Dwobu 3:1-26
3 Ɛhye anzi, Dwobu bɔle ɔ bo kɛ ɔtendɛ na ɔwale kenle mɔɔ bɛwole ye la* amonle.+
2 Dwobu hanle kɛ:
3 “Maa kenle mɔɔ bɛwole me la ɛminli,+Yɛɛ nɔe ne mɔɔ awie hanle kɛ: ‘Bɛnrenzɛ ralɛ nrenyia la!’
4 Maa kenle zɔhane ɛhakyi awozinli.
Maa Nyamenle arɛle ɛvi kenle zɔhane;Mmamaa wienyi biala ta zolɛ.
5 Maa awozinli kabii* ɛva ye.
Maa ezule amungu ɛheda zo.
Maa debie biala mɔɔ maa awozinli fa alehyenlɛ la ɛha ye ɛzulolɛ.
6 Nɔe zɔhane—maa awozinli kabikabi ɛva ye;+Mmamaa ɔboka kenle ne mɔ mɔɔ wɔ ɛvolɛ ne anu la anwo bɛdi fɛlɛko,Yɛɛ mmamaa bɛfa ye bɛboka siane ne mɔ anwo.
7 Nɔhalɛ nu! Maa nɔe zɔhane ɛyɛ mota;Mmamaa bɛte anyelielɛ ɛdeanlɛ biala wɔ nu.
8 Maa bɛdabɛ mɔɔ bɛwa kenle amonle la ɛwa ye amonle,Bɛdabɛ mɔɔ bɛkola bɛtunwue Lɛveatan*+ la.
9 Maa ye aleɛbahye nwɔlɔra ɛhakyi awozinli;Maa ɔhendɛ alehyenlɛ wienyi ne mgbane,Yɛɛ mmamaa ɔnwu aleɛbahye wienyi ne.
10 Ɔluakɛ yeando me mame awodeɛ nlenkɛ ne mɔ anu;+Amaa meannwu ngyegyelɛ.
11 Duzu ati a bɛwo me la meanwu ɛ?
Duzu ati a mevi ɛkolɛ nu melɛfinde la meanga nzule nu ɛ?+
12 Duzu ati a me mame liele me dole ɔ gyakɛ azoNa ɔmaanle menonle ɔ nyɛfo a?
13 Anrɛɛ kɛkala mela mɔɔ debie biala ɛngyegye me a;+Anrɛɛ melɛda mealie me menle+
14 Me nee azɛlɛ ye azo arelemgbunli nee bɛ folɛtuvolɛma,Bɛdabɛ mɔɔ bɛsisile bɛ azua na kɛkala bɛdɔ mgbane* la,
15 Anzɛɛ me nee mgbanyima mɔɔ ɛnee lɛ nvutuke,Bɛdabɛ mɔɔ bɛvale dwɛtɛ fufule bɛyile bɛ azua ne mɔ anu la.
16 Anzɛɛ duzu ati a meanyɛ kɛ ɛkolɛ mɔɔ ɛkpɔne fealeranu,Kɛ ngakula mɔɔ bɛtɛnwunle wienyi ɛlɛ la ɛ?
17 Nehane a amumuyɛma bɔbɔ gyakyi ɛyavalɛ a;Nehane a menli mɔɔ ɛvɛ la ɛlɛdie bɛ menle a.+
18 Nehane a pilizama anwo tɔ bɛ a;Bɛnde awie mɔɔ fa gyima atinlitinli bɛ nwo zo la ane.
19 Nehane a ngyikyi nee mgbole sɛ,+Na akɛlɛ nyia ye fanwodi fi ɔ menle asa anu a.
20 Duzu ati a ɔmaa mɔɔ ɛlɛnwu amaneɛ la wienyiNa ɔmaa bɛdabɛ mɔɔ bɛlɛdi* nyane kpole la ngoane a?+
21 Duzu ati a bɛ nwo dɔ ewule, noko ɔmba ɛ?+
Bɛkpondɛ ye kpalɛ bɛtɛla anwonyia mɔɔ vea la,
22 Bɛdabɛ mɔɔ bɛlɛdi fɛlɛko kpole,Bɛdabɛ mɔɔ bɛnwu nla a bɛ nye die la.
23 Duzu ati a ɔmaa sonla mɔɔ ɛvo adenle la wienyi,Sonla mɔɔ Nyamenle ɛlie ɔ nwo bane la ɛ?+
24 Ɔluakɛ me aleɛ a le ɛnwomenle ɛgulɛ,+Yɛɛ me nyanelilɛ+ wola gua kɛ nzule.
25 Ɔluakɛ mɔɔ tu me ahonle la ɛra me nwo zo,Yɛɛ mɔɔ mesulo ye la ɛdo me.
26 Menlɛ anzodwolɛ, me nwo ɛtɛtɔle me, menlɛ ɛnwomenlelielɛ biala,Noko ngyegyelɛ ala a ba a.”
Ɔbodwɛkɛ
^ Hibulu aneɛ nu, “ye kenle ne.”
^ Anzɛɛ “awozinli nee ewule alubo.”
^ Bɛte ɔ bo kɛ ɔfale ɛlɛnrɛne anzɛɛ nane kpole bie mɔɔ ɔ nwo yɛ se na ɔta ɔda nzule nu la anwo.
^ Anzɛɛ ɔkola ɔkile, “bɛsisile ɛleka mɔɔ ɛdɔ mgbane bɛmaanle bɛ nwo.”
^ Anzɛɛ “bɛ ɛkɛla ɛlɛdi.”
