛne la?+
23 Sonla ne bie wu wɔ mekɛ mɔɔ ɔlɛ anwosesebɛ kpalɛ+Mekɛ mɔɔ ɔ nzo nu ɛdwo ye bɔkɔɔ na ɔ nwo tɔ ye la,+
24 Mekɛ mɔɔ ye ɛzɔlɛ ɛyɛ ɛnlome ngomeNa ye mbowule nu yɛ se la.
25 Sonla ne bie noko wu nyane nyane* nu,Mɔɔ yeanli fɛlɛko ɛlɛ a.
26 Bɛ mu nwiɔ bɛbazia bɛahɔ ndɛtɛlɛ nu,+Na azonlɛ ali bɛ nwonane.+
27 Nea! Meze bɛ adwenle kɔsɔɔti,Nee adwenle mɔɔ bɛva kɛ bɛyɛ me ɛtane* la.+
28 Ɔluakɛ bɛbiza kɛ, ‘Nienwu a sonlakpole ne sua ne wɔ a,Na ɛdanlɛsua ne mɔɔ amumuyɛnli ne dɛnlanle nu la wɔ nienwu?’+
29 Bɛtɛbizale adenduvoma ne mɔ ɔ?
Bɛtɛneɛnleanle bɛ daselɛlilɛ ne anu kpalɛ,
30 Kɛ ɛtanevolɛ nyia ɔ ti wɔ esiane mekɛ nuNa bɛdie ye wɔ ɛya kenle nu ɔ?
31 Nwane a kola kɔ ɔ nyunlu kɔka ye ndenle nwo edwɛkɛ kile ye a,Na nwane a badua ye kakɛ wɔ mɔɔ yeyɛ la anwo a?
32 Saa bɛ nee ye kɔ azie zo a,Menli bazinza ye nla.
33 Bɔnza ne anu ndɛtɛlɛ bayɛ ye fɛ,+Na alesama kɔsɔɔti bali ɔ nzi*+Kɛ mɔɔ bɛyɛle menli dɔɔnwo mɔɔ bɛlimoale ɔ nyunlu la.
34 Ɔti duzu ati a bɛkyekye me rɛle mgbane ɛ?+
Debie kpalɛ biala ɛnle bɛ edwɛkɛ ne mɔ anu kɛ adalɛ ala!”
Ɔbodwɛkɛ
^ Hibulu aneɛ nu, “me sunsum ɛhola ɛzi”
^ Anzɛɛ “bɛnyia tumi mgbole.”
^ Anzɛɛ “paepe.”
^ Anzɛɛ “wɔ mekɛ ezinra nu,” ɛhye kile, ndɛndɛ na bɛnde nyane kolaa na bɛawu.
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Anzɛɛ “folɛdulɛ; adwenle ɛtane.”
^ Anzɛɛ “bɛbapɛ nuhua nwiɔ.”
^ Anzɛɛ “ye ɛkɛla nyane.”
^ Anzɛɛ ɔkola ɔkile, “amumuyɛ.”
^ Hibulu aneɛ nu, “Na ɔbahwe alesama kɔsɔɔti yeali ɔ nzi.”
