Dwobu 30:1-31
30 “Kɛkala bɛsele me+—Menli mɔɔ menyi medɛla bɛ,Mɔɔ anrɛɛ menrɛva bɛ papa mɔMenrɛboka ahwea mɔɔ sinza me mboane nwo la.
2 Duzu nvasoɛ a menyianle menvile tumi mɔɔ wɔ bɛ sa nu la azo a?
Bɛ anwosesebɛ ɛwie.
3 Ehyia nee ɛhɔne ɛmaa bɛnwa;Bɛdi ndɛtɛlɛ keteketeMɔɔ yezɛkye dɛbadɛba na yedɔ mgbane la.
4 Bɛtete nya mɔɔ le ngyenle ngyenle la bɛfi kpɔkɛ nu;Baka buzuu bo ndinli a le bɛ aleɛ a.
5 Bɛfoa bɛ bɛfi menli ne avinli;+Menli kpaye bɛ kɛ mɔɔ bɛkpaye awule la.
6 Bɛde mbɔnza ndololeɛ nu,Azɛlɛ mbɔne nee bodane ne mɔ anu.
7 Bɛsu wɔ kpɔkɛ ne mɔ anuNa bɛboɔboa bɛ nloa wɔ mbowumbaka* avinli.
8 Kɛmɔ bɛle ahoasea mralɛ na bɛ nwo ɛnlɛ nvasoɛ la ati,Bɛvoa bɛ* bɛvi azɛlɛ ne azo.
9 Noko kɛkala bɛgolo me nwo wɔ bɛ edwɛne nu bɔbɔ;+Meyɛ agolobɛnwo debie* memaa bɛ.+
10 Bɛkyi me na bɛtwe bɛ nwo bɛfi me nwo bɛkɔ moamoa;+Bɛnzulo kɛ bɛbado nyɛlɛ bɛagua me nyunlu.+
11 Kɛmɔ Nyamenle ɛlie me akodeɛ ne* na yebɛlɛ me aze la ati,Bɛfuandi ninyɛne mɔɔ si adenle la* kɔsɔɔti bɛgua me nyunlu ɛkɛ.
12 Bɛdwazo kɛ menli mɔɔ yɛ basabasa la wɔ me sa fema zo;Bɛmaa menriandiNa bɛtua* me adenle ne amaa bɛazɛkye me.
13 Bɛsi me adenleNa bɛmaa me amaneɛnwunlɛ ne yɛ kpole,+Awie biala ɛnle ɛkɛ ne mɔɔ ɔmaa bɛagyakyi a.*
14 Bɛba me nwo zo kɛ asɛɛ bɛbu bane a bɛlua nu a;Bɛba me nwo zo wɔ me ɛzɛkyelɛ nu.
15 Ɛzulolɛ kpole ɛha me;Bɛvoa me enililɛ kɛ anwoma,Yɛɛ me ngoanelielɛ ɛminli kɛ amungu la.
16 Kɛkala me ngoane* ɛlɛfi me nu;+Dahuu menwu amaneɛ.+
17 Nɔɔzo me mbowule nu fofo me;*+Mɔɔ maa medi nyane la ɛngyakyi.+
18 Yeva anwosesebɛ kpole yehwe me tɛladeɛ ne;*Yemia me kɛ me tɛladeɛ ne akɔme mɔɔ mia me la.
19 Nyamenle ɛvuandi me ɛdo azia nu,Meyɛ kɛ ndɛtɛlɛ nee nzonle.
20 Mesu mekpondɛ wɔ moalɛ, noko ɛnlie me zo;+Medwazo megyinla, noko ɛnea me ala.
21 Wɔhakyi ɛ nzi wɔzi me atisesebɛ nu;+Wɔva ɛ sa nu anwosesebɛ ne kɔsɔɔti wɔteta me.
22 Ɛmaa me zo na ɛmaa anwoma ne bɔ me kɔ;Akee ɛfuandivuandi me wɔ ahumu ne anu.*
23 Ɔluakɛ meze kɛ ɛbava me wɔahɔ ewule nu,Ɛbava me wɔahɔ sua ne mɔɔ anyewɔzoamra kɔsɔɔti bayia ɛkɛ la anu.
24 Noko awie biala ɛnrɛva ɔ sa ɛnrɛha mɔɔ ɛnlɛ boavolɛ*+Wɔ mekɛ mɔɔ ɔlɛsu yeakpondɛ moalɛ wɔ ye anwongyelelɛ mekɛ nu la.
25 Asoo metɛsunle metɛmaanle bɛdabɛ mɔɔ bɛwɔ anwongyelelɛ nu* la?
Asoo metɛdile* ehyiavolɛma anwo nyane?+
26 Ɛnee me nye la kpalɛ ade, noko ɛtane a rale a;Ɛnee me nye la wienyi ade, noko awozinli a rale a.
27 Nyane mɔɔ melɛdi ye me nu la ɛngyakyi;Menyiale ngyegyelɛ dahuu.
28 Medua ye alɔbɔlɛ alɔbɔlɛ nu;+ ewia ɛnle ɛkɛ.
Medwazo ayiama ne anu, na mesu mekpondɛ moalɛ.
29 Meyɛ ɛzonlɛ adiema nrenyiaYɛɛ soholo amra mraalɛ le me gɔnwo mɔ.+
30 Me nwo nane ɛlu na ɔtete ɔgua;+Wuluwulu maa me mbowule nu dɔ.*
31 Nyanelilɛ edwɛne ala a bɛfa me haape ne bɛto a,Yɛɛ bɛfa me fulutu* ne noko bɛto ɛzunlɛ edwɛne.
Ɔbodwɛkɛ
^ Anzɛɛ “andɔma.”
^ Hibulu aneɛ nu, “Bɛva empele bɛvoa bɛ.”
^ Hibulu aneɛ nu, “ɛrɛlɛbulɛ bie; mgbayelɛ bie.”
^ Hibulu aneɛ nu, “yedo me ɛda nyɛma ne anu.”
^ Anzɛɛ “Bɛfuandi mbulalɛ mɔɔ bɛfa bɛwula nane nloa anu la.”
^ Anzɛɛ “bɛsi.”
^ Anzɛɛ ɔkola ɔkile, “Awie biala ɛnle ɛkɛ ne mɔɔ ɔboa bɛ a.”
^ Anzɛɛ “ɛkɛla.”
^ Hibulu aneɛ nu, “Me mbowule nu bu me.”
^ Anzɛɛ ɔkola ɔkile, “Me nyanelilɛ ne anu ɛsesebɛ ɛmaa mehakyi.”
^ Anzɛɛ ɔkola ɔkile, “ɛsɛkye me wɔ ahumu nu.”
^ Hibulu aneɛ nu, “ewula edukue ɛhye.”
^ Anzɛɛ “bɛdabɛ mɔɔ bɛlɛdi nyane.”
^ Anzɛɛ “Asoo me ɛkɛla ɛtɛdile.”
^ Anzɛɛ ɔkola ɔkile, “maa ebunlu kye me.”
^ Anzɛɛ “paepe.”
