Dwobu 29:1-25
29 Dwobu doale ye ɛdendɛlɛ* ne azo kɛ:
2 Anrɛɛ mewɔ siane mɔɔ ɛze ɛhɔ,Mekɛ mɔɔ ɛnee Nyamenle sinza me la anu,
3 Mekɛ mɔɔ ɔmaanle ye kɛnlaneɛ ne dale me ti zo,Mɔɔ menvale ye wienyi ne menluale awozinli nu,+
4 Mekɛ mɔɔ ɛnee mele kpavolɛ,Mɔɔ mendele Nyamenle agɔnwolɛvalɛ ne nganeɛ wɔ me ɛdanlɛsua ne anu,+
5 Mekɛ mɔɔ ɛnee Tumivolɛ Bedevinli ne nee me lua,Mɔɔ ɛnee me mra ne mɔ* kɔsɔɔti ɛbɔ me ɛyia,
6 Mekɛ mɔɔ ɛnee metietia bɛta nu,Na bodane ne mɔ maanle nwole zenle kɛ azudenle maanle me la.+
7 Mekɛ mɔɔ ɛnee mekɔ suakpole ne anlenkɛ kpole ne anloa,+Na metɛnla me ebia nu wɔ gua ne azo la,+
8 Ɛnee mgbavolɛ nwu me a bɛgyinla ahane,*Na mgbanyima ne mɔ bɔbɔ dwazo gyinla ɛkɛ.+
9 Mgbanyima gyakyile ɛdendɛlɛ;Bɛvale bɛ sa bɛzɔle bɛ nloa.
10 Ɛnee bɛnde menli titili ne mɔ ane;Bɛ tafinlima betɛbetanle bɛ nloa anu anwuma.
11 Awie biala mɔɔ diele me la hanle me nwo edwɛkɛ kpalɛ,Yɛɛ bɛdabɛ mɔɔ bɛnwunle me la lile me nwo daselɛ.
12 Ɔluakɛ ɛnee medie ehyianli mɔɔ su kpondɛ moalɛ,+Nee arisa yɛɛ awie biala mɔɔ ɛnlɛ boavolɛ la.+
13 Menli mɔɔ asɛɛ ɛwu la yilale me,+Yɛɛ memaanle ahunlanvolɛ ahonle lile fɛlɛko.+
14 Menwulale tenleneyɛlɛ kɛ me tɛladeɛ;Me pɛlepɛlelilɛ yɛle kɛ tɛladeɛ tendenle* nee abotile.
15 Menyɛle anyenzinliravolɛma anye,Yɛɛ abuburama agyakɛ.
16 Ɛnee mele ehyiavolɛma ɛ papa;+Ɛnee meneɛnlea bɛdabɛ mɔɔ menze bɛ la edwɛkɛ nu.+
17 Membubule ɛtanevolɛ ne awudwelɛ+Na menyele mɔɔ zia ɔ gye nu la.
18 Ɛnee meta meka kɛ, ‘Mebawu meala me sua* nu,+Yɛɛ me mekɛ bazo kɛ ɛnweazo ɛnwea.
19 Me ndinli badende ahɔdwu nzule nu,Yɛɛ ɛbɔlɛ bagyinla me ngane ne mɔ azo nɔe ne amuala.
20 Me anyunlunyia yɛ fofolɛ dahuu,Yɛɛ mebado ɛda mɔɔ wɔ me sa nu la meadoɔdoa zo.’
21 Menli hendɛle diele me,Bɛyɛle ngungoonwu bɛhendɛle bɛdiele me folɛdulɛ.+
22 Metendɛ mewie a, bɛnga edwɛkɛ bieko;Me edwɛkɛ ne dɔle* bɛ nzo nu.
23 Bɛhendɛle me kɛ mɔɔ bɛkendɛ ezule la;Bɛbukebukele bɛ nloa anu wanaanwo kɛ asɛɛ bɛkendɛ nyenyesuo la.+
24 Saa mesele mekile bɛ a, bɛnlie bɛnli;Mete me nyunlu mekile bɛ a ɔmaa bɛ anwosesebɛ.*
25 Memaanle bɛ adehilelɛ kɛ awie mɔɔ li bɛ ti,Yɛɛ mendɛnlanle aze kɛ belemgbunli mɔɔ wɔ ye ɛlɔnema avinli,+Kɛ sonla mɔɔ kyekye bɛdabɛ mɔɔ bɛlɛdi nyane la arɛle la.+
Ɔbodwɛkɛ
^ Hibulu aneɛ nu, “ɛrɛlɛbulɛ.”
^ Anzɛɛ “sonvolɛma.”
^ Hibulu aneɛ nu, “bɛfa bɛ nwo bɛfea.”
^ Anzɛɛ “tɛladeɛ mɔɔ ɛnlɛ ɔ sa.”
^ Hibulu aneɛ nu, “me tunli.”
^ Hibulu aneɛ nu, “zonyinle guale.”
^ Anzɛɛ ɔkola ɔkile, “Bɛammaa wienyi ne mɔɔ wɔ me nyunlu la angakyi awozinli.”
