Dwobu 27:1-23
27 Dwobu doale ye ɛdendɛlɛ* ne azo kɛ:
2 “Mekɛ ala mɔɔ Nyamenle ne mɔɔ ɛmaa pɛlepɛlelilɛ ɛbɔ me la de aze,+Na Tumivolɛ Bedevinli ne mɔɔ ɛmaa me* ɛbɛlabɔlɛ ɛyɛ ɛnwonle la de aze,+
3 Mekɛ tendenle ala mɔɔ metɛdie ɛnwomenleNa Nyamenle ɛnwomenle* ne wɔ me nu la,+
4 Me nloa ɛnrɛha edwɛkɛ ɛtane biala;Yɛɛ me tafinlima ɛnrɛbɔ adalɛ!
5 Menrɛha ye ɛlɛ kɛ bɛdi benle!
Kɔkpula kɛ mekɛwu la, menrɛgyakyi me nɔhalɛlilɛ* nu ɛlɛ!*+
6 Melɛ me tenleneyɛlɛ nu na menrɛgyakyi nu ɛlɛ;+Me ahonle ɛnrɛbua me fɔlɛ* wɔ mekɛ tendenle mɔɔ mede ngoane nu la.*
7 Maa me kpɔvolɛ ɛyɛ kɛ amumuyɛma,Na bɛdabɛ mɔɔ bɛteta me la ɛyɛ kɛ ɛtanevolɛma.
8 Ɔluakɛ saa bɛsɛkye amumuyɛnli* ne a, anyelazo boni a ɔlɛ a,+Wɔ mekɛ mɔɔ Nyamenle ɛye ye ngoane* ɛvi ɛkɛ ne la ɛ?
9 Saa ɔlɛnwu amaneɛ aAsoo Nyamenle badie ye ɛzunlɛ?+
10 Anzɛɛ ɔbanyia anyelielɛ wɔ Tumivolɛ Bedevinli ne anu ɔ?
Asoo ɔbavɛlɛ Nyamenle mekɛ biala?
11 Mebahilehile bɛ Nyamenle tumi* ne anwo debie;Menrɛva Tumivolɛ Bedevinli ne anwo debie biala menrɛvea.
12 Nea! Saa bɛ muala bɛnwu ɛnyelɛzodeɛnwunlɛ a,Ɛnee duzu ati a bɛ edwɛkɛ zo ɛnlɛ nvasoɛ ɛ?
13 Ɛhye a le amumuyɛnli kyɛfoa mɔɔ vi Nyamenle ɛkɛ a,+Agyapadeɛ mɔɔ atisesebɛma nyia ye fi Tumivolɛ Bedevinli ne ɛkɛ ne la ɛne.
14 Saa ɔ mra anwo so bɔbɔ a, bɛbawu konle dadeɛ nloa,+Na ɔ bo zo amra ɛnrɛnyia aleɛ mɔɔ baza bɛ la.
15 Bɛdabɛ mɔɔ bɛkɛha ɔ nzi la, ewulenzane bamaa bɛazie bɛ,Na bɛ ye mɔ ɛnrɛzu bɛ.
16 Saa ɔboɔboa dwɛtɛ fufule nloa kɛ ɛnweaNa ɔfa ndanlɛ mgbalɛ ɔsie kɛ ndɛtɛlɛ bɔbɔ a,
17 Ɔbaboɔboa ɔ nloa ɛdeɛ,Noko tenlenenli a baheda a,+Na menli mɔɔ edwɛkɛ ɛnle bɛ nwo la bahyɛ ye dwɛtɛ fufule ne ava.
18 Sua mɔɔ yezi la ɛnlɛ anwosesebɛ, ɔle kɛ kɛdɛba ndenda,Ɔle kɛ kpɔda+ mɔɔ sinzavolɛ ɛbo la.
19 Ɔbahɔ yeahɔla kɛ sukoavolɛ noko ɔnrɛboɔboa ɛhwee nloa;Ɔkabuke ɔ nye la, ɛnee ɛhwee ɛnle ɛkɛ.
20 Ɛzulolɛ fa ye kɛ azuyilɛ;Ahumu fa ye nɔɔzo kɔ.+
21 Aduduleɛ anwoma bie bakpogya ye zo ahɔ, na ɔbavi ɛkɛ;Ɔkpoa ye ɔfi ɔ bo zo ne.+
22 Ɔbadu yeara ɔ nwo zo mɔɔ ɔnrɛze ye anwunvɔne+Wɔ mekɛ mɔɔ ɔ nye ɛbolo kɛ ɔnriandi yeavi ye tumi bo la.+
23 Bɛbɔ bɛ sa nu bɛkile yeYɛɛ bɛgyinla ye ɛleka ne bɛbɔ nvonloma+ bɛkile ye.*
Ɔbodwɛkɛ
^ Hibulu aneɛ nu, “ɛrɛlɛbulɛ.”
^ Anzɛɛ “me ɛkɛla.”
^ Hibulu aneɛ nu, “sunsum.”
^ Anzɛɛ “munlililɛ.” Nea Edwɛkɛbohilelɛ.
^ Anzɛɛ “menrɛye menrɛvi me nu; mebamaa yeadɛnla ɛkɛ.”
^ Anzɛɛ “ɛnrɛdendɛ ɛnrɛtia me.”
^ Anzɛɛ “wɔ me kenle ne mɔ bie anu.”
^ Anzɛɛ “kpɔkyevolɛ.”
^ Anzɛɛ “ɛkɛla.”
^ Anzɛɛ ɔkola ɔkile, “asa.”
^ Anzɛɛ ɔkola ɔkile, “Menli gyinla bɛ ɛleka ne bɔ bɛ sa nu kile ye na bɛbɔ nvonloma bɛkile ye.”
